Ester 4:1-17
4 Idi naammuan ni Mardokeo+ ti amin a napasamak,+ pinisangna dagiti badona ket nangisuot iti nakersang a lupot ken winarsianna ti bagina iti dapdapo. Napan iti tengnga ti siudad a nagsangsangit.
2 Ngem nagpatingga laeng iti ruangan ti palasio ti ari, ta awan idi ti mapalubosan a sumrek a nakabado iti nakersang a lupot.
3 Kadagiti met probinsia*+ a nakaidanonan ti bilin ti ari, napalalo ti panagladingit dagiti Judio, nagay-ayunar,+ nagsangsangit, ken nagdungdung-awda. Adu kadakuada ti nagidda iti nakersang a lupot ken dapdapo.+
4 Nariribukan unay ni Reyna Ester idi impadamag daytoy dagiti adipenna a babbai ken dagiti eunuko nga agserserbi kenkuana. Nangipatulod kadagiti bado ken Mardokeo tapno suktanna ti nakersang a lupotna, ngem saanna nga inawat.
5 Gapuna, pinaayaban ni Ester ni Hatac, a maysa kadagiti eunuko ti ari ken nadutokan nga agserbi iti reyna, ket binilinna a mapan ken Mardokeo tapno ammuenna no ania ti mapaspasamak.
6 Napan ni Hatac iti ayan ni Mardokeo iti plasa ti siudad iti sanguanan ti ruangan ti palasio ti ari.
7 Imbaga ni Mardokeo ti amin a napasamak kenkuana ken ti gatad+ nga inkari ni Haman nga ited iti pagidulinan iti gameng ti palasio tapno mapapatay dagiti Judio.+
8 Intedna pay ken Hatac ti kopia ti bilin a naipaulog iti Susan*+ a mapapatay ti amin a Judio. Indawatna ken Hatac nga ipakita ken ilawlawagna dayta ken Ester+ ken ibagana a mapan agpakaasi ni Ester iti ari para kadagiti kailianna.
9 Nagsubli ni Hatac ket imbagana ken Ester ti kinuna ni Mardokeo.
10 Kastoy ti imbilin ni Ester nga ibaga ni Hatac ken ni Mardokeo:+
11 “Ammo ti amin nga adipen ti ari ken dagiti umili kadagiti masakupanna a probinsia nga adda linteg a mapapatay ti asinoman a lalaki wenno babai a sumrek iti makin-uneg a paraangan ti ari+ a saan a naayaban, malaksid no ipaturong kenkuana ti ari ti balitok a setrona.+ Ket ita, 30 nga aldawen a dinak pinaayaban ti ari.”
12 Idi naibaga dayta ken Mardokeo,
13 insungbatna ken Ester: “Dimo ipapan a saanka a mairaman iti mapasamak iti amin a Judio gapu laeng ta addaka iti sangakabbalayan ti ari.
14 No agulimekka ita, addanto sabali a tumulong ken mangispal kadagiti Judio,+ ngem mataykanto ken dagiti kakabagiam. Dimo la ammo amangan no nagbalinka a reyna para iti daytoy a panggep!”+
15 Insungbat ni Ester ken Mardokeo:
16 “Ummongem ti amin a Judio nga adda iti Susan* ket agayunarkayo+ maigapu kaniak. Dikay mangan wenno uminum iti tallo nga aldaw+ ken tallo a rabii. Agayunarakto met agraman dagiti adipenko a babbai. Mapanakto iti ari uray no maikontra iti linteg. Ket no masapul a matayak, matayak.”
17 Gapuna, pimmanaw ni Mardokeo ket inaramidna ti amin nga imbilin ni Ester.
