Numeros 23:1-30
23 Kalpasanna, kinuna ni Balaam ken ni Balak: “Mangibangonka iti daytoy a disso iti pito nga altar,+ ken iyalaannak iti pito a kalakian a baka ken pito a kalakian a karnero.”
2 Dagus nga inaramid ni Balak ti imbaga ni Balaam. Nangidaton da Balak ken Balaam iti baka ken karnero iti tunggal altar.+
3 Kinuna ni Balaam ken ni Balak: “Agbatika ditoy iti abay ti datonmo a mapuoran, ta mapanak sadiay. Bareng makisarita kaniak ni Jehova. Ibagakto kenka ti aniaman nga ibagana.” Napan ni Balak iti maysa a kalbo a turod.
4 Nakisarita ti Dios ken ni Balaam,+ ket kinuna ni Balaam: “Nangibangonak iti pito a naintar nga altar, ken nangidatonak iti baka ken karnero iti tunggal altar.”
5 Inkabil ni Jehova daytoy a sao iti ngiwat ni Balaam:+ “Agsublika ken Balak, ket kastoy ti ibagam.”
6 Gapuna, nagsubli ket nakitana ni Balak ken ti amin a prinsipe ti Moab a nakatakder iti abay ti datonna a mapuoran.
7 Imbagana daytoy a mensahe:+
“Ni Balak nga ari ti Moab pinaayabannak idiay Aram,+Manipud iti kabambantayan iti daya:
‘Umaymo ilunod ni Jacob para kaniak.
Wen, umaymo kondenaren ti Israel.’+
8 Kasanok koma nga ilunod dagidiay saan nga inlunod ti Dios?
Ken kasanok koma a kondenaren dagidiay saan a kinondenar ni Jehova?+
9 Manipud iti tuktok ti kabatuan makitkitak ida,Manipud iti katurturodan maim-imatangak ida.
Agnanaedda sadiay kas maysa nga ili;+Ibilangda ti bagbagida a naiduma kadagiti nasion.+
10 Asino ti makabilang iti kaputotan ni Jacob a kas kaadu ti tapok+Wenno makabilang iti apagkapat laeng ti Israel?
Matayak koma a kas kadagiti nalinteg,Ken pumusayak a kas kadakuada.”
11 Kinuna ni Balak ken ni Balaam: “Ania daytoy nga inaramidmo? Pinaayabanka tapno ilunodmo dagiti kabusorko, ngem binendisionam met ida.”+
12 Insungbat ni Balaam: “Saan aya a ti laeng inkabil ni Jehova iti ngiwatko ti ibagak?”+
13 Kinuna ni Balak: “Pangngaasim ta kumuyogka kaniak iti sabali a disso a pakakitaam kadakuada. Manmano laeng ti makitam kadakuada sadiay; saanmonto a makita amin ida. Ilunodmo ida sadiay para kaniak.”+
14 Gapuna, impanna ni Balaam iti maysa a tanap idiay Zofim, iti tuktok ti Pisga.+ Nangibangon sadiay iti pito nga altar ken nangidaton iti baka ken karnero iti tunggal altar.+
15 Kinuna ni Balaam ken ni Balak: “Agbatika ditoy iti abay ti datonmo a mapuoran ta mapanak makisarita iti Dios.”
16 Nakisarita ni Jehova kenkuana ket inkabilna daytoy a sao iti ngiwat ni Balaam:+ “Agsublika ken Balak, ket kastoy ti ibagam.”
17 Gapuna, nagsubli ket nakitana ni Balak nga agur-uray iti abay ti datonna a mapuoran, ket kaduana dagiti prinsipe ti Moab. Insaludsod ni Balak: “Ania ti imbaga ni Jehova?”
18 Imbagana daytoy a mensahe:+
“Tumakderka, Balak, ket dumngegka.
Denggennak, O anak ni Zipor.
19 Ti Dios ket saan a tao nga agulbod,+Saan a kas iti anak ti tao nga agbaliw ti panunotna.*+
Aramidenna ti aniaman nga ibagana,
Tungpalenna ti saona.+
20 Imbaonnak a mangbendision;Binendisionanna ida,+ ket saanko a mabalin a babawyen.+
21 Saanna a pagballigien ti aniaman a panagsalamangka maibusor ken Jacob,Saanna nga ipalubos ti aniaman a didigra maibusor iti Israel.
Adda kadakuada ni Jehova a Dios,+Ken ipukpukkawda nga isu ti arida.
22 Inruar ida ti Dios manipud Egipto.+
Para kadakuada, kayariganna dagiti sara ti atap a kalakian a baka.+
23 Ta awan ti lunod a maibusor ken Jacob,+Wenno aniaman a panagbuyon maibusor iti Israel.+
Ita, maikuna dagiti tattao maipapan ken Jacob ken iti Israel:
‘Kitaenyo ti inaramid ti Dios!’
24 Kasla leon a bumangonto daytoy a nasion,Ket tumakderto a kas iti leon.+
Saanto nga agidda agingga a makanna ti inanupnaKen mainumna ti dara dagiti napapatayna.”
25 Kinuna ni Balak ken ni Balaam: “No saanmo a kabaelan nga ilunod ti Israel, saanmo koma met a bendisionan.”
26 Insungbat ni Balaam: “Saan kadi nga imbagak kenka nga aramidek ti amin nga imbaga ni Jehova?”+
27 Kinuna ni Balak: “Kumuyogka koma kaniak iti sabali pay a lugar. Bareng ipalubosen ti pudno a Dios nga ilunodmo ida sadiay para kaniak.”+
28 Gapuna, inkuyog ni Balak ni Balaam idiay tuktok ti Peor, a sumango iti Jesimon.*+
29 Iti kasta, kinuna ni Balaam ken ni Balak: “Mangibangonka iti daytoy a disso iti pito nga altar, ken iyalaannak iti pito a kalakian a baka ken pito a kalakian a karnero.”+
30 Inaramid ni Balak ti imbaga ni Balaam, ket nangidaton iti baka ken karnero iti tunggal altar.
