Wat Luke Wen Write 10:1-42
10 Afta dat, da Lord wen choose 70 oddas an sen um out two by two fo go in evry town an place dat he wuz goin go layta on.
2 Den he tell dem: “Get plenny fo harves, but no moa nuff workas. So beg da guy who own da field fo go get some moa workas fo bring da harves in.
3 Go, but watch out, cuz you guys jus like bebe sheep dat I goin sen wea get plenny wolfs.
4 No carry one bag fo money or food, or extra slippas, an no stop fo tell somebody howzit* on da road.
5 Weneva you go inside one house, firs tell: “We like all you guys have peace.”
6 An if somebody stay dea dat like peace, den da good you like share goin be wit dem. But if not, den goin stay wit you.
7 So stay at dat house an eat an drink wat dey give you, cuz ony make sense dat da peopo goin give da worka wat he need. No keep moving from one house to anodda.
8 “An weneva you go in one town an dey welcome you, eat wat dey make fo you
9 an heal da guys dass sick an tell um: “God’s Govament stay close by you.”
10 But weneva you go in one town an dey no like you dea, go in da main street an tell:
11 “We goin hemo da dus from yoa town dass stuck to oua feet. But know dat God’s Govament stay close.”
12 I tell you dat da day goin come fo God judge peopo, an goin be moa betta fo Sodʹom den fo dat town.
13 “Cho·raʹzin an Beth·saʹi·da! Bummahz fo you cuz you goin suffa! Cuz if Tyre an Siʹdon wen see da miracles dat wen happen in yoa guys town, dey woulda come sorry long time ago an put on da kine clothes fo show dey sad an sit down in ashes.
14 I tell you dat da day goin come fo God judge peopo, an goin be moa betta fo Tyre an Siʹdon den fo you.
15 Eh Ca·perʹna·um, you tink God goin lif you to heaven? No! You goin down to da Grave!*
16 “Whoeva lissen to you, lissen to me. An whoeva rejeck you, rejeck me too. An whoeva rejeck me, rejeck da One who wen sen me.”
17 Den da 70 guys come back all stoked, an dey tell: “Lord, even da demons lissen us wen we use yoa name.”
18 Wen he hea dat, he tell um: “I can awready see Satan falling jus like lightning from heaven.
19 Try look! I wen give you da powa* fo stomp on snakes an scorpions,* an fo be moa strong den oua enemy, an no moa notting dat goin hurt you.
20 But no be happy jus cuz da demons lissen you, but you should be happy cuz God wen write yoa names in da heavens.”
21 Right den an dea, God give Jesus his powa an he wen come supa happy, an he tell: “Faddah, you wen make da earth an da heavens, an I like evrybody know you awesome! Cuz you wen hide dese tings real good from da guys dat tink dey so smart an you wen show um to da guys dass humbo like litto kids. Faddah, dis da way you wen like um fo be.
22 My Faddah had give me evryting. Nobody know who da Boy iz, ony da Faddah. An nobody know who da Faddah iz, ony da Boy. An nobody can get fo know da Faddah unless da Boy like teach um about Him.”
23 Den he turn to his guys an tell dem on da side: “Da ones dat get fo see all dese tings stay happy.
24 Cuz I telling you, plenny prophets an kings wanted fo see da tings you see an hea da tings you hea, but dey neva have chance.”
25 An den one guy dat know da Law real good wen stan up fo try tes Jesus. He tell: “Teacha, wat I gotta do fo live foeva?”
26 He sed to him: “Wat da Law tell? Wat you undastan from um?”
27 Da guy say: “You gotta love Jehovah* yoa God wit yoa whole heart, wit yoa whole life,* wit how you tink,* an wit all yoa powa”* an “you gotta love odda peopo jus like how you love yoaself.””
28 Jesus tell um: “Right on, you get um. No stop doin dis an you goin live foeva.”
29 Cuz he like prove he doin evryting right, he ask Jesus: “Who da odda peopo I gotta love?”
30 Jesus tell um: “One guy wuz goin down from Jerusalem to Jerʹi·cho wen some crooks had jump um. Dey take evryting he get an beat um up. Dey dig out an leave um fo dead.
31 Jus so happen had one pries walking down da road. Wen he see da guy, he walk pass on da odda side of da road.
32 Same ting, had one Levite, an wen he see da guy, he pass by on da odda side of da road too.
33 But had one Sa·marʹi·tan dat wuz on da road. An wen he see da guy, he feel plenny pity an like do someting.
34 So he go by him an put oil an wine on his cuts, den bandage um. Den he put him on top his donkey an take um to one inn an wen take kea him.
35 Da nex day he give two de·narʹi·i* to da owna of da inn an tell um: “Take kea him, an if you spen moa den dis, I goin pay fo um wen I come back.”
36 Wat you tink? Outa dese three guys, who wen show love to da guy dat got jumped?”
37 He sed: “Da guy dat show pity to him.” Den Jesus tell um: “Go an do da same ting.”
38 Den Jesus an his guys wen go inside one village. Ova dea, one wahine named Martha wen invite him fo come eat her house.
39 She had one sistah named Mary. She wen sit down at da Lord’s feet fo keep lissening to wat he wuz telling.*
40 But Martha wuz busy doin all kine tings fo make ready fo dem eat. So she come by Jesus an sed: “Eh Lord, you no kea dat my sistah leave me fo do evryting by myself? Tell her fo come help me.”
41 But da Lord sed to her: “Martha, Martha, you stay worry an stress ova plenny tings.
42 Ony need litto bit, or jus one ting. Mary wen pick wass moa betta,* an nobody goin take dat away from her.”
Footnotes
^ At dat time, wen peopo would say howzit dey would hug an kiss each odda an talk long time.
^ Or, “authority”.
^ Ova hea, snakes an scorpions rep tings dat can hurt you.
^ Or, “yoa whole mind”. Dis mean use yoa brains fo know God fo love him moa.
^ Or, “strength”.
^ In da original Greek dis wen mean “lissen to his word”.
^ Or, “da bes ting”.
