Wat Luke Wen Write 17:1-37
17 Den he tell his guys: “No matta wat, always goin get tings dat make peopo stumbo. But bummahz fo da guy dat make oddas stumbo!
2 Goin be moa betta fo him if one huge rock* hang aroun his neck an he get thrown in da deep watta den fo him stumbo one of dese humbo guys.*
3 Be keaful. If yoa braddah sin, scold um. An if he sorry, fogive um.
4 Even if he do dat seven times a day agains you an he come back seven times an tell you, “I sorry,” you gotta fogive um.”
5 Da aposals sed to Jesus: “Give us moa faith.”
6 Den Jesus sed: “If you get faith da size of one mustard seed, you goin tell dis tree,* “Pull yoaself outa da groun an go in da ocean!” an da buggah goin.
7 “Which one of you guys dat get one worka dass working hahd in da field or taking kea sheep, afta he pau, goin tell um, “Hurry up, we go eat”?
8 Moa like you goin tell um, “Go put on one apron, make my dinna, an serve um to me. Wen I pau, den you can eat”.
9 You not goin praise yoa worka, cuz he jus doin wat he suppose to do.
10 So same ting, wen you do da tings God told you fo do, jus tell: “Us guys good fo notting workas. We ony wen do wat we suppose to do.””
11 Wen Jesus wuz goin Jerusalem, he go between Sa·marʹi·a an Galʹi·lee.
12 Wen he get to one small town, ten guys wit leprosy* come out fo meet him, but dey no come close.
13 Dey yell loud an tell: “Jesus, Teacha, help us!”
14 Wen he see dem, he sed: “Go an let da pries check you out.” Az dey wuz goin dea, dey wen come clean.
15 Wen one of dem see dat he wuz healed, he turn aroun to Jesus an start fo praise God real loud.
16 He go down on his knees in front Jesus an tank him. An dis guy, he one Sa·marʹi·tan.
17 Den Jesus sed: “Had ten guys dat wen get healed yeah? Wea da odda nine stay?
18 Nobody else had turn aroun an praise God, ony dis guy dass not even from hea.”
19 Den he sed to da guy: “Get up an go. Yoa faith wen heal you.”
20 Wen da Pharisees* ask him wen God’s Govament wuz coming, he tell dem: “Not goin be easy fo evrybody see wen God’s Govament coming.
21 Peopo not goin say, “Look ova hea!” or “Dea!” Cuz try look! God’s Govament stay hea wit you guys.”
22 Den he tell his guys: “Da day coming wen you goin like see da time wen da Son of man* stay wit you, but you not goin see um.
23 Peopo goin say to you, “Look ova hea!” or “Look ova dea!” But no go. No follow dem.
24 Da days of da Son of man goin be jus like how lightning flash from one side of da sky to da odda.
25 But firs he gotta suffa plenny tings an get rejected by dis generation.
26 Jus like how wuz in Noah’s time, dass how goin be wen da Son of man stay hea.
27 Dey wuz eating an drinking, an guys an wahines wuz getting married til da day Noah wen go inside da ark, an da Flood wen come an wipe dem all out.
28 Goin be jus like wat wen happen in Lot’s time. Dey wuz eating an drinking, dey wuz buying an selling stuff, dey wuz planting, an dey wuz building.
29 But da time Lot wen leave Sodʹom, had rain fiyah an sulfa from da sky an wipe dem all out.
30 Goin be jus lidat wen da Son of man show himself to evrybody.
31 “Wen dat time come, da guy on da roof betta not come down fo go inside his house an grab his stuff. An same ting, da guy in da field betta not go back fo anyting.
32 Rememba wat happen to Lot’s wife.
33 Whoeva like save his life* goin lose um, but whoeva lose his life goin save um.
34 Dat night, two peopo goin be in one bed. God goin take one of dem, but da odda he goin leave behind.
35 Goin get two ladies at da same mill making flour fo bread. God goin take one of dem, but da odda one he goin leave behind.”
36 * ——
37 So dey sed to him: “Lord, wea dis goin happen?” He tell dem: “Wea get someting dead, dass wea da eagles goin gadda aroun.”
Footnotes
^ Or, “millstone”. Dis kine huge rock wuz used fo smashing wheat. Go check out “Millstone” in Da Bible Dictionary.
^ Or, “guys who no seem importan”.
^ Dis one tree called black mulberry.
^ Go check out “Son Of Man” in Da Bible Dictionary.
^ Dis verse iz in some Bible translations but no stay in some of da mos oldes Greek writings.
