Wat Mark Wen Write 7:1-37
7 Da Pharisees an some of da scribes* dat wen come from Jerusalem go by Jesus.
2 An dey saw some of his guys eat wit hands dat no wuz clean. Dat mean dey neva wash dea hands.*
3 (Da Pharisees an all da odda Jews no eat unless dey wash dea hands all da way to da elbow, sticking to rules dea ancestas wen make.
4 Wen dey come from da market, dey no eat unless dey wash demself. Get plenny odda rules dey stick to dat wuz pass down to dem, like dipping dea cups, jugs, an coppa pots unda watta.)
5 So dese Pharisees an scribes ask him: “How come yoa guys no follow da rules from oua ancesta guys, but dey eat wit hands dat no stay clean?”
6 He sed to dem: “Isaiah tell all about you two-face guys, “Dis peopo respeck me ony wit dea mout. But inside dea heart, dey no really love me.
7 No sense dey even worship me, cuz dey make like wat man tell iz wat I tell.”
8 You let go God’s rules an you hold on to man’s rules.”
9 Den he tell dem: “You know how fo get away wit not following God’s rules so dat you can keep following yoa own rules.
10 Like how Moses sed: “Respeck yoa maddah an faddah,” an, “Da one dat talk bad to his maddah or faddah, gotta kill um.”
11 But you tell, “If one guy say to his maddah or faddah: “Wateva I get dat can help you out, I wen awready promise fo give um to God,””*
12 so you no let um do anyting fo his maddah or faddah.
13 Cuz of yoa own rules you pass down, you make like wat God tell iz worth notting. An you do some moa tings jus lidis.”
14 So Jesus tell da crowd fo come by him, an he sed: “All you guys ova hea, lissen to me so you can undastan wat I stay talk about.
15 One guy no come pilau from wat go inside him, but he come pilau from wat come outa him.”
16 * ——
17 Jesus leave all da peopo an go inside one house, an his guys start fo ask him wat da stories mean.
18 So he sed to dem: “You guys no undastan wat I talking about too? You donno dat one guy no come pilau from wat go inside him,
19 cuz da ting no go into his heart, but go thru his stomach an den go in da sewer?” Wen Jesus say dis, he make um clear dat all food iz clean.
20 Den he sed: “Wat make one guy pilau iz wat come outa him.
21 Cuz from inside da heart, bad tinking come out dat lead to pilau sex,* stealing, murda,
22 fooling aroun on yoa odda half,* greed, doin evil tings, telling bulais, you no moa shame doin wrong tings,* bein jealous, talking stink agains God, bein proud, an you no moa sense.*
23 All dese worthless tings come from inside one guy an make him pilau.”
24 He leave dea an go to da places aroun Tyre an Siʹdon. Ova dea he go inside one house an he neva like nobody know, but peopo still wen find out.
25 Right away, one lady wit one litto girl dat had one demon* wen hea about Jesus. She come by him an fall down at his feet.
26 She wuz one Greek lady, born in Phoe·niʹcia in Syria, an she keep begging him fo hemo da demon from her girl.
27 But he sed to her: “Firs let da kids eat til dey full, cuz dass no good fo take da food from da kids an throw um to da puppies.”
28 But she tell: “Dass tru Lord, but still yet even da puppies unda da table eat da crumbs from da kids.”
29 Den he sed to her: “Go. Cuz of how you wen ansa, da demon no stay in yoa girl anymoa.”
30 So she wen go home an see her litto girl lying on da bed, an da demon wuz gone.
31 Wen Jesus leave Tyre, he go thru Siʹdon an da De·capʹo·lis* area fo get to da Sea of Galʹi·lee.
32 Ova hea dey bring him one deaf guy who had hahd time talking, an dey beg him fo heal da guy.
33 So Jesus take um away from all da peopo. Den he put his fingas in da guy’s ears, an afta he spit, he touch da guy’s tongue.
34 Den he look up to heaven, take one deep breath, an sed to him: “Ephʹpha·tha,” dat mean, “Open.”
35 So his ears wen open, an he wuz able fo use his tongue, an he start fo talk normal.
36 Den he told dem fo no tell nobody. But da moa he say dat, da moa dey tell wat he wen do.
37 All dis wen full on blow dea mind, an dey sed: “So good evryting he do. He even make da deaf hea an da guys who no could talk, talk.”
Footnotes
^ Dis no mean Jesus guys wuz eating wit dirty hands but dat dey neva follow da extra rules da Jews wen make about washing hands all da way up to da elbow.
^ In da original Greek dis wen mean “corban”. Dass one gif promised to God.
^ Dis verse iz in some Bible translations but no stay in some of da mos oldes Greek writings.
^ Or, “adultery”. Go check out “Fooling Aroun On Yoa Odda Half” in Da Bible Dictionary.
^ Or, “brazen conduct”. Go check out “No Moa Shame Doin Wrong Tings” in Da Bible Dictionary.
^ Or, “not reasonable”. Dis da kine guy dat no like lissen to wass good fo dem, an dey go one way dat no line up wit wat God like.
^ Or, “Ten Towns”.
