Wat Mark Wen Write 13:1-37
13 Wen Jesus went outside da tempo, one of his guys sed to him: “Teacha, try check out all dese big stones an unreal buildings! Awesome ah?”
2 But Jesus sed to him: “You see all dese awesome buildings? All dese stones goin get knock ova an thrown down.”
3 Wen Jesus wuz sitting on da Mount of Olives wea could see da tempo, Peter, James, John, an Andrew come by him wen nobody else wuz aroun an ask:
4 “Try tell us, wen dis stuff goin happen, an wass da sign fo know wen all dese tings goin pau?”
5 So Jesus start fo tell dem: “Watch out dat nobody lead you da wrong way.
6 Plenny guys goin use my name an tell, “I da guy,” an goin lead choke peopo da wrong way.
7 An wen you hea about wars close by an far away, no come sked, cuz all dis gotta happen. But az not da end yet.
8 “Cuz one country goin fight anodda country, one govament goin fight anodda govament, not goin have nuff food an goin get earthquakes all ova. All dis iz ony da start of peopo suffaring, like one wahine about fo give birth.
9 “You guys, be keaful. Cuz you my followas, peopo goin make you go in front da judge an beat you in da synagogs* an bring you in front govnas an kings, an you goin get chance fo tell dem about me.
10 But firs, peopo in all da countries gotta hea da good news befoa da world pau.
11 An wen dey turn you in, no worry about wat you goin say. Right den an dea, say wat come to yoa mind, cuz az not you talking, but az God’s powa.
12 Anodda ting, peopo goin turn in dea braddah or dea kid to da guys dat goin kill dem, an kids goin turn agains dea maddah an faddah fo have dem killed.
13 An evrybody goin hate you cuz you my followa. But God goin save da guy dat hang in dea til da end.
14 “So wen you see da pilau ting dat buss up evryting standing wea not suppose to be (whoeva read dis, make shua you undastan um good), den da guys in Ju·deʹa should start fo run to da mountains.
15 Da guy on da roof betta not come down or go inside his house fo grab stuffs.
16 An da guy in da field betta not go back fo pick up his clothes.
17 Bummahz fo da wahines dat stay hapai an dose nursing one bebe dat time!
18 Pray dat you no gotta dig out in da winta.
19 Cuz goin get mayjah hahd times dat neva had happen befoa since da time God wen make da world, an neva goin happen again.
20 If Jehovah* neva cut dat time short, nobody would be saved. But cuz of da peopo God wen choose, he cut um short.
21 “Den if anybody say to you, “Ho! Try look! Da Christ stay hea” or “He stay dea!” no believe um.
22 Cuz goin get fake Christs an fake prophets an dey goin try do unreal stuff fo make da ones God wen choose go da wrong way, if can.
23 I wen tell you guys awready wat goin happen, so watch out.
24 “But dose days, afta dat real hahd time, da sun goin come dark, an da moon not goin shine,
25 an da stars goin fall from da sky, an da powas dass in da heavens goin shake.
26 An den dey goin see da Son of man* coming in da clouds wit plenny powa an awesomeness.
27 An den he goin sen out da angels an gadda togedda da ones God wen choose from evry direction, from wea da earth begin to wea da sky end.
28 “Try learn someting from da fig tree: Az soon az da tree get one new branch an grow leafs, you know dat summa stay nea.
29 Same lidat, wen you see dese tings happening, den know fo shua dat he stay nea, he standing at da doors.
30 I telling you, dis generation not goin die til all dese tings happen.
31 Heaven an earth goin disappea but my words goin stay foeva.
32 “Nobody know anyting about dat day or dat time, not da angels or da Son, ony da Faddah know.
33 Pay attention an be ready, cuz you donno da time God wen choose.
34 Iz like one guy dat wuz goin leave his house an travel far away. He put his workas in charge an give dem kuleana fo take kea of. He tell da guy dat watch da door fo stay ready.
35 So stay ready, cuz you donno wen da owna of da house goin come, wedda in da evening, at midnight, real early in da morning,* or befoa da sun come up,
36 so wen he show up all of a sudden, he no find you sleeping.
37 But wat I tell you, I tell to evrybody: Stay ready.”
Footnotes
^ Go check out “Son Of Man” in Da Bible Dictionary.
^ In da original Greek dis wen mean “wen da roosta crow”. Dis da time from midnight to aroun 3 a.m.
