Ester 5:1-14
5 Iti maikatlo nga aldaw,+ insuot ni Ester ti badona kas reyna ket nagtakder iti makin-uneg a paraangan a kabatog ti balay* ti ari. Nakatugaw idi ti ari iti tronona a nakasango iti pagserkan.
2 Naragsakan ti ari idi makitana ni Reyna Ester a nakatakder iti paraangan, isu nga impaturongna ken Ester ti ig-iggamanna a balitok a setro.+ Immasideg ni Ester ket sinagidna ti murdong ti setro.
3 Dinamag ti ari: “Ania ti masapulmo, Reyna Ester? Ania ti kiddawmo? Itedko uray ti kagudua ti pagariak!”
4 Insungbat ni Ester: “No pagayatan ti ari, umaykayo koma ken Haman+ ita nga aldaw iti okasion nga insaganak para kadakayo.”
5 Gapuna, kinuna ti ari kadagiti adipenna: “Ibagayo ken Haman nga umay a dagus, kas kiniddaw ni Ester.” Iti kasta, napan ti ari ken ni Haman iti okasion nga insagana ni Ester.
6 Bayat nga umin-inumda iti arak, kinuna ti ari ken ni Ester: “Ibagam ti kiddawmo ket patgakto! Ania ti kayatmo? Itedko uray ti kagudua ti pagariak!”+
7 Insungbat ni Ester: “Daytoy ti kiddawko,
8 No pagayatan ken pakaragsakan ti ari a patgan ti kiddawko, umaykayo koma ken Haman iti okasion nga isaganak para kadakayo inton bigat; ket ibagakto ti kiddawko.”
9 Iti dayta nga aldaw, rimmuar ni Haman a nakaragragsak ken maay-ayatan. Ngem idi nakitana ni Mardokeo iti ruangan ti palasio ti ari a saan a timmakder ken saan a nagbuteng kenkuana, nakaro ti pungtotna ken Mardokeo.+
10 Ngem nagteppel ni Haman ket napan iti balayna sa pinaayabanna dagiti gagayyemna ken ni Zeres+ nga asawana.
11 Impangas ni Haman ti adu a kinabaknangna, ti adu nga annakna,+ ken ti panangitan-ok ti ari iti saadna a nangatngato ngem kadagiti prinsipe ken adipen ti ari.+
12 Kinuna pay ni Haman: “Saan la a dayta, siak laeng ken ti ari ti inawis ni Reyna Ester iti okasion nga insaganana.+ Ket naawisak manen a kumadua iti ari ken reyna inton bigat.+
13 Ngem awan serserbi amin dagita no makitkitak ti Judio a ni Mardokeo a nakatugaw iti ruangan ti palasio ti ari.”
14 Kinuna ni Zeres nga asawana ken ti amin a gagayyemna: “Agpaaramidka iti pagbitayan a 50 a kasiko* ti kangatona. Inton bigat, ibagam iti ari a maibitay iti dayta ni Mardokeo.+ Kalpasanna, kaduaem ti ari ket agragsakka.” Nagustuan ni Haman ti suhestion, ket nagpaaramid iti pagbitayan.
