Wat Luke Wen Write 13:1-35
-
Come sorry an change or die (1-5)
-
Da story of da fig tree wit no moa fruit (6-9)
-
One wahine dass cripple get healed on da Sabbath (10-17)
-
Da stories of da mustard seed an da yeast (18-21)
-
Gotta struggle fo get in thru da skinny door (22-30)
-
Herod, “dat sneaky buggah” (31-33)
-
Jesus sad about Jerusalem (34, 35)
13 Dat time, had guys dea dat wen talk to Jesus. Dey tell him about how Pilate killed da Gal·i·leʹans wen dey wuz giving dea sacrifices.
2 Jesus tell dem: “You tink dose Gal·i·leʹans wen die cuz dey wuz moa worse sinnaz den all da odda Gal·i·leʹans?
3 No ways. You guys iz sinnaz jus like dose Gal·i·leʹans, an if you no come sorry an change wat you doin, all you guys goin die jus like dem.
4 Or wat about da 18 guys dat died wen da towa in Si·loʹam wen fall on top dem? You tink dat wen happen cuz dey wuz moa guilty den all da odda guys in Jerusalem?
5 No ways. You guys iz sinnaz too, an if you no come sorry an change wat you doin, all you guys goin die jus like dem.”
6 Den Jesus start fo teach dem wit dis story: “One guy had one fig tree on his land. He wen look fo fruit on top um but neva find notting.
7 Den he sed to da gardener, “Been three years awready I stay looking fo fruit on dis tree, but no moa notting. Chop um down! Poho dis ting, iz ony taking up space.”
8 Da gardener tell um, “Boss, try leave um one moa year. I goin dig aroun um an put fertiliza.
9 If da tree get fruit layta on, dass good. But if not, den cut um down.””
10 Jesus wuz teaching in one of da synagogs* on da Sabbath.*
11 An you know wat? Had one lady ova dea wit one demon dat wen make her sick fo 18 years. She wuz bent ova an no could stan up strait.
12 Wen Jesus see her, he tell her: “My sistah, you stay healed from yoa sickness.”
13 He put his hands on her, an right den an dea, she stan up strait an start fo praise God.
14 But one leada of da synagog got all mad cuz Jesus had heal on da Sabbath, so he tell evrybody: “Get six odda days fo do work, so come get healed on one of dose days. No come on da Sabbath.”
15 But da Lord tell him: “You guys so two-face. On da Sabbath, you no untie yoa bull or yoa donkey an bring um someplace fo drink watta?
16 Dis wahine come from Abraham, an Satan wen make her suffa fo 18 years. You no tink she should get healed from dis on da Sabbath?”
17 Wen he sed all dis, da guys goin agains him wen feel shame, but evrybody else wuz supa stoked wit all da awesome tings he did.
18 Den Jesus tell: “Wat God’s Govament stay like? Wat I can compare um to?
19 Iz like one mustard seed dat one guy plant in his garden. Had grow an come one big tree, an da birds make nes in da branches.”
20 Again he tell: “Wat God’s Govament stay like?
21 Iz like yeast dat one wahine mix in wit plenny* flour til da whole ting come big.”
22 On his way to Jerusalem, he go thru town afta town an village afta village teaching da peopo.
23 Den one guy tell him: “Lord, az tru o wat dat ony litto bit peopo goin get saved?” He sed to dem:
24 “No stop struggling fo get in thru da skinny door, cuz I telling you, plenny guys goin try but dey not goin be able fo get in.
25 Wen da owna of da house get up an lock da door, you goin stan outside knocking, an you goin tell, “Hui! Lord, open da door fo us.” But he goin tell you: “I donno who you.”
26 Den you goin start fo tell, “We wen eat an drink wit you, an you wen teach in oua town.”
27 But he goin tell, “I donno who you. You guys ony do wass bad! Beat it!”
28 Wen you see Abraham, Isaac, Jacob, an all da prophets in God’s Govament an you stay outside, dass wea you goin cry real hahd an grind yoa teeth.
29 But peopo goin come from all ova da world an sit at da table in God’s Govament.
30 An try look! Get some guys who stay las dat goin be firs, an some guys who firs dat goin be las.”
31 Right afta dat, some of da Pharisees* come an tell him: “Get outa hea, cuz Herod like kill you.”
32 An he sed to dem: “Go tell dat sneaky buggah,* “Today an tomorrow I stay kicking out demons an healing peopo, an da day afta dat* I goin be pau.”
33 But I gotta hele on today, tomorrow, an da nex day fo get to Jerusalem, cuz az not right fo one prophet get killed outside Jerusalem.
34 Peopo of Jerusalem, da killa of da prophets an da one dat stone da guys sent to her. How much times I wanted fo gadda you togedda jus like one hen gadda all her chicks unda her wings! But you neva like.
35 Try look! God goin leave yoa house.* I telling you, you not goin see me til you say: “Da one who come in Jehovah’s* name iz da one who stay blessed!””
