Ester 6:1-14
-
Pinadayawan ti ari ni Mardokeo (1-14)
6 Iti dayta a rabii, saan a makaturog ti ari.* Isu nga impaalana ti libro dagiti pakasaritaan ti paspasamak,+ ket naibasa dayta kenkuana.
2 Iti maysa a paset ti libro, naibasa ti pannakatakuat ni Mardokeo iti plano da Bigtan ken Teres a mangpapatay* ken Ari Ahasuero. Dagitoy ket dua nga opisial ti palasio ti ari ken parabantay iti ruangan.+
3 Dinamag ti ari: “Napadayawan ken nagunggonaan kadi ni Mardokeo iti dayta nga inaramidna?” Insungbat dagiti katulongan ti ari: “Awan ti naipaay kenkuana.”
4 Kalpasanna, kinuna ti ari: “Asino ti adda iti paraangan?” Apagisu a simrek ni Haman iti makinruar a paraangan+ ti balay* ti ari tapno kiddawenna iti ari a mabitay ni Mardokeo iti insaganana a pagbitayan.+
5 Imbaga dagiti katulongan ti ari: “Ni Haman+ ti sitatakder iti paraangan.” Kinuna ti ari: “Pastrekenyo.”
6 Idi nakastrek ni Haman, dinamag ti ari: “Ania ti masapul a maaramid iti lalaki a kayat a padayawan ti ari?” Pinampanunot ni Haman: “Asino pay koma ti kayat ti ari a padayawan no di siak?”+
7 Kinuna ni Haman iti ari: “Ti lalaki a kayat a padayawan ti ari ket
8 makawesan koma iti bado ti ari+ ken maisakay iti kabalio a naarkosan ti ulona ken pagsaksakayan ti ari.
9 Maysa koma kadagiti mararaem a prinsipe ti ari ti mangasikaso iti bado ken kabalio, ket masapul a kawesan dagiti adipen ti lalaki a kayat a padayawan ti ari ken pagsakayenda iti kabalio sa maiparada iti plasa ti siudad. Masapul nga ipukkawda: ‘Kastoy ti maaramid iti lalaki a kayat a padayawan ti ari!’”+
10 Dagus a kinuna ti ari ken Haman: “Darasem! Alaem ti bado ken ti kabalio, ket aramidem ti imbagam iti Judio a ni Mardokeo a nakatugaw iti ruangan ti palasio ti ari. Siguraduem a maaramid amin dayta.”
11 Innala ngarud ni Haman ti bado ken ti kabalio. Kinawesanna ni Mardokeo+ ken pinagsakayna iti kabalio sa imparadana iti plasa ti siudad ket impukkawna: “Kastoy ti maaramid iti lalaki a kayat a padayawan ti ari!”
12 Kalpasanna, nagsubli ni Mardokeo iti ruangan ti palasio ti ari, ngem nagdardaras ni Haman a nagawid nga agladladingit ken nakaabbong ti ulona.
13 Idi inyestoria ni Haman iti asawana a ni Zeres+ ken iti amin a gagayyemna ti napasamak kenkuana, kinuna ni Zeres ken dagiti masirib a lallaki: “No ni Mardokeo ket Judio,* abakennakanto; sigurado a madadaelkanto iti sanguananna.”
14 Agsasaritada pay laeng idi simmangpet dagiti opisial ti palasio ti ari ket dagus nga inayabanda ni Haman a mapan iti okasion nga insagana ni Ester.+
