A C D E F G H J L M N P S T W Y

A

• Alabaster Jar.

  One small perfume jar dass made of one stone dat can be found nea Alabastron, Egypt. Dese kine bottles wuz skinny at da top an wuz sealed good so dat da spesho perfume no leak out.​—Mar 14:3.

• Abyss.

  From da Greek word aʹbys·sos, dat mean “supa deep” or “no moa limit, like you no can wrap yoa head aroun um.” Da word “abyss” iz used in da Greek Scripchas fo talk about one place or condition wea you stay stuck. It can mean da grave, but no mean ony dat.​—Luk 8:​31; Rom 10:7; Sho 20:3.

• Altar.

  One platform dat wuz raised up off da groun made up of dirt, rocks, one stone block, or wood covered wit metal. On top of um, peopo would make sacrifices or burn incense fo worship. In da firs room of da Tent an da Tempo, had one small golden altar fo burn incense. It wuz made wit wood dat wuz covered in gold. Had one bigga coppa altar fo burn sacrifices dat wuz outside in da courtyard. Peopo wen use altars fo fake kine worship too.​—Egypt 39:38, 39; 1Ki 6:20; Mat 5:23, 24; Luk 1:11; Ack 17:23.

C

• Cubit.

  One type of measurement. One cubit wen go from aroun da elbow to da tip of da middo finga. Fo da Israelites, one cubit wuz about 17.5 in. But dey even wen add one moa hand fo make one bigga cubit dat wuz about 20.4 in.​—Start 6:15; Mat 6:27; Luk 12:25; Sho 21:17.

• Circumcision.

  Dis wen dey cut off da foreskin of one guy’s private part. Befoa, God wen tell dat Abraham an all da guys dat came from him had fo do dis. But dis not someting Christians gotta do. An in diffren places in da Bible, dey use um az one word picha fo talk about someting else.​—Start 17:10; 1Co 7:​19; Php 3:3.

D

• Da Time Wen Jesus Stay Hea.

  In da Greek Scripchas (da books from Matthew to Jesus Show), dis talk about one spesho time period. “Da time wen Jesus stay hea” no mean he jus come an go. Even tho peopo no could see um, it had start wen da Messiah, Jesus, wen come King in heaven. An dis period goin las all da way thru da time of da end of dis world.​—Mat 24:3.

• Day Fo Prepare.

  One name fo da day befoa da Sabbath, wen da Jews wen get tings ready. Dat day pau at sundown on wat we call Friday. An den dass wen da Sabbath would start. Da Jewish day wen go from evening to evening.​—Mar 15:42; Luk 23:54.

• Demons.

  Evil spirit creatures dat you no can see an dass supa strong. Da Start 6:2 call dem “God’s boys” an Jude 6 call dem “angels.” So wen God wen make um, dey no wuz wicked, but dey wuz angels dat wen choose fo go agains God in Noah’s day. Dey wen join Satan wen he had rebel agains Jehovah.​—Rules 32:17; Luk 8:30; Ack 16:16; Jam 2:19.

• Denarius.

  One Roman silva coin dat wen weigh about 3.85 g (0.124 oz t) an had one picha of Caesar on one side. One worka would get paid one of dese coins fo one day of work. An da Romans would make da Jews pay dis coin fo da tax once a year.​—Mat 22:17; Luk 20:24.

E

• Eunuch.

  One guy dat wuz castrated. Plenny times dese guys wen work az da attendants or guys dat take kea da royal court of da queen an da king’s odda wifes. Wuz also used fo talk about one guy dat no wuz one real eunuch, but one govament guy dat work inside da king’s court. An wen also picha somebody dat choose fo live like one eunuch an hold back from getting married cuz dey like do moa fo God’s Govament.​—Mat 19:12; Est 2:15; Ack 8:27.

F

• Fast.

  Wen you no eat notting fo one set time. Da Israelites wen fast on da Day Fo Let Sins Go, wen dey wuz goin thru hahd times, an wen dey wanted God fo tell dem wat fo do. Da Jews wen set four times a year fo fast to rememba some mayjah bad tings dat wen happen in dea history az one peopo. Peopo no need fast fo be one Christian.​—Ezra 8:21; Isa 58:6; Mat 4:2; 9:14; Luk 18:12; Ack 13:2, 3; 27:9.

• Festival Of Bread Dat No Moa Yeast.

  Dis wuz da firs of da three mayjah festivals dat da Israelites wen do evry year. It started on Nisan 15, da day afta da Passova, an went on fo seven days. Dey could ony eat bread dat no moa yeast. Dey wen do dis fo rememba wen da peopo wen go outa Egypt.​—Egypt 23:15; Mar 14:1.

• Fooling Aroun On Yoa Odda Half.

  Dass wen one married guy or wahine choose fo have sex wit somebody dass not dea odda half.​—Egypt 20:14; Mat 5:​27; 19:9.

G

• Gehenna.

  Dis da Greek name fo da Valley of Hinnom, dat wuz south west of da old city of Jerusalem. (Jer 7:31) Prophets wen talk about um az one place wea dead bodies wuz goin be thrown all ova. (Jer 7:32; 19:6) No moa proof dat animals or humans wuz thrown in Gehenna fo be burned alive or tortured. So dis mean dat Gehenna no could rep one invisible place wea somebody’s soul iz tortured foeva in one fiyah. Radda, Jesus an his guys wen use da word Gehenna fo rep bein destroyed foeva an totally wipe out. Da Scripchas call dis foeva punishment “da secon death.”​—Sho 20:14; Mat 5:22; 10:28.

• Gifs To Da Pooa.

  Gifs peopo wen give fo help somebody dat need um. Da Hebrew Scripchas no strait up tell dey had fo do dat, but da Law wen give clear directions about how da Israelites had fo take kea da pooa.​—Mat 6:2.

• Grave.

  Wen da word iz lowercase, iz talking about jus one person’s grave. But wen iz capital, iz talking about da grave, or da place, evrybody go wen dey die. Iz da same az da Hebrew word “Sheol” an da Greek word “Hades.” Dis iz not one actual place, but da Bible describe um az one condition dat peopo stay in wea dey no can tink or do anyting anymoa.​—Start 47:30; Teacha 9:10; Mat 27:61.

H

• Herod.

  Dis da name of da family line dat wen rule ova da Jews. Rome wen pick dem fo be in charge. Da firs one wuz Herod da Great. He wuz famous fo building da tempo again in Jerusalem an fo telling his guys fo go kill all da kids cuz he wuz trying fo kill Jesus. (Mat 2:16; Luk 1:5) His two boys, Herod Archelaus an Herod Antipas, wuz in charge of some areas dea faddah wen rule ova. (Mat 2:22) Antipas wuz called “king,” an he had one big piece of land he wuz in charge of. He wuz da rula wen Jesus wuz preaching fo three years up to da time of Acks chapta 12. (Mar 6:14-17; Luk 3:1, 19, 20; 13:31, 32; 23:6-15; Ack 4:27; 13:1) Afta dat, Herod Agrippa I, da granson of Herod da Great, wuz killed by God’s angel afta he wen rule ony fo litto bit. (Ack 12:1-6, 18-23) His boy, Herod Agrippa II, wen rule afta him up to da time da Jews wen go agains Rome.​—Ack 23:35; 25:13, 22-27; 26:1, 2, 19-32.

• Herod’s Guys.

  Anodda name fo dem wuz Herodians. Dey wuz into political kine stuff an wen full on support dea nation an da Herods who wen rule unda da Romans. Some of da Sadducees probly wuz part of dis group. Herod’s guys wen hui up wit da Pharisees fo go agains Jesus.​—Mar 3:6.

• High Court.

  Wuz also called da Jewish Sanhedrin, da highes court in Jerusalem in Jesus day. It wuz made up of 71 guys. Some of dem wuz da main pries, guys who wuz main pries in da pas, an even guys from da main pries family. An had eldas, leadas fo families an tribes, an scribes too.​—Mar 15:1; Ack 5:34; 23:1, 6.

• Horn.

  Dis talking about animal horns dat peopo wen use fo drink out of, or put oil, ink, or makeup inside. Dey even wen use um fo make music or sen one signal. (1 Sam 16:​1, 13; 1 Ki 1:​39; Eze 9:2) Plenny times, “horn” wen picha bein strong, taking ova, an winning.​—Rules 33:17; Mic 4:​13; Luk 1:69.

J

• Jehovah.

  Da New World Translation Of Da Bible get da name “Jehovah” 237 times in da Greek Scripchas (Da books from Matthew to Wat Jesus Show John). Da reason God’s name wuz put in dea iz cuz of dis proof:

  1. 1. Copies of da Hebrew Scripchas (Da books from Da Start to Malachi) dat wuz used in Jesus an his aposals day had da Tetragrammaton (dass dese four Hebrew lettas יהוה dat wen rep God’s name) all inside da writings.

  2. 2. In Jesus an his aposals day, da Tetragrammaton even wen show up in da Greek translations of da Hebrew Scripchas.

  3. 3. Inside da Greek Scripchas it talk about how Jesus had use God’s name all da time an wen tell odda peopo about dis name too.​—John 17:6, 11, 12, 26.

  4. 4. Da Greek Scripchas an da Hebrew Scripchas both wen come from God an wuz made fo go togedda. If da Greek Scripchas wen take out Jehovah’s name all of a sudden, den would look like it no match up wit da Hebrew Scripchas.

  5. 5. Da shortened version of God’s name stay inside da Greek Scripchas.​—Jesus Show 19:1, 3, 4, 6.

  6. 6. Jewish writings from long time ago show dat Jewish Christians wen use God’s name in dea writings.

  7. 7. Some Bible experts believe dat pretty much garanz weneva da Greek Scripchas wen quote da Hebrew Scripchas wit God’s name, da writas wen keep um dea.

  8. 8. God’s name stay in da Greek Scripchas in ova 100 diffren languages of Bible translations.

  Garanz az clear fo see dat get good reason fo put God’s name, Jehovah, back in da Greek Scripchas. Dass exackly wat da translatas of da New World Translation wen do. Dey respeck God’s name plenny an sked fo take out anyting dat wuz inside da original writings.​—Jesus Show 22:18, 19.

• Judgment Day.

  One set day, or time, wen peopo goin have to ansa to God an get judge fo wat dey choose fo do. Might be one judgment wen dose dat deserve fo die goin get killed, or fo oddas get chance fo get saved an live foeva. Jesus Christ an his aposals had talk about one future “day wen God goin judge” dat goin include not ony da guys living but even da guys dat wen die in da pas.​—Mat 12:36.

L

• Leprosy, Leper.

  One real bad skin disease. Da leprosy dat we know about today iz small kine diffren from da one in da Scripchas, cuz it neva jus affeck ony humans, but even peopo’s clothes an houses. Somebody dat had leprosy wuz called one leper.​—Pries 14:54, 55; Luk 5:12.

• Lots.

  Small rocks or small pieces of wood or stone dat wuz used fo make decisions. Peopo would wrap um in dea clothes or put um in someting an shake um. Wateva one fall out or dey pick wuz da one dey would go wit. Plenny times dey wen pray wen dey do dis.​—Mat 27:35; Ack 1:26.

M

• Millstone.

  One round stone dat wuz put on top anodda same kine stone. Wuz used fo grind grain into flour. Inside da middo of da bottom stone had one peg dat would help make da stone on da top turn. In Bible times, mos of da homes had hand mills dat da wahines would use fo make flour. Da Law from Moses sed dat if somebody wen owe you someting, you couldn’t hold on to dea hand mill or top grind stone til dey paid you back, cuz da family wen need um fo make bread evryday. Bigga mills built in da same way wuz turned by animals.​—Rules 24:6; Mar 9:42.

N

• Nard.

  One expensive oil dat smell real good. Da color iz light red an come from da spikenard plant (Nardostachys jatamansi). Cuz wen cost plenny, nard wuz mix wit oils dat wuz moa cheap, an sometimes da nard wuz fake. Dass why both Mark an John wen say wuz “da real stuff” dat wuz used on Jesus.​—Mar 14:3; Joh 12:3.

• No Moa Shame Doin Wrong Tings.

  Dis come from da Greek word a·selʹgei·a, an talk about doin mayjah tings dat go agains God’s laws an doin tings dat show one “I no kea,” in yoa face kine attitude. Dis kine person no moa shame an no moa respeck fo laws, standards, an peopo in charge. Dis not talking about doin wrong stuffs dass ony mynah.​—Gal 5:19; 2Pe 2:7.

P

• Passova.

  One festival dat wuz celebrated once a year on da 14th day of Abib (layta on dey wen call um Nisan) fo rememba wen da Israelites wen get free from Egypt. Dey wen celebrate um by killing an roasting one lamb (or goat) dat dey wen eat wit bitta greens an bread dat no moa yeast.​—Egypt 12:27; Joh 6:4; 1Co 5:7.

• Pharisees.

  One of da main religious groups fo da Jews back in Jesus time. Dey neva come from da pries line, but dey wuz real strict fo follow evryting in da Law from Moses. Dey even wen make up rules an wanted peopo fo follow um jus like da Law. (Mat 23:23) Dey neva like any Greek culture creep in an wen study da Law an da rules dat wuz pass down real good, an wen use dat fo have powa ova da peopo. (Mat 23:2-6) Some wuz membas of da Highes Court in Jerusalem. Dey had beef wit Jesus about da Sabbath, rules dat wuz pass down, an cruzing wit sinnaz an tax collectas. Some Pharisee guys wen come Christians, one of dem wuz Saul from Tarsus.​—Mat 9:11; 12:14; Mar 7:5; Luk 6:2; Ack 26:5.

• Pilau Sex.

  From da Greek word por·neiʹa. Dis word iz talking about sex dat Jehovah sed iz kapu. Some of dose tings iz fooling aroun on yoa odda half, prostitution, peopo dass not married having sex, mahu kine sex, an sex wit one animal. Da book Jesus Show use dis word fo picha one religious prostitute called “Babylon da Great” who stay hooking up wit da rulas of dis world fo get moa powa an money. (Sho 14:8; 17:2; 18:3; Mat 5:32; Ack 15:29; Gal 5:19)​—Go check out PROSTITUTE.

• Pos.

  One pole dat stick up outa da groun dat dey wen hang peopo on. Some nations wen use um fo punish an kill peopo, an warn oddas by showing dea dead body in front evrybody. Or dey wen use um fo make somebody shame befoa dey kill um. Da Assyrians wuz supa violent in war. Dey would hang da guys dey capcha on top one sharp pos dat would go up thru dea stomach into dea ches. In da Jewish law, dose dat wen commit bad kine crimes like talking agains God or worshipping idols wen get killed by stoning dem or in anodda way. Den dea dead bodies wuz hung on da pos, or tree, az one warning to oddas. (Rules 21:22, 23; 2Sa 21:6, 9) Da Romans would jus tie somebody to da pos fo hang dea fo days til he mahke. Da guy would mahke eidda from pain, bein hungry, thirsty, or from roasting in da sun. An odda times, like wen Jesus wuz killed, dey wen nail da hands an feet to da pos. (Luk 24:20; Joh 19:16; 20:25)​—Go check out TORCHA POS.

• Prophet.

  Somebody God wen use fo tell da tings He goin make happen. Prophets wen talk fo God. Dey neva ony talk about da future, but even about tings Jehovah like teach, wat He like peopo fo do, an da decisions He wen make.​—Amos 3:7; 2Pe 1:21.

• Prostitute.

  One person who has sex wit somebody dey not married to, speshly fo money. (Da Greek word fo “prostitute,” porʹne, come from one word dat mean “fo sell.”) Mos times dis word talk about one wahine, but da Bible talk about guy prostitutes too. Wuz agains da Law from Moses fo be one prostitute an da money one prostitute wen make, dey no could give um to Jehovah’s tempo. Dis wuz diffren from wat da pagans wuz doin, dey wen use tempo prostitutes fo make money. (Rules 23:17, 18; 1Ki 14:24) Da Bible also use dis word fo talk about peopo, nations, or groups dat say dey worship God but same time worship fake gods. Fo exampo, da book Jesus Show call all da fake religions “Babylon da Great,” an tell dat she one prostitute cuz she hook up wit da world’s rulas fo money an powa.​—Sho 17:1-5; 18:3; 1 Rec 5:25.

S

• Sabbath.

  From da Hebrew word dat mean “fo res” or “fo stop.” Da Sabbath wuz da seventh day in da Jewish week (it wen go from sunset Friday to sunset Saturday). Some odda spesho festival days in da year, an evry 7th an 50th year, wuz also called sabbaths. On da Sabbath day, nobody wuz suppose to work, ony da pries wuz allowed fo do dea work in da holy place. In da Sabbath years, nobody wuz suppose to work da land, an Hebrews neva presha each odda fo pay off wat dey owe. In da Law from Moses, wuzn’t hahd fo follow da Sabbath rules. But religious leadas wen start fo add moa rules to da Law, so dat by da time Jesus wuz aroun wuz hahd fo peopo follow evryting.​—Egypt 20:8; Pries 25:4; Luk 13:14-16; Col 2:16.

• Sadducees.

  One of da main religious groups fo da Jews. Dey wuz made up of high class rich peopo an pries guys who had plenny control ova wat wen go on in da tempo. Dey neva believe da same tings az da Pharisees or follow da rules dose guys wen pass down. Dey neva believe in angels or dat peopo can come back alive afta dey mahke. Dey wen go agains Jesus.​—Mat 16:1; Ack 23:8.

• Scribe.

  Somebody dat wen make copies of da Hebrew Scripchas. By da time Jesus wen come to da earth, scribes wuz one group of guys dat wen know an learn plenny about da Law. Dey wen go agains Jesus.​—Ezra 7:6, ftn.; Mar 12:38, 39; 14:1.

• Scroll.

  One long sheet of parchment dat wuz made from animal skin or one plant called papyrus. Had writing on one side an wuz rolled aroun one stick. Da Scripchas wuz written an copied on scrolls. Scrolls wuz like books fo peopo long time ago.—Luk 4:​17-​20; 2Ti 4:​13.

• Son Of Man.

  Dis phrase come up about 80 times in da Gospels (Da books of Matthew, Mark, Luke, an John), an iz used fo Jesus Christ. It shows dat he wuz born from human parents an wen come one human, an not jus one spirit creature wit one human body. An it show dat Jesus would make da prophecy in Daniel 7:13, 14 come tru. In da Hebrew Scripchas, dis phrase wuz used fo Ezekiel an Daniel fo show dat get one diffrence between dem az humans an God, da One dat wen give dem dea message.​—Eze 3:17; Dan 8:17; Mat 19:28; 20:28.

• Soul.

  Dis da word fo da Hebrew word neʹphesh an da Greek word psy·kheʹ. Wen we look at how dese words iz used in da Bible, az clear dat dey talking about (1) peopo, (2) animals, or (3) da life of one human or animal. (Start 1:20; 2:7; Cens 31:28; 1Pe 3:20; an ftns.) Da Bible show dat wen da words neʹphesh an psy·kheʹ iz used fo creatures on earth, it stay talking about physical tings, tings you can see, tings you can touch, an tings dat can die. Dis iz diffren from how plenny religions use da word “soul”. In dis translation, da original Hebrew an Greek words wen get translated based on da context wit words like “life,” “creature,” “person,” “evryting inside you,” or sometimes az one personal pronoun (like, “I” fo “my soul”). Plenny times, goin have da word “soul” in da footnotes. Wen dis word stay in da footnotes or in da main text, da meaning iz wat we wen jus talk about above. Wen talking about doin someting wit yoa “whole soul”, it mean dey doin it wit evryting inside dem, wit dea whole heart, or wit dea whole life. (Rules 6:5; Mat 22:37) Sometimes dese original Hebrew an Greek words iz used fo talk about wen one living creature want or crave someting. An dese words can be used fo talk about somebody dead or one dead body.​—Cens 6:6; Smart Guys 23:2; Isa 56:11; Hag 2:13.

• Spirit.

  Da Hebrew word ruʹach an da Greek word pneuʹma, dat mos times iz translated “spirit,” mean diffren tings. All of um iz stuff dat humans no can see an dat show powa in action. Da Hebrew an Greek words iz used wen talking about (1) wind, (2) da powa dat give life to creatures on earth, (3) da ting dat make somebody do wat dey do an say wat dey say, (4) words or messages coming from God or demons, (5) spirit persons like God, angels, an demons, an (6)  God’s powa, or holy spirit.​—Egypt 35:21; Songs 104:29; Mat 12:43; Luk 11:13.

• Synagog.

  Dis word mean “bring togedda.” But in mos scripchas, az da building wea da Jews wen come togedda fo read Scripchas, learn, talk about God, an pray. In Jesus time, evry town in Israel had one synagog, an da bigga towns had moa den one.​—Luk 4:16; Ack 13:14, 15.

• System(s).

  Dis one way fo translate da Greek word ai·onʹ wen iz talking about wass goin on in da world or tings dass happening during one period of time. Wen da Bible say “dis system,” iz talking about da way da world stay run in general an da way peopo in da world stay living. (2Ti 4:10) God wen set up one Israelite or Jewish system thru da Law from Moses. But God had make one diffren system thru Jesus ransom sacrifice, dat had fo do wit da anointed Christian hui. Dis wuz da start of one new system, wea evryting dat da Law from Moses wen picha befoa, wuz now happening. Wen dis word iz plural (systems), iz talking about da diffren kine systems, or da diffren tings goin on in da world, befoa or in da future.​—Mat 24:3; Mar 4:19; Rom 12:2; 1Co 10:11.

T

• Talent.

  Da bigges Hebrew unit of weight an money. It wen weigh 75.5 lb. One Greek talent wuz moa small an wen weigh about 44.8 lb.​—1 Rec 22:14; Mat 18:24.

• Torcha Pos.

  Dis come from da Greek word stau·rosʹ, dat mean one pos or pole dat stan strait up, jus like da one dey wen kill Jesus on. No moa any proof dis Greek word wen mean one cross, like da one peopo had use az one symbol in fake worship way befoa Christ wen come. “Torcha pos” give da full meaning of da original word, cuz Jesus had use da word stau·rosʹ fo mean da torcha, suffaring, an shame dat his followas would go thru. (Mat 16:24; Heb 12:2)​—Go check out POS.

W

• Wen Da System Goin Pau.

  Da time period leading up to da end of da system, or da tings goin on in da world dat Satan stay in control of. Dis happen at da same time az wen Jesus stay hea. Jesus goin tell da angels fo “take away da bad guys from da guys dat do wass right” an get rid of dem. (Mat 13:40-42, 49) Jesus followas really wanted fo know da timing of wen tings wuz goin pau. (Mat 24:3) Befoa Jesus wen go back heaven, he wen promise his followas dat he wuz goin be wit dem til dat time.​—Mat 28:20.

Y

• Yoke.

  One bar dat somebody put on dea shouldas dat get stuffs hanging on both sides fo help carry loads, or one wooden bar dat wuz made fo put on da neck of two strong animals (mos times cattle) fo help pull one wagon or one farm tool. Cuz slaves wen use yokes fo carry heavy loads, da yoke wen rep bein one slave to anodda person or bein unda somebody’s control, suffaring, or bein treated bad. Taking off or breaking da yoke wen rep bein free from slavery, from suffaring, an from bein taken advantage of.​—Pries 26:13; Mat 11:29, 30.