1 Corinto 2:1-16
2 Kanian agak linma ed sikayo, agagi, pian pandinayewen ta kayo ed panagsalita odino karunongan diad pangiyaabawag ko ed sikayo na sagradon sekreto na Dios.
2 Ta nandesisyon ak a say ipaimanok labat ed sikayo et say nipaakar ed si Jesu-Kristo, tan say inkipasak to.
3 Tan sanen linma ak ed sikayo, makapuy ak tan natatakot tan manggiwgiw ak a maong;
4 tan say panagsalitak tan samay impulong ko et aliwan diad makatangguyor iran salita na karunongan noagta diad panangipatnag na espiritu tan pakapanyari,
5 pian say pananisia yo et aliwan unong ed karunongan na totoo, noagta unong ed pakapanyari na Dios.
6 Natan et sasalitaen tayo so karunongan ed limog na saramay matatken, balet aliwan say karunongan na sayan sistema na mundo odino saramay manuley na sayan sistema na mundo a naandi naani.
7 Balet sasalitaen tayo so karunongan na Dios diad panamegley na sakey a sagradon sekreto, say niamot a karunongan, ya inggana la na Dios antis na saray sistema na mundo parad kigloriaan tayo.
8 Sayan karunongan et agnaamtaan na anggan sakey ed saray manuley na sayan sistema na mundo, ta no naamtaan da et agda komon impasak so maglorian Katawan.
9 Balet unong a nisulat: “Say mata so ag-akanengneng tan say layag so ag-akadngel, tan diad puso na too et agnatebek iray bengatlan imparaan la na Dios parad saramay mangaaro ed sikato.”
10 Ta sikatayo so angiparungtalan na Dios ed saraya diad panamegley na espiritu to, ta say espiritu so manguusisa ed amin a bengatla, anggan saray aralem a kanonotan na Dios.
11 Ta siopa ed limog na totoo so makaamta ed saray kanonotan na sakey a too nilikud ed say espiritu na too a walad sikato? Kanian ontan met, anggapo so akaamta ed saray kanonotan na Dios, nilikud ed espiritu na Dios.
12 Natan et inawat tayo so espiritu a nanlapud Dios, aliwan say espiritu na mundo, ta pian naamtaan tayo iray bengatla a mapangasin inter ed sikatayo na Dios.
13 Sasalitaen tayo met iraya, aliwan saray salitan imbangat ed panamegley na karunongan na too, noagta saramay imbangat ed panamegley na espiritu, legan a pantetekepen tayo iray espiritual a bengatla tan saray espiritual a salita.
14 Balet ag-aawaten na sakey a pisikal a too iray bengatlan nipaakar ed espiritu na Dios, ta kakulangkulangan iratan ed sikato; tan agto nayarian ya amtaen iratan, lapud uusisaen iratan ed espiritual a paraan.
15 Ingen ta say espiritual a too et peteg a manguusisa ed amin a bengatla, balet sikatoy ag-uusisaen na siopaman a too.
16 Ta “siopa so akaamta la ed kanonotan nen Jehova, ta pian sikatoy ibangat to?” Balet walaan itayo na kanonotan nen Kristo.
