Wat Luke Wen Write 1:1-80
1 Plenny peopo wen put in da work fo colleck an write down all da tings dat wen happen. Dese tings we full on trus.
2 Wuz pass down to us from da guys dat wen see um from da start wit dea own eyes an dat wen tell da good news.
3 So, Mista The·ophʹi·lus, I wen make up my mind fo look into evryting real good, so dat I can write um down fo you in one way dat make sense.
4 Den you can know dat all da tings you wuz taught by word of mout stay tru.
5 Wen Herod* wuz king of Ju·deʹa, had one pries named Zech·a·riʹah dat wuz part of one hui of pries guys named afta A·biʹjah. His wife wen come from Aaron’s ohana, an her name wuz Elizabeth.
6 Both of dem wuz pono wit God. Dey wen do all da tings Jehovah* wen tell dem fo do.
7 But dey neva have kids cuz Elizabeth no could come hapai, an dey wuz old awready.
8 Wuz his hui’s turn fo serve at da tempo, so Zech·a·riʹah go in front God fo do da pries job.
9 Wuz his turn fo go inside da tempo of Jehovah an burn incense, cuz dass wat da pries guys always do.
10 An all da peopo wuz outside praying dat time.
11 Jehovah’s angel wen show up in front him, standing on da right side of da incense altar.
12 But wen Zech·a·riʹah see dat, had bodda him plenny an he come real sked.
13 But da angel sed to him: “No be sked Zech·a·riʹah, cuz God wen hea wat you been praying real hahd fo, an yoa wife Elizabeth goin give you one boy, an you goin name um John.
14 You goin be supa happy, an plenny oddas goin be stoked wen he born,
15 cuz Jehovah goin give him one spesho kuleana. But he no can drink wine or any odda alcohol drink, an he goin get powa from God even from befoa he born.
16 An he goin help plenny Israel peopo come back to Jehovah dea God.
17 Anodda ting, he goin go ahead of him* wit da same powa like E·liʹjah, fo make one faddah’s heart come like one kid’s heart,* an help da guys dat no lissen fo come akamai an do wass right, fo get da peopo ready fo Jehovah.”
18 Zech·a·riʹah tell da angel: “How I know dis goin happen fo shua? Cuz I old an my wife old too.”
19 Den da angel tell him: “My name Gaʹbri·el, I stan in front God, an he wen sen me fo talk to you an tell you dis good news.
20 But now, you not goin be able fo talk til dese tings come tru, cuz you neva believe wat I sed. All dis goin happen wen da right time come.”
21 Meantime, da peopo wuz waiting outside fo Zech·a·riʹah, an dey wonda how come he taking so long fo come outside da tempo.
22 Wen he come out, he no could talk to dem. Dey figga he musta seen someting unreal* from God in da tempo. He keep making signs to dem wit his hands, but he no could talk.
23 Wen his time fo work at da tempo wuz pau, he go home.
24 Some time layta, his wife Elizabeth wen come hapai. She neva leave da house fo five months, an she tell:
25 “Look wat Jehovah wen do fo me. He pay attention to me fo take away my shame.”*
26 Wen she wuz six months pregnant, God wen sen da angel Gaʹbri·el to Nazʹa·reth, one town in Galʹi·lee,
27 fo see one virgin dat wuz goin marry one guy name Joseph from David’s ohana. Her name wuz Mary.
28 Wen da angel go to her, he sed: “Aloha Mary, you so spesho to Jehovah, an he stay wit you.”
29 Wen Mary hea dis, she come all shook up an try fo figga out how come he say dat.
30 So da angel sed to her: “No be sked Mary, cuz God stay happy wit you.
31 An try look! You goin come hapai an give birth to one boy an you goin name him Jesus.
32 Dis one goin be importan an goin be called Son of da Mos High God, an Jehovah God goin make him king like David his faddah,
33 an he goin rule az King ova Jacob’s house foeva, an his rule neva goin end.”*
34 But Mary sed to da angel: “How can? Cuz I not having sex wit nobody.”
35 Da angel tell her: “Da Mos High goin give you his powa, an it goin cova ova you. An dass how come da one born not goin have sin an goin be called God’s Boy.
36 An try look! Even yoa relative Elizabeth stay hapai wit one boy, no matta she old. She no could have kids, but she stay six months pregnant awready.
37 No moa notting God no can do.”
38 Den Mary sed: “I one girl dat work fo Jehovah! Let um happen to me da way you sed.” Den da angel go away from dea.
39 Afta dat, Mary no wase time an she go travel up mauka to one town in Judah,
40 wea Zech·a·riʹah live. Wen she go inside da house she tell Elizabeth aloha.
41 Wen Elizabeth hea Mary tell dat, da bebe inside her wen move, an God give Elizabeth his powa
42 an she tell real loud: “You da mos blessed outa all da wahines, an da bebe you goin have stay blessed too!
43 So how I get dis spesho chance fo have da maddah of my Lord come see me?
44 Soon az I hea you say aloha, I could feel da bebe inside me moving aroun cuz he stay all excited.
45 An you, da one who wen believe, stay happy, cuz you goin see Jehovah make all dese tings happen.”
46 An Mary sed: “I* praise Jehovah wit evryting inside me,
47 an my heart stay so happy cuz of wat God, da One dat save peopo, wen do fo me
48 cuz he seen me, his worka, even tho I nobody spesho. An from now on, all da generations goin say dat I stay happy,
49 cuz da One wit all da powa wen do awesome tings fo me, an his name stay holy,
50 an he goin show pity foeva to all da guys dat get plenny respeck fo him.
51 He wen use his arm fo do powaful tings. He scatta da guys dat ony like do tings dea own way.
52 He wen bring down guys wit plenny powa an raise up da humbo guys.
53 He wen give plenny good tings to da guys dat need um an sen away da rich peopo wit notting.
54 He wen help his servants, da Israelites, an show dem pity cuz he no foget his promise
55 to Abraham an his kids foeva, jus like he wen tell oua ancestas.”
56 Mary stay wit her fo about three months an den she go home.
57 Da time come fo Elizabeth give birth, an she wen born one bebe boy.
58 Her family an neighbas hea dat Jehovah had show her plenny pity, an evrybody wuz supa happy.
59 Eight days layta, da time come fo circumcise* da bebe, an dey wuz goin name um afta his faddah, Zech·a·riʹah.
60 But his maddah sed: “No! His name goin be John.”
61 But dey sed to her: “Nobody in yoa ohana get dat name.”
62 Den dey make signs wit dea hands to Zech·a·riʹah fo ask him wat he like name da boy.
63 So he ask fo someting fo write on top, an he write: “His name iz John.” Dis had blow dea mind.
64 Right den an dea, he could talk again an he start fo praise God.
65 An all da peopo dat live aroun dea no could believe wat wen happen, an evrybody wuz talking about um all ova Ju·deʹa.
66 Evrybody dat hea about um wen wonda: “Wat dis boy goin do wen he grow up?” Cuz wuz clear dat Jehovah wuz wit him.
67 Den God’s powa wen move Zech·a·riʹah, John’s faddah, fo tell:
68 “Praise Jehovah, da God of Israel, cuz he wen pay attention to his peopo an free dem.
69 An he give us somebody strong* from David’s family fo save us,
70 jus like he wen promise thru his prophets from long time ago,
71 fo save us from oua enemies an all da guys dat hate us.
72 He goin show us pity jus like he wen promise oua ancestas an he goin rememba his spesho deal,
73 da one he wen swear to oua ancesta Abraham,
74 so dat afta he save us from oua enemies, he give us da chance fo worship him wit no fear,
75 an fo be faithful, an do evryting da way God like fo all oua life.
76 An you, my boy, you goin be one prophet fo da Mos High. Jehovah goin sen you befoa him fo make tings ready fo him,
77 fo let his peopo know dat he goin save dem by letting go dea sins.
78 Oua God goin do all dis cuz he get one big heart an feel plenny fo us. An his pity goin shine ova us jus like da sunrise,
79 fo give light to da guys dass sitting in da dark wea death cova dem jus like one shadow, an fo show us wat we gotta do fo get peace.”
80 An da boy wen grow up an come strong cuz of God’s powa. An he wen live in da boonies til da time come fo him go tell God’s message to da Israel peopo.
