Wat Mark Wen Write 12:1-44
12 Den he start fo use stories fo talk to dem: “One guy wen plant grapes on his land an put up one fence aroun um, dig one place fo smash da grapes, an put up one towa. Den he wen lease da land to farmas, an he go travel.
2 Wen came time fo harves, he sen his worka to da farmas fo get some of da grapes.
3 But da farmas grab um, beat um up, an sen um away wit notting.
4 He sen anodda worka to dem, but dey wack his head an make um shame.
5 So he sen one moa guy, an dey wen kill um. An he sen plenny oddas, some dey beat up an oddas dey kill.
6 He had one moa dat he sen to dem, his son dat he love plenny. He tell: “Fo shua dey goin respeck my boy.”
7 But da farmas tell each odda, “Dis da one dat goin own da farm. We go kill um, den da land goin be ouas.”
8 So dey grab um, kill um, an drag um outside da farm.
9 Wat da owna of da farm goin do? He goin come an kill dem an give da land to odda farmas.
10 You neva read dis scripcha? Da one dat tell: “Da stone dat da buildas neva like wen come da mos importan stone.*
11 Dis one come from Jehovah,* an dass awesome fo see.””
12 Wen dey hea dat, dey wanted fo grab* Jesus cuz dey know he wuz talking about dem. But dey wuz sked of da peopo, so dey leave him an go away.
13 Den dey sen him some of da Pharisees an Herod’s guys* fo trick Jesus fo say someting wrong.
14 Wen dey get dea, dey sed to him: “Teacha, we know you tell da trut an teach da trut about God, an you no kea wat peopo tink about you, no matta who dem. Az right fo pay da tax to Caesar o wat?
15 Gotta pay, or no need?” Cuz he know dey wuz acking fake, he tell dem: “How come you guys trying fo tes me? Bring me one de·narʹi·us* fo look at.”
16 Dey bring one an he sed to dem: “Whose picha an name stay on hea?” Dey sed to him: “Caesar’s.”
17 Den Jesus sed: “So den, give Caesar wat stay his, but give God wat stay His.” Wen dey hea dat, had blow dea mind.
18 Den da Sadducees,* da guys dat no believe in da resurrection, come an ask him:
19 “Teacha, Moses wen write dat if somebody’s braddah die an he no moa one kid, he gotta marry da wife of da braddah dat wen mahke fo have kids fo him.
20 We know seven braddahs. Da firs one wen marry one wahine but had die befoa he had kids.
21 An da secon braddah wen marry her but wen die befoa having kids. Same ting happen wit da third one.
22 All seven braddahs wen die befoa dey had kids. Den da wahine die too.
23 So wen da seven guys come back alive, who da wahine goin be married to? Cuz dey all had marry her.”
24 Jesus sed to dem: “Dass how come you guys get um all wrong, cuz you donno da Scripchas or da powa God get.
25 Cuz wen dey come back alive, guys an wahines not goin marry, but goin live jus like angels in heaven.
26 But talking about da dead coming back to life, you neva read wat God sed to Moses at da burning bush: “I da God fo Abraham, da God fo Isaac, an da God fo Jacob”?
27 You guys tinking iz way off. He da God fo da guys dat stay alive, not da dead.”
28 One of da scribes* hea dem talking about all dis stuff. He know Jesus wen give one good ansa, so he ask him: “Wass da numba one* rule?”
29 Jesus ansa: “Da numba one rule iz, “Lissen up Israel, Jehovah oua God iz one Jehovah.
30 An you gotta love Jehovah yoa God wit yoa whole heart, yoa whole life,* wit how you tink,* an wit all yoa powa.”*
31 Dis da secon rule, “You gotta love odda peopo jus like how you love yoaself.” No moa any odda rule moa importan den dese two.”
32 Da scribe tell him: “Teacha, right on, dass tru wat you sed, “Ony get one God, an no moa anodda God, jus Him”,
33 an fo love him wit yoa whole heart, wit evryting you tink, an wit all yoa powa, an fo love oddas jus like how you love yoaself, iz worth way moa den all da animal sacrifices.”
34 Cuz Jesus see he give one good ansa, he tell him: “You almos dea fo go inside God’s Govament.” But nobody had da guts fo ask him anymoa questions.
35 But Jesus keep teaching in da tempo. He sed: “How come da scribes tell dat da Christ iz David’s boy?
36 God’s powa wen make David say, “Jehovah wen tell my Lord: “Sit ova hea on my right side til I put yoa enemies unda yoa feet.””
37 David call him Lord, so how he can be his boy?”
An all da peopo wuz happy fo lissen to wat he had fo say.
38 Wen he teach he tell: “Watch out fo da scribes who like fo walk aroun in long robes an dey like peopo give dem spesho attention wen dey greet dem in da market.
39 Dey like da front* seats in da synagogs* an fo sit in da mos importan place at da dinna table.
40 Dey take da widows stuffs,* an make long prayas ony fo show. Dea punishment goin be moa heavy den oddas.”
41 Den Jesus go sit down wea he can see da donation boxes an he start fo watch how all da peopo wuz dropping money in dose boxes. An all da rich guys wuz putting in plenny coins.
42 Den one widow dat wuz pooa wen come an drop in two small coins dat no wuz worth dat much.*
43 So he call his guys ova to him an tell dem: “Fo shua, dis pooa widow put in moa den all da odda guys dat put money in da donation boxes.
44 Cuz dey wen all drop in da money dey had lef ova. But even tho she wuz real pooa, she give all da money she had, evryting she had fo live on.”
Footnotes
^ In da original Greek dis wen mean “main corna stone”. In one building, dass wea two walls meet.
^ Or, “arrest”.
^ Go check out “Pharisees” an “Herod’s Guys” in Da Bible Dictionary.
^ Or, “mos importan”.
^ Or, “yoa whole mind”. Dis mean use yoa brains fo know God fo love him moa.
^ Or, “strength”.
^ Or, “bes”.
^ In da original Greek dis wen mean “houses”.
^ In da original Greek dis wen mean “two lepta”. One lepton iz da smalles Jewish coppa or bronze coin.
