Wat Luke Wen Write 19:1-48
19 Den Jesus go inside Jerʹi·cho an wen walk thru da town.
2 Had one guy named Zac·chaeʹus dea. He wuz one of da main tax collectas, an he wuz rich.
3 He wuz trying fo see who dis Jesus guy wuz, but he no could see cuz had plenny peopo an he wuz short.
4 So he go run ahead of da crowd an climb one tree* fo get one betta look cuz Jesus wuz goin pass thru dea.
5 Wen Jesus get dea, he look up an tell um: “Hui Zac·chaeʹus, hurry up an come down, cuz I goin stay yoa house today.”
6 So quick he climb down an wuz stoked fo Jesus come his house.
7 Wen evrybody see dat, dey grumbo: “How’s him? He goin stay at one sinnaz house.”
8 But Zac·chaeʹus stan up an tell Jesus: “Lord, I stay giving half my stuff to da pooa. An wateva I wen rip off from peopo,* I giving um back to dem, four times moa.”
9 Wen Jesus hea dis, he tell: “Today God wen save dis guy an his family, cuz he one of Abraham’s kids too.
10 Cuz da Son of man* wen come fo look fo an save da guys dat wuz los.”
11 Wen dey wuz lissening to all dis, he tell anodda story fo teach dem, cuz he wuz nea Jerusalem an dey figga wen he get dea, den boom! God’s Govament wuz goin come.
12 So he tell dem: “Had one guy dat wuz da son of one king. He wen go far away fo get set up fo come one king. Afta dat, he come back.
13 Befoa he leave, he get ten of his workas togedda. He give um ten miʹnas* an tell dem: “Go do bizness wit dis til I come back.”
14 But da odda peopo dat live ova dea hate him, an dey sen guys to him fo say, “We no like you be king ova us.”
15 “Bumbye, afta he come king,* he go back an call da workas he wen give da money to. He wanted fo find out how much money* dey had make.
16 So da firs guy come an tell, “Boss, I wen make ten miʹnas wit da one you wen give me.”
17 He tell um, “Right on! You one good worka! Cuz you wen show I can trus you wit dis small ting, you goin be in charge of ten towns.”
18 Da secon guy come an tell, “Boss, I wen make five miʹnas wit da one you wen give me.”
19 He tell dis one, “You too, you goin be in charge of five towns.”
20 But anodda guy sed, “Boss, hea yoa miʹna back. I wen hide um in one cloth.
21 Dass cuz I sked of you. You one bad guy. You take money dat you neva work fo, an you harves wea you neva plant.”
22 He sed to him, “You show you good fo notting by wat you yoaself wen say. You know I one bad guy. I take money dat I neva work fo an harves wat I neva plant.
23 So how come you neva put my money in da bank? Den wen I come back, I woulda colleck um wit interest.”
24 “So he tell da guys standing by him, “Take da miʹna from him an give um to da guy dat get ten miʹnas.”
25 But dey tell him, “Boss, he awready get ten miʹnas!”
26 Da boss say, “Evrybody dat get, goin get moa. But da guy who no moa dat much, even da litto bit he get, goin get taken away.
27 Anodda ting, go get da guys dat neva like me be king ova dem an kill um in front me.””
28 Afta Jesus say dis, he go up Jerusalem.
29 Wen he get nea Bethʹpha·ge an Bethʹa·ny on da Mount of Olives, he sen two of his guys,
30 an he tell dem: “You know dat town you see ova dea? Go, an afta you get dea, you goin find one young donkey tied up dat nobody eva wen sit on top yet. Untie um an bring um ova hea.
31 But if anybody ask you, “Wat you doin untying da donkey?” tell dem, “Da Lord need um.””
32 Da guys he wen sen had find da donkey jus like how he sed.
33 But wen dey wuz untying da donkey, da ownas sed to dem: “Wat you doin untying da young donkey?”
34 Dey sed: “Da Lord need um.”
35 So dey take um to Jesus, an dey put dea coats on um, an Jesus sit on top um.
36 Az he wuz riding da donkey, peopo wuz putting dea coats on da road.
37 Right wen he come nea da road dat go down da Mount of Olives, plenny of his followas come supa happy an start fo praise God real loud cuz of da unreal tings dey had see.
38 Dey tell: “Da one who come az King in Jehovah’s* name iz da one who stay blessed! Peace between heaven an us, an praise God who stay in heaven!”
39 But some of da Pharisees* in da crowd tell: “Teacha, scold yoa guys.”
40 But Jesus sed: “I tell you, if dese guys neva say notting, da rocks would yell out.”
41 Wen he come close to Jerusalem, he wen look da town an start fo cry real hahd.
42 He tell: “If ony you had undastan da tings dat would give you peace. But now you no can see dese tings.
43 Cuz da time goin come wen yoa enemies goin surround you. Dey goin close you in wit pointed stakes an attack you.
44 Dey goin pound you an all yoa kids to da groun, an all dese stones goin get knock ova. Dass cuz you neva undastan dat God had come fo judge you.”
45 Den he go inside da tempo an start fo throw out da guys selling stuff,
46 an he tell dem: “Da Scripchas tell, “My house goin be one house of praya,” but you guys wen make um one house of crooks.”
47 He keep teaching evryday in da tempo. But da main pries guys, da scribes,* an da leadas fo da peopo like kill um.
48 But dey no could find one way fo do um, cuz da peopo wuz always aroun him lissening to him teach.
