Wat Luke Wen Write 24:1-53
24 But on da firs day of da week,* dey get to da tomb* real early in da morning, an dey bring da spices dey wen get ready.
2 But dey see dat somebody wen roll away da rock from da tomb.
3 Wen dey go inside, dey no see Jesus body dea.
4 Dey wuz all confused, an try look! two guys wuz standing by dem, an dea robes stay shine.
5 Da wahines wen come sked an neva like look up. So da guys sed to dem: “Why you stay look fo da One dass alive in one place lidis?
6 He not hea cuz he wen come back alive.* You no rememba wat he sed wen he wuz still yet in Galʹi·lee?
7 He wen tell dat da Son of man* gotta get turn ova to sinnaz an be killed on da pos,* an three days layta come back alive.”
8 Den dey rememba wat he sed,
9 an dey come back from da tomb an tell evryting to da Eleven an da odda followas.
10 Da wahines wuz Mary Magʹda·lene, Jo·anʹna, an Mary da maddah of James. An da odda wahines wit dem wuz telling dese tings to da aposals too.
11 But dey neva believe da wahines cuz dey tink dey making um up.
12 So Peter get up an run to da tomb. He bend down an look inside, an he ony see da linen cloths. So he leave an wonda wat wen happen.
13 Dat same day, two of Jesus followas wuz goin to one town called Em·maʹus, dass about seven miles* from Jerusalem.
14 Dey wuz talking wit each odda about all da tings dat wen happen.
15 Wen dey wuz talking about all dis stuff, Jesus go ova dea an start walking wit dem.
16 But dey neva recognize him.
17 He sed to dem: “Wat you guys talking about?” Dey stop walking an look all sad.
18 An da guy named Cleʹo·pas sed to him: “You one stranger living by yoaself hea in Jerusalem an donno* wat been goin on dese pas few days o wat?”
19 He ask dem: “Why, wass been goin on?” Dey tell um: “You donno wat wen happen to Jesus da Naz·a·reneʹ? He wen prove in front God an all da peopo dat he wuz one powaful prophet, by wat he wen do an tell.
20 An oua leadas an main pries guys wen turn um ova fo get da death sentence an nail um to da pos.
21 But we wuz hoping dis guy wuz goin be da one fo free Israel. An dis da third day since all dis wen happen.
22 On top of dat, some of da wahines wen shock us cuz dey wen go to da tomb real early
23 an neva find his body dea. So dey wen come to us an say dat dey wen see angels dat sed he stay alive.
24 Den some of da guys wit us wen go to da tomb an neva see him dea, jus like da wahines wen tell.”
25 So he tell dem: “You guys no undastan an you slow fo believe* evryting da prophets wen tell!
26 You no tink da Christ had fo suffa all dis so dat he can come awesome?”
27 Den starting wit Moses an da Prophets,* he wen explain to dem all da tings da Scripchas tell about him.
28 Dey finally get close to da small town an he wen make like he wuz goin moa far.
29 But dey keep telling him fo stay dea. Dey say: “Stay wit us, cuz late awready an goin come dark pretty soon.” So he go inside an stay wit dem.
30 Wen he wuz sitting at da table wit dem, he take da bread, say one praya, broke um up, an give um to dem.
31 Right den an dea, dey undastan who he wuz an wen recognize him, but he wen disappea.
32 An dey sed to each odda: “No wonda oua hearts wuz on fiyah wen he wuz talking to us on da road an telling us wat da Scripchas mean.”
33 So dey go back Jerusalem, an dey see da Eleven an da oddas dat wuz togedda wit dem.
34 All dose guys sed: “Fo shua da Lord wen come back alive! Simon wen see um!”
35 Den da two guys tell wat wen happen on da road an how dey wen figga wuz him afta he broke up da bread.
36 Az dey wuz talking about evryting, Jesus wen come to dem an sed: “Howzit, I hope evryting good wit you.”*
37 But dey wuz all shock an sked cuz dey tink dey see one spirit.*
38 So he tell dem: “Why you sked fo, an how come you no believe?
39 Try look my hands an feet, az me. Try touch me an see fo yoaself. Cuz one spirit no moa one body jus like I get.”
40 An wen he say dis, he show dem his hands an feet.
41 Dey so happy but same time dey no could believe wat dey see. So he tell dem: “You get someting fo eat?”
42 So dey give um one piece fish.
43 He take um an eat um in front dem.
44 Den he sed to dem: “No foget wen I wuz wit you befoa I wen tell you dat evryting about me dat stay in da Law from Moses, da Prophets,* an in Songs Fo God,* gotta happen.”
45 Den he wen help dem fo full on undastan wat da Scripchas mean.
46 Den he tell dem, “Dis wat da Scripchas say: da Christ goin suffa an come back alive on da third day,
47 an cuz of his name, peopo in all da nations, starting from Jerusalem, goin hea da message fo come sorry so dat dea sins can get let go.
48 You guys goin tell* all about dese tings.
49 An try look! I goin sen you guys wat my Faddah wen promise fo give you. But stay in town til you get da powa from heaven.”
50 Den he take um outa da town an go wit dem all da way to Bethʹa·ny. He lif up his hands an bless dem.
51 Az he do dis, he leave dem an God take him to heaven.
52 Dey bow down to him an go back Jerusalem supa happy.
53 An evryday dey wuz in da tempo praising God.
Footnotes
^ Dis da day we call Sunday. Fo da Jews, it wuz da firs day of da week.
^ Or, “memorial tomb”.
^ In da original Greek dis wen mean “get raise up”.
^ Go check out “Son Of Man” in Da Bible Dictionary.
^ In da original Greek dis wen mean “60 stadia”. One stadium wen equal about 606 feet.
^ Or might be, “You da ony visita in Jerusalem dat donno?”
^ In da original Greek dis wen mean “yoa heart stay slow fo believe”.
^ Or, “books of da prophets”.
^ In da original Greek dis wen mean “I hope you have peace”. Dis how da Jews wen greet each odda.
^ Or, “books of da prophets”.
^ Dis talking about one group of books in da Hebrew Scripchas dat start wit da book Songs Fo God.
^ Or, “You guys goin be witnesses”.
