Ester 7:1-10
7 Iti kasta, napan ti ari ken ni Haman+ iti okasion nga insagana ni Reyna Ester.
2 Iti maikadua nga aldaw, bayat nga umin-inumda iti arak, dinamag manen ti ari ken ni Ester: “Ibagam ti kayatmo, Reyna Ester, ket patgakto! Ania ti kiddawmo? Itedko uray ti kagudua ti pagariak!”+
3 Insungbat ni Reyna Ester: “No pagayatam ken pagragsakam, O ari, kiddawek a maispal koma ti biagko* ken dagiti kailiak.+
4 Ta nailakokami+ ken dagiti kailiak tapno maibus, mapapatay, ken madadael.+ No nailakokami laeng kas adipen, agulimekak koma lattan. Ngem saan koma a mapasamak daytoy a didigra ta pagdaksan met ti ari.”
5 Insaludsod ni Ari Ahasuero ken ni Reyna Ester: “Asino ti nakaitured a nangaramid iti kasta? Sadino ti ayanna?”
6 Insungbat ni Ester: “Ti kalaban ken kabusor ket daytoy dakes a Haman.”
Kasta unay ti buteng ni Haman iti ari ken iti reyna.
7 Sipupungtot a timmakder ti ari, pimmanaw iti pagiinuman iti arak, sa napan iti hardin ti palasio, ngem narikna ni Haman a desidido ti ari a mangdusa kenkuana isu a timmakder ket nagpakpakaasi ken Reyna Ester a maispal koma ti biagna.*
8 Idi nagsubli ti ari manipud iti hardin ti palasio, nakitana ni Haman a nakarukob iti sopa ni Ester. Impukkaw ti ari: “Ramesenna met kadi ti reyna iti mismo a balayko?” Apaman a naisao daytoy ti ari, naabbungotan ti rupa ni Haman.
9 Kinuna ni Harbona,+ a maysa kadagiti opisial ti palasio ti ari: “Adda pay inaramid ni Haman a pagbitayan a 50 a kasiko* ti kangatona iti asideg ti balayna tapno adda pangibitayanna ken Mardokeo+ a nangispal iti biagmo.”+ Iti kasta, imbilin ti ari: “Ibitayyo sadiay ni Haman.”
10 Imbitayda ngarud ni Haman iti pagbitayan nga insaganana para ken Mardokeo, ket bimmaaw ti pungtot ti ari.
