1 Corinto 1:1-31
1 Siak, si Pablo, a tinawag pian magmaliw ya apostol nen Jesu-Kristo diad panamegley na linawa na Dios, tan si Sostenes ya agi tayo
2 so nansulat ed kongregasyon na Dios ed Corinto, diad sikayoran apasanto ya akikasakey ed Kristo Jesus, a tinawag pian magmaliw a masanto, kaiba so amin a walad nanduruman pasen ya ontatawag ed ngaran na Katawan tayon amin, si Jesu-Kristo:
3 Nawalaan kayo komon na agnaparaan a kaabigan tan deen a manlalapu ed Dios ya Ama tayo tan ed Katawan a Jesu-Kristo.
4 Naynay ak a misasalamat ed Dios lapud agnaparaan a kaabigan to a niiter ed sikayo diad panamegley nen Kristo Jesus;
5 ta apayaman kayo ed sikato diad amin a bengatla, pati diad abilidad yon mangiyabawag ed salita tan diad sigpot a pikakabat yo,
6 lapud say pantasi nipaakar ed Kristo et malet a niletneg ed limog yo,
7 ta pian agkayon balot onkulang ed antokaman a regalo, legan a magunaet yon aalagaren so kiparungtal na Katawan tayon Jesu-Kristo.
8 Pabiskegen to kayo met anggad anggaan, ta pian anggapoy antokaman a pangakusaan ed sikayo diad agew na Katawan tayon Jesu-Kristo.
9 Say Dios et matoor, a sikato so anawag ed sikayo pian magmaliw a minanabang a kaiba na Anak ton si Jesu-Kristo a Katawan tayo.
10 Bilinen ta kayo natan, agagi, diad panamegley na ngaran na Katawan tayon Jesu-Kristo a nepeg a manpapakna kayon amin ed sasalitaen yo, tan nepeg ya anggapoy inkaapag-apag ed limog yo, noagta sigpot kayon mankakasakey ed nonot tan ed paraan na panag-isip.
11 Ta impasabi ed siak na saramay walad abung nen Cloe so nipaakar ed sikayo, agagik, a wala iray agpantutunosan ed limog yo.
12 Saya so labay kon ibaga, a kada sakey ed sikayo so mangibabagan: “Wala ak ed si Pablo,” “Balet siak, diad si Apolos,” “Balet siak, diad si Cefas,” “Balet siak, diad si Kristo.”
13 Naaapag so kongregasyon nen Kristo. Kasin si Pablo so nipasak parad sikayo? Odino kasin abautismoan kayo diad ngaran nen Pablo?
14 Misalsalamat ak ta anggapo ed sikayo so binautismoan ko nilikud ed si Crispo tan si Gayo,
15 ta pian anggapoy mangikuan ya abautismoan kayo diad ngaran ko.
16 On, binautismoan ko met so sankaabungan nen Estefanas. No nipaakar ed arum, agko amta no wala ni so binautismoan ko.
17 Ta imbaki ak nen Kristo, aliwan pian manbautismo, noagta pian mangiyabawag na maong a balita, aliwan diad panamegley na karunongan ed panagsalita, ta pian agmagmaliw ya andi-kakanaan so panamairapan a kiew* nen Kristo.
18 Ta say salita nipaakar ed panamairapan a kiew et kakulangkulangan parad saramay mamapaarap ed kadederal, balet parad sikatayoran nilaban et pakapanyari itan na Dios.
19 Ta walan nisulat: “Paandien ko so karunongan na saray totoon marunong, tan ipulisay ko so pakatalos na saray totoon makatalos.”
20 Kawalaan na toon marunong? Kawalaan na eskriba? Kawalaan na debatista ed sayan sistema na mundo? Agta say Dios et ginawa ton makulangkulang so karunongan na mundo?
21 Lapud ag-akabatan na mundo so Dios diad panamegley na karunongan na satan, sineguro na Dios, unong ed karunongan to, ya ilaban iramay manisia diad panamegley na kakulangkulangan na samay ipupulong.
22 Ta saray Judio et onkekerew na saray tanda tan saray Griego et manaanap na karunongan;
23 balet ipupulong tayo a nipasak si Kristo, a parad saray Judio et pakatiroran balet parad saray nasyon et kakulangkulangan;
24 ingen ta parad saramay tinawag, saray Judio tan Griego, si Kristo so pakapanyari na Dios tan say karunongan na Dios.
25 Ta say makulangkulang a bengatla ed Dios et mas marunong nen saray totoo, tan say makapuy a bengatla ed Dios et mas mabiskeg nen saray totoo.
26 Ta diad panatawag to ed sikayo et naiimano yo, agagi, a pigpigaray atawag a marunong unong ed laman, pigpigara so makapanyari, pigpigara so nianak a dederlengen;
27 balet pinili na Dios iray makulangkulang a bengatla na mundo, ta pian niiyan to ed kababaingan iray totoon marunong; tan pinili na Dios iray makapuy a bengatla na mundo, ta pian niiyan to ed kababaingan iray mabiskeg a bengatla;
28 tan pinili na Dios iray andi-kakanaan a bengatla na mundo tan saray bengatlan balbalawen, saray bengatlan ipapasen ya anggapo, ta pian paandien to iray bengatlan ipapasen a wala,
29 ta pian anggapoy too* a makapanpasirayew ed imaton na Dios.
30 Balet lapud Dios, nikasakey kayo ed si Kristo Jesus, a diad sikatayo et sikatoy nagmaliw a karunongan manlapud Dios, tan inkatunong tan panamasanto tan kibulos diad panamegley na dondon;
31 ta pian magmaliw itan a singa samay nisulat: “Samay manpapasirayew et manpasirayew komon nipaakar ed si Jehova.”
