Ammo Kadi ti Dios nga Agbasol da Adan ken Eva?

TALAGA a kayat a maammuan ti adu a tattao no ania ti sungbat dayta a saludsod. No mapagsasaritaan no apay nga impalubos ti Dios ti kinadakes, dagus a mapanunottayo ti panagbasol ti immuna nga agassawa idiay hardin ti Eden. Ti ideya nga ‘ammo ti Dios amin a bambanag’ ti makagapu nga ipapan ti dadduma a nasaksakbay nga ammo ti Dios nga agsukir kenkuana da Adan ken Eva.

No pudno nga ammo idin ti Dios nga agbasol ti perpekto nga agassawa, ania ti ipasimudaag daytoy? Ti kasta a kapanunotan pagparangenna nga awan panagayat ti Dios, saan a nainkalintegan, ken ulbod. Mabalin nga ibilang ti dadduma a kinaulpit ti panangsubok ti Dios iti immuna nga agassawa iti banag nga ammona a dakes ti pagtungpalanna. No kasta, agparang a manungsungbat ti Dios wenno adda pay ketdi pakainaiganna iti amin a kinadakes ken panagsagaba iti intero a pakasaritaan ti tao. Ipagarup pay ketdi ti dadduma a maag ti Namarsua.

Ti kadi kasta a negatibo a deskripsion ket maitunos iti panangiladawan ti Kasuratan ken Jehova a Dios? Tapno masungbatan dayta, usigentayo ti kunaen ti Biblia maipapan kadagiti parsua ni Jehova ken ti personalidadna.

“Nasayaat Unay Dayta”

Maipapan kadagiti parsua ti Dios, agraman ti immuna a tattao ditoy daga, kuna ti salaysay ti Genesis: “Nakita ti Dios ti isuamin nga inaramidna ket, adtoy! nasayaat unay dayta.” (Genesis 1:31) Perpekto ti pannakaaramid da Adan ken Eva, a maibagay unay iti aglawlawda. Awan a pulos ti pilawda. Yantangay naparsuada a “nasayaat unay,” kabaelanda la ketdi ti mangipakita iti naimbag a kababalin a nakalikaguman kadakuada. Naparsuada iti “ladawan ti Dios.” (Genesis 1:27) Kabaelanda ngarud nga iparangarang dagiti kualidad ti Dios a kas iti sirib, nasungdo nga ayat, kinahustisia, ken kinaimbag. Ti panangiparangarangda iti kasta a kualidad makatulong kadakuada nga agdesision iti banag a pakagunggonaanda ken mangparagsak iti nailangitan nga Amada.

Dagitoy a perpekto ken nasaririt a parsua ket pinaraburan ni Jehova iti wayawaya nga agpili. Saan ngarud a naiprograma nga agtungpalda lattan iti Dios a kas iti robot. Panunotem: Ania ti kaykayatmo, ti sagut a nakayugalian laeng a naited wenno ti sagut a naggubuay iti puso? Nabatad ti sungbat. Kasta met, ad-adda a maragsakan ti Dios no siwawaya a pilien da Adan ken Eva ti agtulnog Kenkuana. Gapu iti wayawayada nga agpili, nalaklaka para iti immuna a pagassawaan ti siaayat nga agtulnog ken Jehova.​—Deuteronomio 30:19, 20.

Nalinteg, Nainkalintegan, ken Naimbag

Ipalgak kadatayo ti Biblia dagiti kualidad ni Jehova. Gapu kadagitoy a kualidad, awan ti aniaman a pakainaiganna iti basol. Ni Jehova ket “managayat iti kinalinteg ken kinahustisia,” kuna ti Salmo 33:5. Kuna ngarud ti Santiago 1:13: “Iti dakes a bambanag saan a mabalin a suoten ti Dios ket isu saanna met a suoten ti asinoman.” Gapu ta nakonsiderasion ken nainkalintegan ti Dios, impakdaarna ken Adan: “Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.” (Genesis 2:16, 17) Ti umuna a pagassawaan mabalin a pilienda ti biag nga awan inggana wenno ti ipapatay. Saan kadi nga agparang nga aginkukuna laeng ti Dios no  pakdaaranna ida maipapan iti espesipiko a basol idinto ta ammonan a dakes ti pagtungpalanda? Kas “managayat iti kinalinteg ken kinahustisia,” saan a maikanatad a mangitukon ti Dios iti pagpilian no awan met a talaga dayta.

Naruay met ti kinaimbag ni Jehova. (Salmo 31:19) Umanamong iti dayta ni Jesus ket kinunana: “Siasino ti tao nga adda kadakayo a kenkuana ti anakna dumawat iti tinapay​—iyawatannanto kadi iti bato? Wenno, nalabit, dumawatto iti ikan​—iyawatannanto kadi iti serpiente? Gapuna, no dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, [saan kadi] a nangnangruna pay a kasta a ni Amayo nga adda iti langlangit mangted iti naimbag a bambanag kadagidiay agdawdawat kenkuana?” (Mateo 7:9-11) Ipapaayan ti Dios iti “naimbag a bambanag” dagiti parsuana. Makuna a naimbag ti Dios ta naisangsangayan ti panangparsuana iti tao ken nangisagana iti Paraiso a pagtaenganda. Ti kadi kasta a naimbag nga Agturay mangted iti napintas a pagtaengan no ammona a mapukawto met laeng? Sigurado a saan. No kasta, saan a mapabasol ti nalinteg ken naimbag a Namarsua kadatayo iti panagsukir ti tao.

Kakaisuna a “Masirib”

Ipakita met ti Kasuratan a ni Jehova ti kakaisuna a “masirib.” (Roma 16:27) Nasaksian ti adu nga anghel ti Dios idiay langit ti adu a pannakaiparangarang ti awan inggana a siribna. Nangrugida a “nagdir-i buyogen ti panangpadayaw” idi pinarsuana ti bambanag ditoy daga. (Job 38:4-7) Sigagagar la ketdi a pinadpadaanan dagitoy a nasaririt nga espiritu dagiti pasamak iti hardin ti Eden. Gapuna, kalpasan a pinarsuana ti makapaamanga nga uniberso ken adu a nakaskasdaaw a parsua, nainkalintegan kadi para iti masirib a Dios a mangaramid iti dua a naisangsangayan a parsua iti imatang dagiti anghel nga annakna nupay ammonan nga agbasoldanto? Nalawag a kinamaag ti panangplano iti kasta a dakes a pagtungpalan.

Kaskasdi, mabalin nga adda agkuna, ‘Kasano koma a saan nga ammo dayta ti kasisiriban a Dios?’ Siempre, karaman iti naindaklan a sirib ni Jehova ti pannakabaelna a mangammo iti ‘pagnguduan manipud pay idi punganay.’ (Isaias 46:9, 10) Nupay kasta, saan nga obligado a mangusar iti daytoy a pannakabalin, no kasano a saan a kasapulan nga usarenna a naan-anay ti nakabilbileg a pannakabalinna. Nainsiriban nga ikeddeng ni Jehova no kaanona nga usarenna ti pannakabaelna a mangammo iti masanguanan. Usarenna dayta no talaga a kasapulan ken no maikanatad.

Mayarig dayta iti maysa a tao nga agbuya iti nairekord a paay-ayam a mabalinna a pilien dagiti maudi a minuto tapno mabuyana ti pagtungpalan ti ay-ayam. Ngem saan a masapul a kasta ti aramidenna. Adda kadi mangbabalaw kenkuana no ikeddengna a buyaen ti intero nga ay-ayam manipud rugi? Umasping iti dayta, nabatad nga inkeddeng ti Namarsua a saanna a kitaen ti pagtungpalan ti bambanag. Imbes ketdi, pinilina nga urayen no ania ti aramiden dagiti naindagaan nga annakna.

Kas nadakamaten, ti masirib a Dios a ni Jehova saanna a pinarsua dagiti immuna a tao a kasla kadagiti robot, a naiprograma ti amin nga aramidenda. Imbes ketdi, siaayat nga impaayanna ida iti wayawaya nga agpili. No pilienda ti umiso, maiparangarangda ti ayat, panagyaman, ken panagtulnogda, a dayta ti mangnayon iti ragsakda kasta met ken Jehova a nailangitan nga Amada.​—Proverbio 27:11; Isaias 48:18.

Ipakita ti Kasuratan a saan a kanayon nga aramaten ti Dios ti pannakabaelna a mangammo iti masanguanan. Kas pagarigan, idi idaton koman ni matalek nga Abraham ti anakna, imbaga ni Jehova: “Ita ammokon a managbutengka iti Dios ta saanmo nga impaidam kaniak ti anakmo,  ti kakaisuna kenka.” (Genesis 22:12) Iti sabali a bangir, adda met dagiti gundaway a ‘nasaktan ti rikna’ ti Dios gapu iti dakes nga aramid ti sumagmamano a tattao. Nasaktan ngata ti riknana no nabayagen nga ammona ti aramidenda?​—Salmo 78:40, 41; 1 Ar-ari 11:9, 10.

Nainkalintegan laeng ngarud a kunaen a ti kasisiriban a Dios saanna nga inusar ti pannakabaelna a mangammo no agbasol dagiti umuna a nagannaktayo. Saan a maag a mangaramid iti kasta nga awan mamaayna a tignay, no ammona la ngaruden ti dakes a pagbanaganna.

“Ti Dios ket Ayat”

Ni Satanas a kabusor ti Dios inrugina ti iyaalsa idiay Eden a nagtungpal iti kinadakes, a pakairamanan ti basol ken ipapatay. “Mammapatay” ngarud ni Satanas. Isu ket “managulbod ken ti ama ti kinaulbod.” (Juan 8:44) Gapu iti dakes a motibona, pinagparangna nga adda dakes a motibo ti naayat a Namarsua kadatayo. Iti kasta, kayatna nga ipabasol ken Jehova ti basol ti tao.

Gapu iti kualidad ni Jehova nga ayat, pinilina a saan a nasakbay nga ammuen no agbasol da Adan ken Eva. Ayat ti kangrunaan a galad ti Dios. “Ti Dios ket ayat,” kuna ti 1 Juan 4:8. Ti ayat ket positibo, saan a negatibo. Naimbag a bambanag ti kitaenna iti sabali a tattao. Wen, gapu iti ayat ni Jehova a Dios, kayatna a naimbag ti kasasaad dagiti umuna nga agassawa.

Nupay adda posibilidadna a dagiti natauan nga annak ti Dios pilienda ti di nainsiriban a desision, di naawanan iti namnama ti naayat a Diostayo ken saan met a nagsuspetsa kadagiti perpekto a parsuana. Impaayna ti amin a kasapulanda ken impakaammona ti amin a kasapulan a maammuanda. Mayanatup laeng nga inanamaen ti Dios nga agtulnogda gapu ti ayatda Kenkuana, imbes nga agsukirda. Ammona a kabaelan da Adan ken Eva ti agbalin a nasungdo, a pinaneknekan uray met dagiti imperpekto a tattao idi agangay, kas kada Abraham, Job, Daniel, ken adu a dadduma pay.

Kinuna ni Jesus: “Iti Dios amin a bambanag mabalin.” (Mateo 19:26) Makaliwliwa dayta a sasao. Gapu iti ayat ni Jehova, agraman ti dadduma pay a kangrunaan a galadna a kinahustisia, sirib, ken pannakabalin, manamnama nga iti naituding a tiempo ikkatennanto ti amin nga epekto ti basol ken ipapatay.​—Apocalipsis 21:3-5.

Nalawag ngarud a saan a nasaksakbay nga ammo ni Jehova nga agbasol dagiti umuna nga agassawa. Nupay nasaktan ti rikna ti Dios iti isusukir ti tao ken iti imbungana a panagsagaba, ammona a daytoy a temporario a situasion ket saan a makalapped iti pannakatungpal ti agnanayon a panggepna iti daga ken kadagiti tattao. Apay a saanmo nga ammuen ti ad-adu pay maipapan iti dayta a panggep ken no kasano a magunggonaanka iti nadayag a kaitungpalanna? a

[Footnote]

[Blurb iti panid 14]

Saan a pinarsua ni Jehova dagiti immuna a tao a kas kadagiti robot a naiprograma ti amin nga aramidenda

[Blurb iti panid 15]

Ammo ti Dios a kabaelan da Adan ken Eva ti agbalin a nasungdo