L-Ewwel Ktieb taʼ Samwel 7:1-17
7 Għalhekk, l-irġiel taʼ Kirjat-ġegħarim marru u tellgħu l-Arka taʼ Ġeħova fid-dar t’Abinadab fuq l-għolja, u qaddsu lil ibnu Elegħażar biex joqgħod għassa mal-Arka taʼ Ġeħova.
2 Minn dakinhar li l-Arka waslet f’Kirjat-ġegħarim, għaddew 20 sena. Imbagħad in-nies kollha taʼ dar Iżrael bdew ifittxu* lil Ġeħova.
3 U Samwel qal lid-dar kollha t’Iżrael: “Jekk qed terġgħu lura lejn Ġeħova b’qalbkom kollha, neħħu minn nofskom l-allat barranin kif ukoll l-istatwi t’Għastoret. Aqdu lil Ġeħova biss u agħmlu dan b’qalbkom kollha, u hu jeħliskom mill-Filistin.”
4 Għal dan, l-Iżraelin neħħew il-Bagħalim u l-istatwi t’Għastoret u qdew lil Ġeħova biss.
5 Imbagħad Samwel qal: “Laqqgħu lil Iżrael kollu f’Mispa, u jien nitlob lil Ġeħova għalikom.”
6 Għalhekk, dakinhar iltaqgħu flimkien f’Mispa, imlew l-ilma, ferrgħuh quddiem Ġeħova, u samu. Hemmhekk qalu: “Dnibna kontra Ġeħova.” U Samwel beda jaqdi bħala mħallef fuq l-Iżraelin f’Mispa.
7 Meta l-Filistin semgħu li l-Iżraelin kienu ltaqgħu flimkien f’Mispa, il-mexxejja tal-Filistin telgħu biex jiġġieldu kontrihom. L-Iżraelin beżgħu meta semgħu b’dan.
8 Għalhekk, l-Iżraelin qalu lil Samwel: “Kompli għajjat lil Ġeħova l-Alla tagħna biex jgħinna u jsalvana mill-Filistin.”
9 Imbagħad Samwel ħa ħaruf u offrieh bħala offerta sħiħa tal-ħruq lil Ġeħova. Hu għajjat lil Ġeħova biex jgħin lill-Iżraelin, u Ġeħova wieġbu.
10 Waqt li Samwel kien qed joffri l-offerta tal-ħruq, il-Filistin resqu qrib biex jiġġieldu kontra Iżrael. Dakinhar, Ġeħova ġiegħel li jkun hemm ragħad qawwi kontra l-Filistin. B’hekk ħawwadhom u ġew megħlubin quddiem Iżrael.
11 U l-irġiel t’Iżrael ħarġu minn Mispa u ġrew wara l-Filistin u baqgħu joqtluhom san-Nofsinhar taʼ Bet-kar.
12 Imbagħad Samwel ħa ġebla u qegħedha bejn Mispa u Ġesana u semmieha Ebengħeżer* għax qal: “S’issa Ġeħova għenna.”
13 B’hekk il-Filistin tilfu u ma marrux iktar fit-territorju t’Iżrael. Ġeħova kompla jopponi lill-Filistin kemm dam ħaj Samwel.
14 Ukoll, il-bliet minn Għekron sa Gat, li l-Filistin kienu ħadu mingħand Iżrael, ingħatawlhom lura. Iżrael ħa lura t-territorju tiegħu minn id il-Filistin.
Ukoll, kien hemm il-paċi bejn Iżrael u l-Amurrin.
15 Samwel baqaʼ jiġġudika lil Iżrael tul ħajtu.
16 Kull sena vvjaġġa u żar Betel, Gilgal, u Mispa, u ġġudika lil Iżrael f’dawn il-postijiet kollha.
17 Imma kien imur lura Rama fejn kien jgħix u jiġġudika lil Iżrael hemm ukoll. Hu bena artal lil Ġeħova hemm.
