L-Ewwel Ktieb taʼ Samwel 15:1-35
15 Imbagħad Samwel qal lil Sawl: “Ġeħova bagħat lili biex ninkarigak* bħala re fuq il-poplu tiegħu Iżrael. Issa ismaʼ dak li għandu x’jgħid Ġeħova.
2 Hekk jgħid Ġeħova tal-armati: ‘Nitlob kont mill-Għamalekin talli ħaduha kontra Iżrael meta kien ħiereġ mill-Eġittu.
3 Issa mur u eqred għalkollox lill-Għamalekin u kulma għandhom. M’għandekx turi ħniena magħhom. Għandek toqtol l-irġiel u n-nisa, it-tfal u t-trabi, il-barrin u n-nagħaġ, u l-iġmla u l-ħmir.’”
4 Sawl ġabar l-armata u għadd l-irġiel f’Telajm: Kien hemm 200,000 suldat u 10,000 raġel minn Ġuda.
5 Sawl wasal sal-belt t’Għamalek u staħba biex jattakka fil-wied.
6 Imbagħad Sawl qal lill-Kenin: “Morru, itilqu minn fost l-Għamalekin biex ma nkaxkarkomx magħhom. Għax intom urejtu mħabba u lealtà* mal-poplu kollu t’Iżrael meta ħareġ mill-Eġittu.” Għalhekk, il-Kenin telqu minn Għamalek.
7 Imbagħad Sawl u s-suldati tiegħu attakkaw lill-Għamalekin minn Ħawila sa Sur, li hi ħdejn l-Eġittu.
8 Lil Agag ir-re t’Għamalek qabduh ħaj, imma n-nies l-oħrajn kollha qatluhom bix-xabla.
9 Madankollu, Sawl u s-suldati tħassruh lil* Agag u la qatlu lilu u lanqas l-aħjar nagħaġ, baqar, annimali msemmnin, u mtaten. Huma żammew kulma kien tajjeb u ma ridux jeqirduhom. Imma l-affarijiet kollha li ma kienu jiswew għal xejn u li ma riedhom ħadd, qerduhom għalkollox.
10 Imbagħad Ġeħova qal lil Samwel:
11 “Jiddispjaċini li għamilt lil Sawl re, għaliex ma baqax jimxi warajja u m’għamilx dak li għedtlu.” Samwel kien inkwetat ħafna, u baqaʼ jitlob bil-ħniena lil Ġeħova l-lejl kollu.
12 Meta Samwel qam kmieni biex jiltaqaʼ maʼ Sawl, lil Samwel qalulu: “Sawl mar Karmel, u hemm bena monument għalih. Imbagħad niżel lejn Gilgal.”
13 Meta Samwel fl-aħħar mar għandu, Sawl qallu: “Jalla jbierkek Ġeħova. Jien għamilt dak li qalli Ġeħova.”
14 Imma Samwel qallu: “Allura x’inhu dan il-ħoss tan-nagħaġ u tal-baqar li qed nismaʼ?”
15 Sawl wieġbu: “Dawn ġabuhom mingħand l-Għamalekin, għaliex is-suldati ma qatlux* l-aħjar nagħaġ u baqar. Dan għamluh biex joffruhom bħala sagrifiċċju lil Ġeħova l-Alla tiegħek. Imma dak li kien fadal qridnieh għalkollox.”
16 U Samwel qal lil Sawl: “Ieqaf! Ħa ngħidlek x’qalli Ġeħova l-lejl li għadda.” Għalhekk qallu: “Tkellem!”
17 Samwel kompla: “Ma kontx int tqis lilek innifsek mhux importanti meta sirt kap tat-tribujiet t’Iżrael u meta Ġeħova għażlek* bħala re fuq Iżrael?
18 Iktar tard Ġeħova bagħtek fuq inkarigu u qallek, ‘Mur u eqred għalkollox lill-Għamalekin midinbin.* Iġġieled kontrihom sakemm tkun qridthom għalkollox.’
19 Allura għala m’obdejtx dak li qallek Ġeħova? Minflok, int ħtaft b’regħba l-affarijiet tal-għadu u għamilt dak li hu ħażin f’għajnejn Ġeħova!”
20 Madankollu, Sawl qal lil Samwel: “Imma jien obdejt dak li qalli Ġeħova! Mort fuq l-inkarigu li Ġeħova bagħatni, u ġibt lura lil Agag ir-re t’Għamalek u qridt għalkollox lill-Għamalekin.
21 Imma n-nies ħadu l-aqwa nagħaġ u baqar minn dak li kellu jinqered għalkollox biex joffruhom bħala sagrifiċċju lil Ġeħova l-Alla tiegħek f’Gilgal.”
22 Imbagħad Samwel qallu: “Jieħu gost Ġeħova bl-offerti tal-ħruq u bis-sagrifiċċji daqskemm jieħu gost b’xi ħadd li jismaʼ minnu? Li tobdi lil Ġeħova hu aħjar minn xi sagrifiċċju, u li toqgħod attent aħjar mix-xaħam tal-imtaten;
23 għax ir-ribelljoni hi l-istess bħad-dnub tat-teħbir, u l-prużunzjoni l-istess bħall-magħmul u l-idolatrija.* Talli int ċħadt il-kelma taʼ Ġeħova, hu ċaħdek milli tkun re.”
24 Imbagħad Sawl qal lil Samwel: “Dnibt għax ksirt il-kmand taʼ Ġeħova u kliemek, għax bżajt min-nies u smajt minn dak li qalu.
25 Jekk jogħġbok, aħfer id-dnub tiegħi u erġaʼ lura miegħi sabiex immil quddiem Ġeħova.”
26 Imma Samwel qal lil Sawl: “Jien mhux se nerġaʼ lura miegħek, għax int ċħadt il-kelma taʼ Ġeħova, u Ġeħova ċaħad lilek milli tibqaʼ re fuq Iżrael.”
27 Hekk kif Samwel dar biex imur, Sawl qabadlu tarf il-libsa bla kmiem, imma din iċċartet.
28 U Samwel qallu: “Illum, Ġeħova ċarrat is-saltna rjali t’Iżrael minn fuqek u se jagħtiha lil xi ħadd li hu aħjar minnek.
29 Iktar minn hekk, l-Alla Glorjuż t’Iżrael ma jigdibx jew jerġaʼ jibdielu,* għax Hu mhuwiex xi bniedem sabiex jerġaʼ jibdielu.”*
30 Għal dan qallu: “Dnibt. Imma jekk jogħġbok, onorani quddiem l-anzjani* tal-poplu tiegħi u quddiem Iżrael. Erġaʼ lura miegħi, u jien immil quddiem Ġeħova l-Alla tiegħek.”
31 Għalhekk, Samwel reġaʼ lura wara Sawl, u Sawl miel quddiem Ġeħova.
32 U Samwel qal: “Ġibu lil Agag ir-re t’Għamalek ħdejja.” Imbagħad Agag mar ħdejh kontra qalbu,* għax hu kien qed jgħid bejnu u bejn ruħu: ‘Issa żgur li mhux se joqtluni.’*
33 Madankollu Samwel qallu: “Bħalma x-xabla tiegħek ħalliet lin-nisa bla tfal, hekk ommok se titħalla bla tfal fost in-nisa.” U Samwel ta ħafna daqqiet bix-xabla lil Agag quddiem Ġeħova f’Gilgal.
34 Samwel issa telaq lejn Rama, u Sawl telaʼ lejn daru f’Gibegħa.
35 Sakemm miet, Samwel ma reġax ra lil Sawl u sewwed qalbu minħabba fih. U Ġeħova ddispjaċieh li kien għamel lil Sawl re fuq Iżrael.
Noti taʼ taħt
^ Letteralment “nidilkek.” Ara Termini tal-Bibbja Spjegati.
^ Jew “imħabba leali.” Ara Termini tal-Bibbja Spjegati.
^ Jew “urew ħniena maʼ.”
^ Jew “urew ħniena maʼ.”
^ Letteralment “dilkek.” Ara Termini tal-Bibbja Spjegati.
^ Jew “li jagħmlu d-dnub.”
^ Letteralment “l-istatwi tat-terafim,” jiġifieri l-allat tad-dar; l-idoli.
^ Jew “jiddispjaċih.”
^ Jew “jiddispjaċih.”
^ Jew forsi “fiduċjuż.”
^ Letteralment “li għadda mrar il-mewt.”
