Mikea 2:1-13

  • Ħażin għal dawk li jaħqru lil oħrajn! (1-11)

  • L-Iżraelin kollha se jinġabru flimkien (12, 13)

    • Il-pajjiż se jkun mimli storbju minħabba n-nies (12)

2  “Ħażin għal dawk li qed jippjanaw li jagħmlu l-ħsara,Dawk li qed jippjanaw kif ħa jagħmlu l-ħażin waqt li jkunu fuq is-sodod tagħhom! Imbagħad malli jisbaħ jagħmluh,Għax għandhom il-qawwa.  2  Huma jixtiequ għelieqi u jaħtfuhom;Jixtiequ djar u jiħduhom;Jisirqu d-dar taʼ raġel,U anki l-wirt tiegħu.  3  Għalhekk, dan hu dak li jgħid Ġeħova: ‘Jien qed nippjana biex inġib diżastru fuqkom u mhux se jirnexxilkom taħarbu minnu.* M’intomx se tibqgħu kburin, għax dan se jkun żmien taʼ diżastru.  4  Dakinhar, in-nies se jgħidu proverbju dwarkom,U huma se jibku ħafna minħabba fikom. Huma se jgħidu: “Ħadulna kollox! Hu ħa l-art tagħna u taha lil oħrajn. Hu ta l-art tagħna lil poplu li ma jaqdix lilu.”  5  Għalhekk, mhu se jkollkom lil ħadd mill-poplu* taʼ ĠeħovaBiex juża l-ħabel tal-kejl, ħalli jqassam l-art.  6  Imma huma jgħidu, “Tibqgħux tippritkaw!”“M’għandkomx titkellmu iktar dwar dawn l-affarijiet;Aħna mhux se niġu umiljati!”  7  Dar Ġakobb, għala n-nies qed jgħidu: “Jaqaw l-ispirtu taʼ Ġeħova m’għadux paċenzjuż? Huma dawn l-affarijiet li qed jagħmel hu?” Jaqaw dak li ngħid jien ma jagħmilx il-ġid lil dawk li jagħmlu t-tajjeb?  8  Imma dan l-aħħar, il-poplu tiegħi aġixxa bħal għadu. Lil dawk li jgħaddu b’rashom mistrieħa, bħal dawk li jkunu ġejjin lura mill-gwerra,Intom tiħdulhom l-ornamenti taʼ valur mal-libsa.*  9  Intom tkeċċu lin-nisa tal-poplu tiegħi mid-dar tagħhom li hi għal qalbhom;U lit-tfal tagħhom tiħdulhom għal dejjem l-affarijiet tajbin li jien berikthom bihom. 10  Qumu u itilqu, għax dan mhux post fejn tistrieħu. Minħabba n-nuqqas taʼ ndafa hemm qerda, qerda kerha. 11  Jekk raġel ifittex dak li ma jiswa għal xejn* u l-qerq, u jgħid din il-gidba: “Intom se jkollkom l-inbid u x-xorb alkoħoliku,” Imbagħad intom mill-ewwel se taċċettawh bħala profeta għal dan il-poplu. 12  Ġakobb, jien żgur li se niġbor lill-poplu tiegħek kollu;Żgur li se niġbor flimkien lil dawk li fadal minn Iżrael. Se nqegħedhom flimkien bħal nagħaġ fil-maqjel,Bħal merħla li tkun qed tirgħa;Il-post se jkun mimli storbju minħabba n-nies.’ 13  Il-wieħed li se jiftaħ it-triq se jmur qabilhom;Imbagħad huma jgħaddu minnha, jgħaddu mill-bieb, u joħorġu minnu. Ir-re tagħhom se jgħaddi quddiemhom,U Ġeħova se jmexxihom kollha.”

Noti taʼ taħt

^ Letteralment “mhux se tneħħu għonqkom minnu.”
^ Letteralment “mill-kongregazzjoni.”
^ Jew forsi “mil-libsa.”
^ Letteralment “jimxi wara r-riħ.”