1 Corinto 4:1-21

4  Komon ta ipasen kami na sakey a too bilang saray lingkor a mankikimey parad si Kristo tan saray manag-asikaso ya angimatalekan ed saray sagradon sekreto na Dios.  Niarum ni, diad sayan kipapasen, say aanapen ed saray manag-asikaso et samay toon peteg a matoor.  Natan, aliwan importante ed siak no sikayo odino say korte na too so kaukolan a manusisa ed siak. Anggan siak et agko uusisaen so inkasiak.  Ta anggapoy nanonotan kon ginawak a makapuy. Ingen diad saya et agak napapaneknekan a matunong, balet say manguusisa ed siak et si Jehova.  Kanian agkayo manguukom no agni asabi so aturon panaon, anggad isabi na Katawan, a sikatoy mangiparungtal ed saray bengatlan niamot ed kabilungetan tan mangipatnag ed saray getma na kapusoan, insan iter na Dios so kanepegan a dayew ed kada sakey.  Natan, agagi, sarayan bengatla et inyaplikak ed inkasiak tan ed si Apolos pian nagunggonaan kayo, tan naaralan yo ed sikami so totontonen: “Agyo papasulokan iray bengatlan nisulat,” ta pian agmanpaatagey so balang sakey ed sikayo a paboran to so sakey nen samay sakey.  Ta siopay nanggawa ed sika a magmaong nen say arum? Diad tua, antoy walad sika ya agmo inawat? Natan, no peteg ya inawat mo itan, akin et manpapasirayew ka a singano agmo inawat itan?  Agta napnek kayo la? Agta mayaman kayo la? Agta manuuley kayo la bilang arari anggano anggapo kami? Tan labalabay ko a manuuley kayo la komon bilang arari, ta pian makapiuley kami met ed sikayo bilang arari.  Ta iisipen ko a sikami ran apostol et inyan na Dios ed unor a palabas a singa totoon asentensiaan lan pateyen, ta nagmaliw kamin singa babantayan ed teatro diad mundo, tan diad saray anghel, tan diad totoo. 10  Makulangkulang kami lapud si Kristo, balet makabat kayo ed si Kristo; makapuy kami, balet mabiskeg kayo; wala kayo ed kagalangan, balet wala kami ed kababaingan. 11  Anggad sayan oras et naeerasan kami tan napepegaan met tan nalalakseban tan napoponiti tan naaandian na panayaman 12  tan mansasagpot, a mankikimey kami ed saray lima mi. Sano namumudmora, mansasalita kami na maabig; sano napapasegsegang, mantetepel kami; 13  sano napapauges, mikakasi kami; nagmaliw kamin singa basura ed mundo, say dutak na amin a bengatla, anggad natan. 14  Insulat ko iraya pian bilinen kayo a singa inad-arok ya ananak, aliwan pian pabaingan kayo. 15  Ta anggano samplon libo so mangibabangat ed sikayo diad si Kristo, daiset balet iray ama yo; ta diad si Kristo Jesus et nagmaliw ak ya ama yo diad panamegley na maong a balita. 16  Kerewen ko sirin ed sikayo ya alig yo ak. 17  Kanian ibakik ed sikayo si Timoteo, ta sikatoy inad-aro tan matoor ya ana’ko ed Katawan; tan ipanonot to ed sikayo iray paraan ko nipaakar ed si Kristo Jesus, a singa ibabangat ko ed amin a pasen diad kada kongregasyon. 18  Manpapaatagey so arum a singano agak la onla ed sikayo. 19  Balet magano ak lan onla ditan, no linawa nen Jehova, tan amtaen ko no walaan na pakayari iramay manpapaatagey, aliwan say sasalitaen da. 20  Ta say panarian na Dios et ag-akadepende ed sasalitaen, noagta diad pakayari. 21  Antoy labay yo? Onla ak ed sikayo a walaan na lewet, odino walaan na aro tan maulimek ya espiritu?

Paimanod leksab