Wat Mark Wen Write 3:1-35
3 Anodda time, Jesus wen go inside one synagog,* an had one guy dea wit one hand dat no work.
2 So da Pharisees* wuz watching him real good fo see if he wuz goin heal da guy on da Sabbath,* cuz dey wanted fo find someting fo use agains him.
3 Jesus tell da guy wit da hand dat no work: “Stan up an come ova hea in da middo.”
4 Den he tell all dem: “On da Sabbath, wass da right ting fo do? Fo do someting good or do someting bad? Fo save one life* or kill somebody?” But dey neva say notting.
5 Jesus all mad wen he look at dem, an he stay soa inside cuz dey no even kea. So he tell da guy: “Stick out yoa hand.” Da guy stick um out, an his hand wen come good.
6 So da Pharisees go outside, an right away dey get togedda wit Herod’s guys* fo make one plan fo kill Jesus.
7 But Jesus leave ova dea fo go by da sea wit his guys. An choke peopo from Galʹi·lee an Ju·deʹa follow him.
8 Even plenny guys from Jerusalem, Id·u·meʹa, da odda side of da Jordan, an from aroun Tyre an Siʹdon wen come by him afta dey hea about all da tings he wuz doin.
9 An he tell his guys fo get one small boat ready fo him so dat all da peopo no push agains him an smash him.
10 Cuz he wen heal so much peopo, all da guys dat wuz real sick wen come aroun him fo touch him.
11 Even wen da demons* see him dey would fall down in front him an yell: “You God’s Boy.”
12 But plenny times he tell dem strait fo no tell nobody who him.
13 He go up one mountain an call da guys he wen choose fo come, an dey wen follow him.
14 An he pick 12 guys an call um aposals. Dese da guys dat would go wit him an he would sen dem out fo tell da good news
15 an dey get da powa* fo hemo da demons.
16 An da 12 guys Jesus wen pick wuz Simon, dat he also call Peter,
17 James an John, dass Zebʹe·dee’s boys (he also call dem Bo·a·nerʹges, dat mean “Sons of Tunda”),
18 Andrew, Philip, Bar·tholʹo·mew, Matthew, Thomas, James, dass Al·phaeʹus boy, Thad·daeʹus, Simon, he da one dat jus give um all da time,*
19 an Judas Is·carʹi·ot, who bumbye wen stab Jesus in da back an sell um out to da guys dat hate um.
Den Jesus went inside one house,
20 an all da peopo wen come aroun again, so dat dey neva even have time fo eat.
21 But wen his ohana hea about um, dey go fo take him away. Dey wuz saying: “Da buggah goin pupule.”
22 An da scribes* who wen come down from Jerusalem wuz saying: “Be·elʹze·bub* stay in charge of him, an he kick out da demons cuz da rula of da demons give um da powa fo do dat.”
23 So afta telling da scribes fo come by him, he use exampos fo talk to dem. He tell: “How Satan can kick out Satan?
24 If one country stay split up an go agains each odda, dat country not goin be strong.
25 An if one family stay split up an go agains each odda, dat family goin fall apart.
26 Same ting wit Satan, if he fight agains himself, he not goin be strong, an dass it fo him.
27 Nobody dat go inside one strong guy’s house can steal his stuff if dey no tie him up firs. Ony afta you tie him up you can take all his stuff.
28 I tell you fo shua dat God can fogive peopo no matta wat kine sins dey do an wat kine bad stuffs dey say.
29 But whoeva talk stink an go agains God’s powa neva eva goin get let go fo dat, but goin be guilty foeva.”
30 He tell all dis stuff cuz dey wuz saying: “He get one demon.”
31 Jesus maddah an braddahs wen come an stan outside, an dey sen somebody fo call him.
32 Had plenny peopo sitting aroun him, an dey tell um: “Hui, yoa maddah an braddahs stay hea, an dey asking fo you.”
33 But he sed to dem: “Who my maddah, an who my braddahs?”
34 Den he look at all da guys sitting aroun him an sed: “Try look, dis my maddah an my braddahs!
35 Whoeva do wat God like, dey my braddah an sistah an maddah.”
Footnotes
^ Go check out “Herod’s Guys” in Da Bible Dictionary.
^ Or, “authority”.
^ Or, “da Cananaean”. Dis no mean he came from Cana but wuz one name fo describe him an tell him apart from Simon Peter.
^ Anodda name fo Satan.
