Wat Luke Wen Write 15:1-32
15 All da tax collectas an sinnaz keep coming aroun him fo lissen him.
2 An da Pharisees an scribes* keep grumbling: “Dis guy cruz wit sinnaz an eat wit dem.”
3 Den he teach dem wit dis story:
4 “If one guy get 100 sheep an lose one of dem, you no tink he goin leave da 99 behind in da boonies an go look fo da one dass los til he find um?
5 An wen he find um, he supa happy an put um on his shouldas.
6 Wen he get home, he call his frenz an neighbas togedda, an he tell dem, “We go celebrate,* cuz I wen find my sheep dat wuz los.”
7 Same ting, heaven goin be moa happy fo one sinna dat come sorry an turn aroun, den fo da 99 dat tink dey righteous an no need come sorry.
8 “An if one wahine dat get 10 silva coins* lose one of um, she goin light one lamp an sweep her house an look real good til she find um.
9 Wen she find um she call all her frenz an neighbas* togedda an tell: “We go celebrate, cuz I wen find my silva coin dat I wen lose.”
10 Same ting, God’s angels goin be happy fo one sinna dat come sorry an turn aroun.”
11 Den he sed: “Had one guy dat get two boys.
12 Da younga one sed to his faddah, “Dad, try give me my share of da property I suppose to get.” So he wen give his two boys dea share.
13 Few days layta, da younga boy wen grab all his stuff an go to anodda country far away. Ova dea he blow all his money cuz he wen go wild an live anykine.
14 He wen spen evryting he had. Dat time, da whole country neva have food, an he wuz lef wit notting.
15 He even get one guy from dat country fo hire him. An dat guy sen him out in da field fo take kea da pigs.
16 He wuz so hungry he wanted fo grind da pigs food,* but nobody give him notting.
17 “Wen he wise up, he sed, “All my faddah’s workas get moa den enuff bread fo eat, an I stay dying ova hea cuz I hungry!
18 I goin go back to my faddah an tell um: “Pops, I wen screw up big time agains God* an you.
19 I no stay good enuff fo be yoa boy. Jus make me one of yoa workas.””
20 So he go back to his faddah. Wen he wuz still far away, his faddah spock him an wen feel plenny pity fo his boy. He run to him an hug* an kiss um.
21 Den da boy tell him, “Pops, I wen screw up big time agains God an you. I no stay good enuff fo be yoa boy.”
22 But da faddah tell his workas, “Hurry up! Go get one robe, da bes one, an put um on top him, an put one ring on his hand an slippas on his feet.
23 Go bring one young cow, da fattest one, kill um, an we go eat an drink,
24 cuz my boy wuz dead but stay alive now. He wuz los an wen come back.” Dey wuz supa happy an wen start fo have one good time.
25 “His olda boy wuz in da field. Wen he wuz coming back an got closa to da house, he wen hea music an dancing.
26 So he call one of da workas an ask um wat stay goin on.
27 Da worka tell, “Yoa braddah wen come home, an yoa faddah wen kill one young fat cow cuz he wen come back safe an soun.”*
28 But he come all habut an neva like go inside. Den his faddah come out an beg um fo come inside.
29 He tell his faddah, “All dese years I work hahd fo you an I always did wat you told me fo do. Still yet, you neva eva wen give me even one young goat fo me an my frenz enjoy.
30 But soon az dis boy of yoas show up, da one dat wen blow evryting you wen give him on prostitutes, you go kill one young cow fo him, da fattest one.”
31 Den he sed to him, “My boy, you always wuz wit me, an evryting I get iz yoas.
32 But we jus had fo celebrate, cuz yoa braddah wuz dead but now he stay alive. He wuz los an wen come back.””
Footnotes
^ Go check out “Pharisees” an “Scribe” in Da Bible Dictionary.
^ Or, “Be stoked wit me”.
^ In da original Greek dis wen mean “10 drachma coins”. Dis wen equal da wages fo 10 days work.
^ Dass her wahine frenz an neighbas.
^ Or, “carob pods”.
^ In da original Greek dis wen mean “heaven”.
^ In da original Greek dis wen mean “wen fall upon his neck”.
^ Or, “healty”.
