Ester 9:1-32
9 Dimteng ti maika-13 nga aldaw ti maika-12 a bulan a maawagan iti Adar*+ a pannakaipatungpal ti bilin ti ari ken ti lintegna.+ Dayta ti aldaw nga inur-uray dagiti kabusor a mangparmek kadagiti Judio. Ngem baliktad ti napasamak ta inabak dagiti Judio dagiti kabusorda.+
2 Naguummong dagiti Judio kadagiti siudadda iti amin a probinsia a sakup ni Ari Ahasuero+ tapno darupenda dagidiay mangdangran kadakuada. Awan ti makaitured a lumaban kadakuada ta kabuteng ida ti amin a tattao.+
3 Amin a prinsipe kadagiti probinsia,* dagiti satrapa,+ gobernador, ken agserserbi iti ari timmulongda kadagiti Judio, ta kabutengda ni Mardokeo.
4 Nagbalin a nabileg ni Mardokeo+ iti balay* ti ari, ket nagdindinamag iti amin a probinsia,* gapu ta nagtultuloy a bimmileg.
5 Kinabil dagiti Judio ti amin a kabusorda babaen ti espada, ket pinapatay ken dinadaelda ida. Inaramidda ti aniaman a kayatda kadagiti manggurgura kadakuada.+
6 Iti kastilio* ti Susan,*+ 500 a lallaki ti pinapatay dagiti Judio.
7 Pinapatayda met da Parsandata, Dalfon, Aspata,
8 Porata, Adalia, Aridata,
9 Parmasta, Arisai, Aridai, ken Vaizata,
10 ti 10 nga annak ni Haman nga anak ni Hamedata, a kabusor dagiti Judio.+ Ngem awan ti sinamsamda kalpasan a pinapatayda ida.+
11 Iti dayta nga aldaw, naipadamag iti ari ti bilang dagiti napapatay iti kastilio* ti Susan.*
12 Kinuna ti ari ken ni Reyna Ester: “Iti kastilio* ti Susan,* pinapatay dagiti Judio ti 500 a lallaki ken ti 10 nga annak ni Haman. Amangan no nakarkaro pay ti inaramidda kadagiti probinsia a sakup ti ari!+ Ibagam ti kiddawmo ket patgakto. Ania pay ti kayatmo? Matungpalto dayta.”
13 Simmungbat ni Ester: “No pagayatan ti ari,+ mapalubosan koma dagiti Judio iti Susan* a mangaramid manen inton bigat ti kas iti inaramidda ita nga aldaw maitunos iti linteg;+ ket maibitin koma iti kayo ti 10 nga annak ni Haman.”+
14 Imbilin ngarud ti ari a maaramid dayta. Naipaulog ti linteg iti Susan,* ket naibitin ti 10 nga annak ni Haman.
15 Naguummong manen dagiti Judio nga adda iti Susan* iti maika-14 nga aldaw ti bulan ti Adar+ ket 300 a lallaki ti napapatayda, ngem awan ti sinamsamda.
16 Naguummong met dagiti Judio kadagiti probinsia a sakup ti ari ket sinalaknibanda ti bagbagida.+ Nakilabanda kadagiti kabusorda+ ket 75,000 ti napapatayda, ngem awan ti sinamsamda.
17 Napasamak daytoy iti maika-13 nga aldaw iti bulan ti Adar. Iti maika-14 nga aldaw, insardengdan ti makilaban ket nagselebrar ken nagragragsakda.
18 Naguummong met dagiti Judio nga adda iti Susan* iti maika-13+ ken maika-14 nga aldaw.+ Iti maika-15 nga aldaw, insardengdan ti makilaban ket nagselebrar ken nagragragsakda.
19 Dayta ti makagapu a dagiti Judio iti babassit nga ili pinagbalinda ti maika-14 nga aldaw iti bulan ti Adar kas aldaw ti panagraragsak, panagrarambak,+ ken panagririnnanud iti taraon.+
20 Inrekord ni Mardokeo+ dagitoy a pasamak ken pinatulodanna iti surat ti amin a Judio iti amin a probinsia a sakup ni Ari Ahasuero, asideg man wenno adayo.
21 Imbilinna a tinawen a selebraranda ti maika-14 ken maika-15 nga aldaw iti bulan ti Adar,
22 gapu ta kadagita nga aldaw, insardeng dagiti Judio ti makilaban kadagiti kabusorda, ken iti dayta a bulan, nasuktan ti rigatda iti rag-o ken ti ladingitda+ iti ragsak. Sinelebraranda dagita nga aldaw babaen ti panagraragsak, panagririnnanud iti taraon, ken panangsagut kadagiti napanglaw.
23 Immanamong dagiti Judio a mangitultuloy iti daytoy a selebrasion nga inrugida a selebraran kas iti insurat kadakuada ni Mardokeo,
24 ta ni Haman+ nga anak ni Hamedata nga Agageo,+ ti kabusor ti amin a Judio, pinanggepna a papatayen dagiti Judio+ ken nagaramid iti Pur,+ kayatna a sawen, Binnunot, tapno agbutengda ken mapapatayda amin.
25 Ngem idi napan ni Ester iti ari, nangted ti ari iti naisurat a bilin a kastoy ti linaonna:+ “Lak-amenna koma ti dakes a pinanggepna kadagiti Judio”;+ ket naibitay ni Haman ken dagiti annakna.+
26 Dayta ti makagapu nga inawaganda dagitoy nga aldaw iti Purim, a nagtaud iti sao a Pur.*+ Gapu iti amin nga insurat ni Mardokeo ken iti nakitada ken iti napasamak kadakuada,
27 immanamong dagiti Judio ken dagiti kaputotanda ken ti amin a kimmadua kadakuada+ a masapul a selebraranda dagitoy dua nga aldaw ken tungpalenda ti naibilin kadakuada iti naikeddeng a tiempo iti tunggal tawen.
28 Dagitoy nga aldaw ket masapul a laglagipen ken selebraran ti tunggal henerasion ken pamilia, ken kadagiti probinsia* ken siudad. Masapul a saan a liwayan a selebraran dagiti Judio dagitoy nga aldaw ti Purim ken saan nga agsardeng dagiti kaputotanda a manglaglagip kadagita.
29 Kalpasanna, ni Reyna Ester nga anak ni Abihail, ken ni Mardokeo a Judio inusarda ti autoridadda a mangpatalged iti maikadua a surat maipapan iti Purim.
30 Dagitoy a surat a naglaon iti talna ken kinapudno ket naipatulod iti amin a Judio iti 127 a probinsia*+ iti pagarian ni Ahasuero,+
31 tapno mapatalgedan ti pannakalaglagip dagiti aldaw ti Purim iti naikeddeng a tiempo, kas imbilin ni Mardokeo a Judio ken ni Reyna Ester,+ nga inanamongan a tungpalen dagiti Judio ken dagiti kaputotanda,+ nga agayunar+ ken agpakpakaasida.+
32 Ti bilin ni Ester ti nangpatalged kadagitoy a banag mainaig iti Purim,+ ket naisurat dayta iti libro.
Footnotes
^ Wenno “masakupan a distrito.”
^ Wenno “palasio.”
^ Wenno “masakupan a distrito.”
^ Wenno “palasio.”
^ Wenno “Susa.”
^ Wenno “palasio.”
^ Wenno “Susa.”
^ Wenno “palasio.”
^ Wenno “Susa.”
^ Wenno “Susa.”
^ Wenno “Susa.”
^ Wenno “Susa.”
^ Wenno “Susa.”
^ Ti “Pur,” kaipapananna ti “Binnunot.” Ti pang-adu a porma a “Purim” ket awag iti piesta dagiti Judio a maselebraran iti maika-12 a bulan ti sagrado a kalendario. Kitaem ti App. B15.
^ Wenno “masakupan a distrito.”
^ Wenno “masakupan a distrito.”
