1, 2. Ang’o ma Yesu notimo gi jopuonjrene 11 bang’ timo sawo mar Pasaka e higa mar 33 E.N?

EN ODHIAMBO mar Nisan 14 e higa 33 E Ndalowa. Yesu kaachiel gi jolupne oa tieko timo sawo mar Pasaka, ma paronegi kaka Nyasaye nogolo kweregi e ngima mar bedo wasumbini e piny Misri. Kata kamano mopogore gi resruok ma kweregi noyudo Misri, jopuonjre Yesu to koro ne dhi yudo “warruok mochwere.” Kinyne, Yesu ma en jatendgi maonge richo moro amora ne idhi negi e lwet wasike. Kata kamano, thoneno ne dhi kelo gweth e yo moro. Remb Yesu ne dhi bedo mise mar reso oganda dhano kuom richo gi tho.​—⁠Hib. 9:​12-​14.

² Mondo wiwa kik wil gi mich makendeni, Yesu nochako nyasi manyien ma ne dhi kawo kar Pasaka. Notimo kamano kane ong’ingo makati maok oketie thowi kae to omiyo jopuonjrene apar gachiel kowacho kama: “Ma e ringra mochiw nikech un; timuru ma, uparago.” Kamano bende nokawo kikombe moting’ divai makwar ma omiyogi kowacho niya: “Kikombeni e muma manyien kuom remba, mochuernu.”​—⁠Luka 22:⁠19, 20.

3. (a) En lokruok mane maduong’ ma ne obetie bang’ tho Yesu? (b) Gin penjo mage monego wapenjre e wi lamo mar Yesu mayudore e Johana sula mar 17?

³ Singruok mar Chik ma Nyasaye notimo gi oganda mar Jo-Israel koro ne dhi chopo e gikone. Ne idhi wile gi singruok manyien ma Jehova ne dhi timo gi jolup Yesu mowal. Yesu ok ne dwar ni jolupne obed kaka oganda mar Jo-Israel. Jo-Israelgo ok noriwore kanyachiel e lamo Nyasaye, to mano ok ne mi nying Nyasaye duong’. (Joh. 7:​45-​49; Tich 23:​6-9) Mopogore gi mano, Yesu to ne gombo ahinya mondo jolupne oti kanyachiel mondo gimi nying Nyasaye duong’. Kuom mano, Yesu notimo ang’o? Nokwayo kony kuom Wuon mare e lamo. (Ne picha  manie chak sulani.) Lamo majaberno yudore e Johana 17:​1-​26. Sama wanono lamoni, ber mondo wapenjre niya, “Be Nyasaye osedwoko lamo mar Yesu? To, be an awuon adak kaluwore gi lamono? ”

4, 5. (a) Ang’o ma wapuonjore kuom kaka Yesu nochako lamo mare? (b) Jehova nodwoko nade gima Yesu nokwayo mogik e lamo mare?

⁴ Yesu nopuonjo jopuonjrene weche mabeyo mathoth nyaka chuny otieno. Bang’ mano, nong’iyo polo malo molamo niya: “Wuora, sa osechopo; imi Wuodi duong’ mondo Wuodi omiyi duong’; nimar nimiye teko kuom ji duto mondo omi ji duto ma nimiye ngima mochwere. . . . An asemiyi duong’ e piny, asetieko tich ma nimiya ni mondo atim. To koro, A Wuora, miya duong’ ka ma intie iwuon, duong’ ma ne an go kodi ka ne piny pok obetie.”​—⁠Joh. 17:​1-5.

⁵ Yesu nochako lamo mare koketo motelo gik madongo e ngimane. Mokwongo nolemo mondo Wuon mare omi duong’. Mano emomiyo nochako lamo mare kowacho niya: “Wuonwa, nyingi mondo obed maler.” (Luka 11:2) Kae to mar ariyo, nonyiso gombo ma ne en-go mar miyo jopuonjrene “ngima mochwere.” To mogik, nokwayo mondo Wuon mare omiye duong’ e polo, duong’ ma ne en-go kane pok ochwe piny. Jehova nowinjo lamo mar Wuode, ma omiye mokalo kaka nokwayo. Ne omiye ‘nying maduong’ moloyo mag malaike duto.’​—⁠Hib. 1:4.

6. Mondo joote ne yud ngima mochwere, ne nyaka gitim ang’o, to wang’eyo nade ni ne gitimo kamano?

⁶ E lamo mareno, Yesu nowacho gima onego watim mondo wayud mich mar ngima mochwere. (Som Johana 17:3.) Nowacho ni nyaka wadhi nyime ‘ng’eyo Nyasaye kod Kristo.’ Yo achiel mwanyalo timogo mano en kuom tiyo gi wang’wa kod itwa mondo omi wapuonjre mathoth e wi Jehova kaachiel gi Wuode. Mar ariyo, onego wadag kaluwore gi gik ma wapuonjore. Noyudo joote osetimo gik moko ariyogo nikech Yesu nowacho e lamo mare kama: “Weche ma nimiya asemiyogi; kendo giserwakogi.” (Joh. 17:8) Kata kamano, mondo ne giyud ngima mochwere, ne dwarore gidhi nyime paro matut kuom weche ma Nyasaye ne wacho kendo tiyo kodgi e ngimagi mapile. Be jootego notimo kamano nyaka e giko mar ngimagi e pinyka? Adier ne gitimo kamano. Wang’eyo mano nikech moro kamoro kuom jootego ondik nyinge e kite apar gariyo maloso mise mar Jerusalem Manyien me polo.​—⁠Fwe. 21:14.

7. ‘Ng’eyo Nyasaye’ tiende en ang’o, to ang’o momiyo dwarore ni wang’eye?

⁷ Josomo molony wacho ni weche molok kowuok e dho Grik mawacho ni “ging’eyi” bende inyalo ket e yo machielo ni “med ng’eyo” kata “dhi nyime ng’eyo.” Weche ariyogi duto siro mana wach achiel maduong’ kendo giduto gidwarore. Kaluwore gi Muma mar Reference Bible, weche moler piny e wi Johana 17:3 keto wechego e yo machielo ni “mondo ging’eyi.” Kuom mano, ‘ng’eyo Nyasaye’ nyiso ni ng’ato onego dhi nyime puonjore mathoth kuome. Kata kamano, ng’eyo Nyasaye nyiso ni ng’ato onego ong’e mathoth kuome mopogore gi ng’eyo mana kite kod dwache. Ng’eyo Jehova oriwo bedo gi tudruok majaber kode koda gi Jokristo wetewa. Muma lero niya: “Ng’a ma onge hera, pok ong’eyo Nyasaye.” (1 Joh. 4:8) Kuom mano, ng’eyo Nyasaye  oriwo winje kendo luwo chikene. (Som 1 Johana 2:⁠3-5.) To mano kaka en gima jaber bedo jogo mikwano ni ong’eyo Jehova! Kata kamano wanyalo ketho winjruokwa gi Jehova mana kaka notimore ne Judas Iskariot. Weuru watim kinda mondo warit winjruok maber ma wan-go gi Jehova. Ka watimo kamano to wabiro bedo joma owinjore oyud mich mar ngima mochwere.​—⁠Math. 24:13.

‘RITGI NIKECH NYINGI’

8, 9. Kane Yesu nie piny en ang’o ma nokawo kaka gimaduong’, to en puonj mane mar Jo-Yahudi ma nokwedo?

⁸ Bang’ somo lamo mar Yesu mayudore e Johana sula 17, be wanyalo bedo gi kiawa moro amora kabe Yesu nohero ahinya jootene kaachiel gi joma moko ma ne dhi bedo jolupne bang’e? (Joh. 17:20) Ber mondo wang’e ni nitie gimachielo ma Yesu nokawo kaka gimaduong’ moloyo warruokwa. Gima noketo motelo kane ochako tije mar lendo e pinyka ne en keto nying’ Wuon mare obed maler kendo miyo nyingno duong’. Kuom ranyisi, kane en e sunagogi man Nazareth nolero gima nomiyo obiro e pinyka kane osomo bug Isaiah. Nosomo kama: “Roho mar [Jehova] ni kuoma, nikech osewira gi mo mondo ayal Wach Maber ni jo modhier.” Wan gadier ni kane Yesu osomo ndikoni, noluongo nying Jehova e yo mawinjore maler.​—⁠Luka 4:​16-​21.

⁹ Higini mang’eny kane pok Yesu obiro e piny, jotend din mar Jo-Yahudi ne puonjo ji ni kik giti gi nying Nyasaye. Wan gadier ni Yesu ne ok nyal luwo puonj machalo kamano maok osir gi ndiko. Nowacho kama ne joma ne kwede: ‘An nabiro e nying Wuora, to un ok urwaka. Ka ng’a machielo nobi e nyinge owuon, to unurwake.’ (Joh. 5:​43) Kae to kodong’ ndalo matin to otho, Yesu nonwoyo gima noketo mokwongo e ngimane ka nolamo kama: “Wuora, mi nyingi duong’.” (Joh. 12:28) Omiyo kaluwore gi lamo ma wanononi, nenore maler ni gimaduong’ ma Yesu noketo mokwongo e ngimane ne en miyo nying Wuon mare duong’.

10, 11. (a) Yesu notimo ang’o mondo okony ji ong’e nying Wuon mare? (b) Ang’o momiyo jopuonjre Yesu lando ne ji nying Jehova?

 ¹⁰ Yesu nolamo kama: “Nyingi nanyiso jogo ma nimiya e piny. Ne gin jogi, kendo nimiyagi; kendo gisemako wachni. Koro ok an e piny ka kendo, to gin e piny ka, kendo an abiro iri. Wuoro maler, iritgi gi nyingi ma nimiya, mondo gibed achiel kaka wan achiel.”​—⁠Joh. 17:⁠6, 11.

¹¹ Kane Yesu onyiso jopuonjrene nying Wuon mare, ne ok oweyo mana gi kanyo. Nokonyogi ng’eyo ni Jehova en Nyasaye machalo nade. Nopuonjogi kido mabeyo ma Jehova nigo koda hera ma oherogo dhano. (Wuok 34:​5-7) E wi mano, nikech Yesu sani en Ruoth e polo, pod odhi nyime konyo jopuonjrene mondo oland nying Jehova e piny mangima. Ang’o momiyo jopuonjrene timo kamano? En ni mondo gikony ji mang’eny opuonjre e wi Jehova kapok oketh piny marachni. To ka kindeno ochopo, Jehova biro reso joneno mage momakore kode, to mano biro miyo ogendini duto ong’e ni Jehova e Nyasaye madier!​—⁠Eze. 36:23.

12. Gin gik mage adek madwarore ni watim mondo watiek tich ma Yesu nochako mar reso ngima ji?

¹² Kane Yesu nie piny, notemo ahinya konyo jopuonjrene olo nyawo moko ma ne gin-go. Mano ne dwarore ahinya eka mondo gitiek tich ma Yesu nochako. Nolamo kama: “Kaka niora e piny, e kaka an bende naorogi e piny.” Mondo mi jopuonjrene ochop tich mar reso ngima ji e okang’ madwarore, Yesu nojiwo gik moko adek mochuno. Mokwongo, nolamo mondo jopuonjrene kik luw timbe kata kido maricho mag piny ma Satan oteloeni. Mar ariyo, nolamo mondo jopuonjrene oluw adiera mayudore e Wach Nyasaye mondo gibed joma opwodhi tiende ni joma owal. Mar adek, Yesu nokwayo ni jopuonjrene obed gi hera mondo gisik e riwruok achiel mana kaka en gi Wuon mare ne gin e winjruok achiel. Mano dwaro ni ng’ato ononre maber. Ng’ato ka ng’ato onego openjre kama, ‘Be adak kaluwore gi weche adek ma Yesu nokwayo e lamo? ’ Yesu ne ni gadier ni ka jopuonjrene otimo gik moko adekgo, to ji mang’eny ne dhi rwako wach ma gilando kendo yie ni adier Nyasaye ‘ema nooro Yesu e piny.’​—⁠Som Johana 17:⁠15-​21.

13. Jehova nodwoko nade lamo mar Yesu e kinde Jokristo mokwongo?

¹³ Ka wasomo bug Tich Joote, wanyalo neno ni Jehova nodwoko lamo mar Yesu. Kanyakla mag Jokristo mokwongo ne okikore ka moko kuomgi ne gin Jo-Yahudi, joma ok Jo-Yahudi, jomwandu gi jochan, wasumbini kaachiel gi ruodhigi. Mano ne nyalo miyo winjruok obed matek e kindgi. Kata kamano, giduto ne gin gi winjruok maber ahinya minyalo pim gi fuonni mag dend dhano ka Yesu e wigi. (Efe. 4:⁠15, 16) Winjruok ma kamano en gima chalo hono nikech wadak e piny marach mar Satan kama ji onge gi winjruok! Pak duto dok ne Jehova nikech en ema omiyo mano onyalore kokalo kuom teko mar rohone maler.​—⁠1 Kor. 3:​5-7.

14. Jehova osedwoko nade lamo mar Yesu e kindegi?

¹⁴ Gimalit en ni kane joote osetho, kuwe ma kamano norumo. Mana kaka noyudo osekor, Jokristo moko nochako ng’anyo moweyo adiera. To nikech puonj mag miriambo nodonjo e kanyakla, mano nokelo pogruok maduong’ e kind Jokristo. (Tich 20:⁠29, 30) Kata kamano, e  higa 1919, Yesu nochako choko Jokristo mowal kogologi e tuech mar dinde mag miriambo mondo oriwgi gibed e “achiel chuth.” (Kol. 3:​14, The Bible in Luo, 1976) Tij lendo ma gitimo osebedo gi nyak mane e piny mangima? ‘Rombe mamoko’ ma kwan-gi okalo milion abiriyo mawuok e “pinje duto, gi dhoudi duto, gi ogendini duto, gi dhok duto” oseriwore kanyachiel e lamo madier gi Jokristo mowalgi ka gitiyo ne Jehova. (Joh. 10:16; Fwe. 7:9) Mano en yo maber ma Jehova nodwokogo lamo mar Yesu, kane okwayo ni “piny ong’e ni niora, kendo ni niherogi kaka nihera.”​—⁠Joh. 17:23.

15. En ang’o makende ma Yesu nokwayo e lamo ne jolupne mowal?

¹⁵ E odhiambo mar Nisan 14, Yesu nomiyo jootene duong’ kane otimo kodgi singruok mar locho kode e Pinyruoth. (Luka 22:⁠28-​30; Joh. 17:22) Omiyo, nolamo ne jogo ma ne dhi bedo jolupne mowal kane owacho niya: “Wuora, adwaro mondo jogo mimiya, gin bende gibed koda ka ma antie, mondo gine duong’na ma nimiya, nikech nihera ka pok ochak chue piny.” (Joh. 17:24) Rombe mamoko mag Yesu ok nigi nyiego e wi pok ma Jokristo mowal biro yudo, kar mano gibedo mamor.

16, 17. (a) Kane otieko lamo mare, Yesu nosingo ni obiro dhi nyime timo ang’o? (b) Onego wang’ad e chunywa mar timo ang’o?

¹⁶ Ji mang’eny ok dwar yie ni Jehova nigi joge mong’eye gadier kendo tiyone ka gin e riwruok achiel. Ok gidwar yie nikech miriambo ma jotendgi mag din nyisogi. Mano bende e gima notimore e kinde mag Yesu. Kuom mano notieko lamoneno gi weche machiwo jip kowacho niya: “Wuora makare, piny ne ok ong’eyi, to an nang’eyi; kendo jogi nong’eyo ni in e ma niora. Nanyisogi nyingi, kendo nanyisgi; mondo herano miherago obedi e igi, an bende abedi e igi.”​—⁠Joh. 17:⁠25, 26.

¹⁷ Donge en adier ni Yesu nomiyo nying Wuon mare ong’ere? Ka en wi kanyakla, odhi nyime konyowa mondo waland nying kaachiel gi dwach Jehova Wuon mare. Weuru wadhi nyime bolore e bwo telo mar Yesu kuom luwo kaka ochikowa kendo lendo gi kinda. (Math. 28:⁠19, 20; Tich 10:42) E wi mano watemuru matek mondo wadong’ e riwruokwa achiel majaberni ka wan kaka jotich Nyasaye. Ka watimo magi duto, wabiro nyiso ni wadak kaluwore gi gik ma Yesu nokwayo e lamo, to mano biro miyo wami nying Jehova oyud duong’ kendo wayud mor mosiko.