Исто како што Бог е дух, така и ангелите се невидливи духови кои немаат „месо и коски“. Верните ангели живеат на небото и се во непосредна близина на Бог (Лука 24:39; Матеј 18:10; Јован 4:24).

Во минатото, понекогаш ангелите се појавувале во човечки облик за да извршат некоја задача од Бог. Откако ќе ја извршеле задачата, повторно се враќале во духовен облик (Судиите 6:11-23; 13:15-20).

Иако за ангелите во Библијата се зборува во машки род и на Земјата секогаш се појавувале како мажи, тие немаат пол. Ангелите не стапуваат во брак и немаат свое потомство. Освен тоа, ангелите не се луѓе кои претходно живееле на Земјата па умреле — сеедно дали како бебиња, деца или возрасни. Секој од нив бил создаден од Јехова, и затоа во Библијата се наречени синови на вистинскиот Бог (Јов 1:6; Псалм 148:2, 5).

Во Библијата се спомнуваат „човечки и ангелски јазици“, што покажува дека духовните суштества имаат свој јазик и начин на комуникација. Иако Бог понекогаш користел ангели за да комуницира со луѓето, тој забранува да ги обожаваме ангелите и да им се молиме (1. Коринќаните 13:1; Откровение 22:8, 9).

Постојат миријади миријади ангели — можеби дури и милијарди * (Даниел 7:10; Откровение 5:11).

Ангелите се „моќни во силата“, односно многу помоќни од луѓето, и имаат натчовечка интелигенција. Очигледно, можат да патуваат со неверојатна брзина која ги надминува ограничувањата на физичките закони (Псалм 103:20; Даниел 9:20-23).

Иако имаат огромни умствени способности и голема моќ, ангелите имаат свои ограничувања и не знаат сѐ (Матеј 24:36; 1. Петрово 1:12).

Ангелите биле создадени како личности со особини како Божјите и со слободна волја. Затоа, исто како луѓето, и тие можат да одберат меѓу доброто и лошото. За жал, некои ангели одбрале да го прават она што е лошо и се побуниле против Бог (Јуда 6).