Wat Mark Wen Write 4:1-41
4 Jesus start fo teach by da sea again, an choke peopo wen come by him. So he go on top one boat an sit down an go away from da shore, but all da peopo stay on da beach.
2 Den he use stories fo teach dem plenny stuffs. He sed to dem:
3 “Lissen up. Try tink, da farma wen go out fo plant seed.
4 Wen he throw da seed, some had fall on da road, an da birds wen eat um up.
5 Odda seeds wen fall on top da rocks, an dey wen grow fas cuz neva have dat much dirt.
6 But wen da sun came up, dey had burn an die cuz neva take root.
7 Some seeds fall in da weeds, an da weeds wen grow an choke um out. An da seeds no could grow, an dey neva give notting.
8 But oddas fall on da good dirt an wen grow an get moa big. An dey wen make moa seeds, some make 30 moa, oddas 60 moa, an oddas 100 moa.”
9 Den he sed: “You guys dat get ears fo lissen, lissen up.”
10 Wen all da peopo leave, some of his odda followas an da 12 guys start fo ask him wat da stories mean.
11 He sed to dem: “God help you guys fo undastan da secrets about his Govament in da heavens. But fo evrybody else I ony goin teach dem wit stories,
12 so dat even tho dey look dey not goin see, an even tho dey hea dey not goin undastan. Dey not goin eva turn back to God so dat He can fogive dem.”
13 Den he sed to dem: “You guys no undastan dis story, so how you goin undastan all da odda stories?
14 “Da farma iz like da guy dat tell God’s message.
15 Some guys iz like da seeds dat wen fall on da road wea da farma wuz planting. Dese da guys dat wen hea da message, but Satan come an take away wat wuz planted inside dem.
16 Odda guys iz like da seeds dat wen fall on top da rocks. Az soon az dey lissen da message, dey like wat dey hea an real fas dey believe um.
17 But ony fo litto while dey believe, cuz dey neva grow roots in dea heart. Az soon az dey get hahd times or wen oddas make dem suffa cuz of da message, dey give up.
18 Get oddas dass like da seeds dat wen fall in da weeds. Dey da ones dat hea da message,
19 but da stress from dis world* an da powa of money fool dem. An cuz dey always goin afta wateva dey like, dat affeck dea heart an choke da message. An dey come jus like one plant dat no make new seeds.
20 Da guys dat lissen iz like da seeds dat wuz planted in da good dirt. Dey lissen to da message an trus um, an dey make moa seeds. Some make 30 moa, oddas 60 moa, an oddas 100 moa.”
21 Den he tell dem: “You no cova up one lamp wit one basket or put um unda da bed, but you put um on da table.
22 No moa notting dass hidden dat not goin be seen, an no moa notting dat stay cova up dat not goin come out in da open.
23 Whoeva get ears fo lissen, lissen up.”
24 Den he tell dem: “Pay attention to wat you hea from me. Cuz how much you pay attention iz how much you goin undastan. An if you do dis, you goin undastan even moa.
25 Whoeva undastan stuff, he goin undastan some moa. But whoeva undastan ony litto bit, even dat he goin lose.”
26 Jesus tell some moa: “God’s Govament iz jus like wen one guy throw seeds on da groun.
27 He go sleep at night an wen he wake up, da seeds sprout an grow big. How dis happen, he donno.
28 Da plant grow by itself litto by litto, firs da stem, den da head, den da full grain dass ready fo pick.
29 But az soon az da grain stay ripe, he go cut um cuz harves time stay hea.”
30 Den he tell: “Wat God’s Govament stay like? Or wat story we can use fo explain um?
31 Iz like one seed from da mustard plant. Wen you firs plant um in da groun, iz moa small den all da odda seeds on da earth.
32 But wen you plant um, it grow an come moa big den all da odda plants. It come one tree wit big branches, so dat da birds can res an hide from da sun.”
33 He use plenny stories lidis fo teach dem God’s message, but ony wat dey could undastan.
34 Fo shua, he no talk to dem witout telling stories. But he would explain wat da stories mean to his guys wen dey wuz by demself.
35 Dat day, wen da sun go down, he sed to dem: “We go da odda side of da sea.”
36 So afta he sen all da peopo away, dey take him in da boat. Had odda boats dea too.
37 Den had one mean storm wit hurricane kine winds, an da waves wuz crashing inside da boat so dat da boat almos wen sink.
38 But Jesus wuz in da back of da boat, sleeping on one pillow. So dey wake him up an tell um: “Teacha! You no kea dat we goin mahke o wat?”
39 So he get up an tell da wind an da waves: “Shh! Nuff awready!” An da wind wen die down, an da watta wen come all glassy.
40 So he tell dem: “How come you so sked? You no moa faith o wat?”
41 But dey wen come real sked an tell each odda: “Who dis guy? Even da wind an da waves lissen him.”
