Wat Luke Wen Write 21:1-38
21 Wen Jesus wuz looking aroun, he see da rich guys dropping dea gifs in da donation boxes.
2 Den he see one widow dat wuz pooa drop in two small coins* dat no wuz worth dat much,
3 an he sed: “Fo shua dis pooa widow put in moa den all da odda guys.
4 Cuz all dem wen drop in gifs from wat dey had lef ova. But even tho she real pooa, she give evryting she had fo live on.”
5 Bumbye, wen some of dem wuz talking about how da tempo look awesome wit all da nice stones an gifs peopo wen bring fo God,
6 Jesus sed: “All dese tings you guys see, da day goin come wen all dese stones goin get knock ova an thrown down.”
7 Den dey ask him: “Teacha, try tell us wen all dis stuff goin really happen, an wass da sign fo know wen all dese tings goin go down?”
8 He sed: “Watch out nobody lead you da wrong way, cuz plenny guys goin use my name an tell, “I da guy,” an, “Da end stay close.” No follow dem.
9 An wen you hea about wars an peopo getting outa control an fighting, no be sked. Cuz all dis gotta happen firs, but az not da end yet.”
10 Den he tell dem: “One country goin fight anodda country an one govament goin fight anodda govament.
11 Goin get massive earthquakes, an all ova goin get mayjah sickness* an not goin have nuff food. An peopo goin see unreal signs in da sky an tings dat make dem sked.
12 “But befoa all dis happen, peopo goin arrest you an make you suffa, an make you go in front da synagogs* an throw you in prison. Dey goin bring you in front kings an govnas cuz you my followas.
13 Cuz of dat, you goin get fo tell dem about me.
14 So make up yoa mind fo no plan wat you goin say,
15 cuz I goin give you da smarts an da right words so dat yoa enemies no can say notting or argue agains you.
16 Moa den dat, even yoa parents, braddahs, family, an frenz goin turn you ova* to da courts. Cuz of dat, some of you goin get killed.
17 An evrybody goin hate you cuz you my followas.
18 But no worry, you not goin lose even one hair on yoa head.
19 If you hang in dea til da end, you goin save yoa life.*
20 “But wen you see da armies surround Jerusalem, den know dat pretty soon she goin get wipe out.
21 Den da guys in Ju·deʹa should start fo run to da mountains, da guys inside Jerusalem betta leave, an da guys outside da town betta not go inside,
22 cuz da time goin come fo God punish peopo so dat evryting in da Scripchas goin come tru.
23 Bummahz fo da wahines dat stay hapai an dose nursing one bebe dat time! Da land goin suffa plenny an da peopo goin get punish.
24 Some goin get killed by da sword an peopo goin take oddas away az prisonas. Da peopo of odda nations* goin walk all ova Jerusalem til da time God wen set fo da nations stay pau.
25 “An goin get signs in da sun, moon, an stars. On da earth da nations goin stress out an dey not goin know wat fo do cuz of how loud an rough da sea goin be.
26 Peopo goin pass out cuz dey so sked of da tings dat goin happen on da earth, an da powas of da heavens goin shake.
27 An den dey goin see da Son of man* coming in one cloud wit plenny powa an awesomeness.
28 But wen dese tings start fo happen, stan up strait an lif up yoa heads, cuz da time fo God save you stay close.”
29 Den he tell dem one story: “Try look da fig tree an all da odda trees.
30 Wen dey get new leafs you see um wit yoa own eyes an you know dat summa stay nea.
31 Same lidat, wen you see dese tings happening, den know fo shua dat God’s Govament stay nea.
32 I telling you, dis generation not goin die til all dese tings happen.
33 Heaven an earth goin disappea, but my words goin stay foeva.
34 “But watch out dat you no get caught up wit eating an drinking too much an worrying about all da tings you need, den boom! dat day come
35 like one trap. Nobody on da earth goin be able fo run away.
36 So den stay ready an pray hahd all da time so dat you can get saved from all dese tings dat goin happen an can stan in front da Son of man.”
37 Day time he go teach in da tempo, but night time he go sleep on da Mount of Olives.
38 An early in da morning all da peopo would come to da tempo fo hea him.
Footnotes
^ In da original Greek dis wen mean “two lepta”. One lepton iz da smalles Jewish coppa or bronze coin an wuz worth ony few minutes of work.
^ Like pandemics an da kine sickness dat spread fas.
^ Or, “stab you in da back”.
^ Or, “peopo dass not Jews”.
^ Go check out “Son Of Man” in Da Bible Dictionary.
