1 Corinto 7:1-40
7 Natan, nipaakar ed saray bengatlan insulat yo, maabig parad sakey a laki no agto diwiten so sakey a bii;
2 ingen, lapud kasmak so pilalawanan, komon ta say kada laki et nawalaan na asawa ton dili tan say kada bii et nawalaan na asawa ton dili.
3 Iter komon na asawan laki so kanepegan na asawa to; balet ontan met komon so gawaen na asawan bii ed asawa to.
4 Say asawan bii et agto uuleyan so laman ton dili, noagta say asawa to so manguuley ed satan; tan ontan met, say asawan laki et agto uuleyan so laman ton dili, noagta say asawa to so manguuley ed satan.
5 Agyo itan isisiblet ed kada sakey, nilikud no walay nampaknaan yon dua ed loob na sakey ya aturon panaon, pian nipanaon yoy panagpikasi insan mankasakey kayo lamet, pian agkayo naynay a tuksoen nen Satanas ta agyo nakontrol so inkasikayo.
6 Anggaman ontan, ibabagak iya bilang panangiyabuloy, aliwan bilang sakey a ganggan.
7 Balet labay ko ya amin komon a totoo et singa siak. Ingen, kada sakey et walaan na regalo a nanlapud Dios, say sakey et diad onian paraan, say sananey et diad ontan a paraan.
8 Natan, ibabagak ed saray andian na asawa tan saray bibiin balo, a maabig no mansiansia ran singa siak.
9 Balet no agda nakontrol so inkasikaran dili, mangasawa la ra, ta magmaong ni so mangasawa nen say ondalang ira ed pampilpilalek.
10 Bilinen ko iray walaan na asawa, ingen ta agmanlapud siak noagta manlapud Katawan, a say asawan bii et nepeg ya agmisian ed asawa to;
11 balet no nakaukolan a sikatoy misian, sikatoy mansiansian andian na asawa odino sikatoy mipawilan ed asawa to; tan say asawan laki et nepeg ya agto taynan so asawa to.
12 Balet diad arum et ibabagak, on, siak, aliwan say Katawan: No say agin laki et agmananisia so asawa to, ingen ta maabuloy iyan miamong ed sikato, agto komon taynanan;
13 tan no say sakey a bii et agmananisia so asawa to, ingen ta maabuloy iyan miamong ed sikato, agto komon taynanan so asawa to.
14 Ta say agmananisian asawan laki et napapasanto lapud asawa to, tan say agmananisian asawan bii et napapasanto lapud agin laki; ta no andi, saray anak yo et magmaliw ya agmalinis, balet natan et masanto la ra.
15 Balet no samay agmananisia et labay toy misian, paulyan yon misian; say sakey ya agin laki odino say sakey ya agin bii et aliwan obligado ed ontan iran kipapasen, balet inter na Dios ed sikayo so kareenan.
16 Asawan bii, panon mon amta no nilaban moy asawam? Odino, asawan laki, panon mon amta no nilaban moy asawam?
17 Ta no antoy inyabuloy nen Jehova a betang na kada sakey, sikato komon so manbilay unong ed satan bilang tinawag na Dios. Tan ontan so igaganggan ko ed amin a kongregasyon.
18 Wala ta’y toon tinawag lan asegat? Sikatoy agmagmaliw komon ya ag-asegat. Wala ta’y toon tinawag ya ag-asegat? Sikatoy agla komon manpapasegat.
19 Say panagpasegat tan agpanagpasegat et parehon andi-kakanaan, say importante et say pananumpal ed saray ganggan na Dios.
20 Diad antokaman a kipapasen a tinawag so kada sakey, sikatoy mansiansia komon ed satan.
21 Kasin sakey kan aripen sanen atawag ka? Agmo pampapagaan itan; balet no nayarian mo met so magmaliw a bulos, anamot mo so pankanawnawa.
22 Ta say siopaman a walad Katawan a tinawag sanen sikatoy aripen et bulos lan too ed Katawan; ontan met, samay tinawag sanen sikatoy bulos a too et sakey ya aripen nen Kristo.
23 Mabli so impanaliw ed sikayo; agkayo la manpapaaripen ed totoo.
24 Agagi, diad antokaman a kipapasen a tinawag so kada sakey, sikatoy mansiansia komon ed satan, a mansiansian maapit ed Dios.
25 Nipaakar ed saray andiay asawa,* anggapoy ganggan ko manlapud Katawan, balet iiter koy opinyon ko bilang sakey a matoor a kinasian na Katawan.
26 Kanian lapud mairap a kipapasen tayo natan, iisipen ko a maabig parad sakey a too a sikatoy mansiansia ed kipapasen to.
27 Kasin asinger ka ed sakey ya asawan bii? Agmo la pipirawaten so nabulos. Kasin bulos ka ed sakey ya asawan bii? Agka la manaanap na asawa.
28 Balet anggano mangasawa ka, agka mankasalanan. Tan no miasawa so sakey ya andiay asawa,* sikatoy agmankasalanan. Anggaman ontan, saramay mangasawa et nawalaan na kairapan ed laman da. Balet ipapaliis ta kayo.
29 Niarum ni, saya so ibabagak, agagi, ya apatikeyan lay akeran panaon. Kanian, saramay lalaki a walaan na asawa et magmaliw ira komon a singa anggapoy asawa,
30 tan saraman met so onaakis et magmaliw komon a singa ag-onaakis, tan saramay manliliket et singa agmanliliket, tan saramay mansasaliw et singa agmangakayarian,
31 tan saramay manguusar ed mundo et singa saramay agmanguusar a maong ed satan; ta say nanenengneng tayo natan ed sayan mundo et manguuman.
32 On, labay ko ya anggapo komon so kapagaan yo. Say lakin andian na asawa et mapaga ed saray bengatlan nipaakar ed Katawan, no panon ton napaliket so Katawan.
33 Balet say lakin walaan na asawa et mapaga ed saray bengatlan nipaakar ed mundo, no panon ton napaliket so asawa to,
34 tan sikatoy naapag. Niarum ni, say biin andian na asawa, tan say birhen, et mapaga ed saray bengatlan nipaakar ed Katawan, pian sikatoy magmaliw a masanto ed laman to tan ed espiritu to. Balet, say biin walaan na asawa et mapaga ed saray bengatlan nipaakar ed mundo, no panon ton napaliket so asawa to.
35 Balet ibabagak iya parad pankaabigan yon dili, aliwan pian pegetan ta kayo, noagta pian pakiwasen ta kayo ed bengatlan manepeg tan ed naynay a pakapanlingkor yo ed Katawan ya anggapoy makasbel.
36 Balet, no iisipen na siopaman ya agla manepeg so ikikiwas to nipaakar ed kipapasen to bilang andiay asawa, no sikatoy aliwa lan kalangweran, tan nepeg a nagawa itan ed onian paraan, gawaen to komon so labay to; sikatoy agmankasalanan. Abuloyan yo ran mangasawa.
37 Balet, no say siopaman et desidido la ed puso to ya agto nakaukolan itan, noagta walaan na pakauley ed panlabayan ton dili tan ginawa ton desisyon ed puso to so mansiansian andiay asawa, maabig so gawaen to.
38 Lapud saya, saman met so mangasawa et maabig so gawaen to, balet samay agmangasawa et magmaong so gawaen to.
39 Say asawan bii so asinger ed amin a panaon legan a mabilay so asawa to. Balet no inatey so asawa to, sikatoy bulos a miasawa ed samay labay to, dia labat ed Katawan.
40 Balet sikatoy mas maliket no sikatoy mansiansia ed kipapasen to, unong ed opinyon ko. Peteg ya iisipen ko a walaan ak met na espiritu na Dios.
