1 Corinto 3:1-23
3 Kanian, agagi, agak nansalita ed sikayo a singa ed saray espiritual a totoo, noagta singa ed saray minumundon totoo,* a singa ed saray ugugaw ed Kristo.
2 Pinainum ta kayo na gatas, ya aliwan sakey ya anawet a naakan, ta aliwa kayo nin mabiskeg a maong. Diad tua, aliwa kayo nin mabiskeg natan,
3 ta minumundo kayo ni. Ta legan a walay imon tan pankokolkol ed limog yo, agta sikayoy minumundo tan manbibilay a singa saray totoo ed mundo?
4 Ta sano ibabaga na sakey: “Wala ak ed si Pablo,” balet ibabaga na sananey: “Siak, diad si Apolos,” agta totoo kayo labat?
5 Siopa sirin si Apolos? On, siopa si Pablo? Ministro ira, a diad panamegley da et nagmaliw kayon mananisia, unong ed inter na Katawan ed kada sakey.
6 Siak so nantanem, si Apolos so nansalog, balet say Dios so mamapabaleg;
7 kanian aliwan say mantatanem odino mansasalog so importante, noagta say Dios a mamapabaleg ed satan.
8 Natan, samay mantatanem tan samay mansasalog et saksakey ira, balet awaten na kada too so tumang to unong ed dilin sagpot to.
9 Ta kakimeyan itayo na Dios. Sikayo so uma a daralusan na Dios, say abung ya impaalagey to.
10 Unong ed agnaparaan a kaabigan na Dios a niiter ed siak, angiletneg ak na sakey a pundasyon a singa sakey a marunong a manangasikaso na saray kimey, ingen sananey so manpapaalagey ditan. Balet mantultuloy komon ya imanoen na kada sakey no panon so pampapaalagey to ditan.
11 Ta anggapo so toon makapangiletneg na arum nin pundasyon nilikud ed samay akaletneg la, salanti si Jesu-Kristo.
12 Natan no walay manpaalagey ed tapew na pundasyon a mangusar na balitok, pilak, mablin batobato, kiew, dayami, nampalotan,
13 napatnagan so kimey na kada sakey, ta say agew so mangipanengneng ed satan, lapud niparungtal itan diad panamegley na apoy; tan say apoy a mismo so mamaneknek no anton klase so kimey na kada sakey.
14 No mansiansia so kimey ya impaalagey ditan na sakey a too, sikatoy mangawat na tumang;
15 no napoolan so kimey na sakey a too, sikatoy nabalangan, balet sikaton mismo et nilaban; ingen ta sikatoy magmaliw a singa dinmalan ed apoy.
16 Agyo ta amta a sikayo so templo na Dios, tan manaayam ed sikayo so espiritu na Dios?
17 Siopaman a manederal ed templo na Dios, sikatoy deralen na Dios; ta say templo na Dios et masanto, a sayan templo et sikayo.
18 Agkomon palikdoen na sakey a too so dili to: Siopaman ed limog yo a maniisip a sikatoy marunong ed sayan sistema na mundo et magmaliw komon a makulangkulang, pian sikatoy magmaliw a marunong.
19 Ta say karunongan na sayan mundo et kakulangkulangan ed Dios; ta walan nisulat: “Eerelen to iray marunong diad dilin kasiliban da.”
20 Niarum ni: “Amta nen Jehova ya andi-kakanaan iray panagkatunongan na totoon marunong.”
21 Kanian anggapo komon so manpasirayew nipaakar ed totoo; ta amin a bengatla et kayarian yo,
22 balanglan si Pablo odino si Apolos odino si Cefas odino say mundo odino bilay odino ipapatey odino saray bengatlan wadia natan odino saray bengatlan onsabi, amin a bengatla et kayarian yo;
23 tan sikayo et kayarian nen Kristo; tan si Kristo et kayarian na Dios.
