1 Corinto 16:1-24
16 Natan nipaakar ed panagkolekta na kuarta parad saray masanto, unong ya ingganggan ko ed saray kongregasyon na Galacia, ontan met so gawaen yo.
2 Diad kada unonan agew na simba et mangibiig komon so kada sakey ed sikayo diad abung ton dili na antokaman a natipon to no bilang ta sikatoy onaaligwas, ta pian agnagawa so panagkolekta diad isabik.
3 Balet kasabik ditan, siopaman a lalaki ya abobonan yo ed panamegley na saray sulat et ibakik a mangawit ed maaron regalo yo diad Jerusalem.
4 Balet no manepeg a siak so onla met diman, onla ra diman a kaibak.
5 Balet onla ak ed sikayo sano akakar ak la ed Macedonia, ta onla ak ni ed Macedonia;
6 tan ompan miayam ak a magano ed sikayo odino mamalabas ak ni ingen na ambetel a panaon ditan, ta pian kayari na satan et nipatnubang yo ak ed laen ko.
7 Ta agko labay a say pakapinengnengan ko ed sikayo et sano onsamar ak labat, lapud pirawat ko a nakaiba ta kayo ed pigaran panaon, no iyabuloy nen Jehova.
8 Balet mansiansia ak ni ed Efeso anggad piesta na Pentecostes;
9 ta nilukas ed siak so sakey a baleg a puerta a mangitonton ed kimey, balet ta dakel so onsusumpa.
10 Balet no onsabi si Timoteo, seguroen yon agkomon ontakot ed sikayo, ta gagawaen to so kimey nen Jehova, a singa siak met.
11 Kanian, anggapo komon so manleglemew ed sikato. Sikatoy ipatnubang yo ed kareenan, pian makakar dia ed siak, ta kaibak iray agagi a manaalagar ed sikato.
12 Nipaakar ed si Apolos ya agi tayo, akikasi ak ed sikato pian onla komon ed sikayo a kaiba to iray agagi, ingen ta agto ni labay so onla natan; balet onla sano wala lay pankanawnawa to.
13 Mansiansia kayon aliing, talindeg kayo ed pananisia, manpakpel kayo,* magmaliw kayon mabiskeg.
14 Amin a kimey yo et nagawa komon diad aro.
15 Natan et bilinen ta kayo, agagi: amta yo a say sankaabungan nen Estefanas so unonan bungabunga ed Acaya tan akaparaan iran naynay a manlingkor ed saray masanto.
16 Komon ta mantultuloy kayo met a manpasakop ed ontan iran klase na totoo tan ed balang sakey a mitutulongan tan mansasagpot.
17 Balet manliket ak ed kiwawala nen Estefanas tan si Fortunato tan si Acaico, lapud wadia ra anggano anggapo kayo dia.
18 Ta siak tan sikayo et nainawaan lapud sikara. Kanian bidbiren yo so ontan iran klase na totoo.
19 Manpapakomusta ed sikayo iray kongregasyon ed Asia. Ipapasabi di Aquila tan Prisca pati say kongregasyon a walad abung da so maaron panangomusta ed sikayo diad Katawan.
20 Manpapakomusta ed sikayo so amin ya agagi. Ibano yo so sakey tan sakey diad masanton angob.
21 Siak, si Pablo, so angisulat a mismo ed sayan panangomustak.
22 No walay siopaman ya agmangaaro ed Katawan, sikato komon so naayew. Onsabi ka la komon, Katawan mi!
23 Niwala komon ed sikayo so agnaparaan a kaabigan na Katawan a Jesus.
24 Niwala komon so arok ed sikayon amin a nikasakey ed si Kristo Jesus.
