Wat Mark Wen Write 10:1-52
-
Marriage an divorce (1-12)
-
Jesus bless da kids (13-16)
-
One rich guy’s question (17-25)
-
Wat you give up fo God’s Govament (26-31)
-
Wuz sed again dat Jesus goin die (32-34)
-
James an John ask fo someting spesho (35-45)
-
Jesus pay da price fo plenny peopo (45)
-
-
One blind guy named Bartimaeus get healed (46-52)
10 He leave ova dea an go to da borders of Ju·deʹa on da odda side of da Jordan Riva, an plenny peopo come aroun him. He start fo teach dem, jus like he always do.
2 An da Pharisee guys* wen come by him cuz dey like tes him. Dey ask wedda one man get da right fo divorce his wife.
3 He ask dem: “Wat da Law from Moses sed fo do?”
4 Dey tell um: “Moses sed dat can write one paypa fo divorce yoa wife, an den tell her fo go.”
5 But Jesus tell dem: “Cuz you guys hahd head, Moses wen write dis rule fo you.
6 But from da start, “God wen make dem one guy an one wahine.
7 Dass why one guy goin leave his faddah an his maddah,
8 an da two goin be jus like dey one,” so dat dey not two anymoa, but dey one.
9 So den, wat God wen put togedda, no let anybody break um up.”
10 Wen dey wuz in da house again, his guys start fo ask him about dis.
11 He sed to dem: “If you divorce yoa wife an you go marry anodda wahine, you goin be guilty of fooling aroun on her.*
12 An if one wahine divorce her husban an marry somebody else, she goin be guilty of fooling aroun on him.”
13 Den peopo start fo bring him litto kids fo him bless dem, but his guys wen scold da parents.
14 Wen Jesus see dis, he get mad an sed to dem: “Leave da kids alone, an let um come by me. No stop dem, cuz God’s Govament goin be fo guys dass like dese kids.
15 I tell you fo shua dat whoeva no accept God’s Govament jus like one litto kid, no way he goin be part of um.”
16 An he hug da kids, put his hands on dea heads, an bless dem.
17 Wen Jesus wuz heading out, one guy run up to him an go down on his knees in front him. Da guy ask: “Good Teacha, wat kine stuff I gotta do fo live foeva?”
18 Jesus sed to him: “How come you say I good? Nobody iz good, ony God.
19 You know da rules: “No murda, no fool aroun on yoa odda half, no steal, no lie about oddas, no cheat nobody, respeck yoa maddah an faddah.””
20 Da guy sed to him: “I stay doin all dis since small kid time.”
21 Jesus look at him an wen feel love fo him an sed: “One ting you still gotta do. Go sell all da tings you get an give da money to da pooa, an den you goin have tresha in heaven dass moa betta. An afta you do dat, come be my followa.”
22 But wat he hea make um sad, an he leave all bum out cuz he had plenny stuffs.
23 Afta he look aroun, Jesus tell his guys: “Goin be real hahd fo guys wit plenny money fo get into God’s Govament!”
24 But wat Jesus tell had shock his guys. Again Jesus sed: “You guys, iz real hahd fo get into God’s Govament!
25 Goin be moa easy fo one camel go thru da eye of one needle den fo one rich guy get into God’s Govament.”
26 Dey wuz even moa shock an tell um:* “How anybody can get saved den?”
27 Jesus look um strait in da eye an tell dem: “Peopo no can do um, but God, he can do anyting.”
28 Den Peter sed: “We wen leave evryting fo follow you.”
29 Jesus sed to dem: “You guys wen leave yoa home, yoa braddahs, sistahs, maddah, faddah, kids, an land cuz of me an da good news.
30 But you goin get 100 times moa now, houses, braddahs, sistahs, maddahs, kids, an land, togedda wit hahd times. An in da future* you goin get fo live foeva.
31 But plenny guys who stay firs now goin be las, an da guys dass las goin be firs.”
32 Wen dey wuz on da road goin up to Jerusalem, Jesus wen go ahead of dem an dey trip out cuz he no sked, but da guys dat wuz wit him wuz getting sked. So he take da 12 guys on da side an start fo tell dem about da tings dat wuz goin happen to him:
33 “Try look! We goin up Jerusalem, an da Son of man* goin get turn ova to da scribes* an da main pries guys. Dey goin judge him fo be killed an goin turn um ova to da peopo dass not Jews.
34 An dey goin tease um, spit on um, beat um up, an kill um, but three days layta God goin raise him up.”
35 James an John, Zebʹe·dee’s boys, go up to Jesus an tell um: “Teacha, we like you do fo us wat we goin ask you.”
36 He tell dem: “Wat you like me do fo you?”
37 Dey sed: “Wen you stay rule, let us sit one on yoa right side an da odda on yoa lef.”
38 But Jesus sed to dem: “You donno wat you stay asking fo. You can drink from da cup I stay drinking, or go thru da baptizum I stay goin thru?”
39 Dey tell him: “Yeah, can.” Den Jesus sed to dem: “Da cup I stay drinking, you goin drink from um, an da baptism I stay goin thru, you goin go thru um too.
40 But az not up to me fo tell who goin sit on my right or lef side. My Faddah goin choose who goin sit dea.”
41 Wen da odda ten guys hea about dat, dey come supa mad wit James an John.
42 But Jesus call all dem ova an sed to dem: “You know dat da rulas of da world boss aroun da peopo dey rule ova, an da big shot guys control peopo wit dea powa.
43 No be like dem. If you like be fo real kine great, you gotta take kea oddas,
44 an if you like be firs you gotta work hahd fo evrybody.
45 Cuz even da Son of man neva come fo oddas take kea him, but wen come fo take kea oddas an give up his life* fo pay da price fo plenny peopo.”
46 Den dey get to Jerʹi·cho. But wen Jesus an his guys an all da peopo wuz leaving dea, Bar·ti·maeʹus (Ti·maeʹus boy), one blind beggar, wuz sitting on da side of da road.
47 Wen he hea dat Jesus da Naz·a·reneʹ wuz passing by, he start fo shout: “Jesus, da one from David’s line, help me!”
48 But all da peopo scold him an tell um fo be quiet. But he yell even moa loud: “Da one from David’s line, help me!”
49 So Jesus stop an wen say: “Tell um fo come by me.” So dey call da blind guy an tell um: “Eh, get up! Go! He stay calling you.”
50 So he hemo his coat, an jump up an go by Jesus.
51 Den Jesus tell um: “Wat you like me do fo you?” Da blind guy sed to him: “Teacha,* I like see.”
52 An Jesus sed to him: “Go. Yoa faith wen heal you.” An right den an dea, he could see an wen start fo follow Jesus.
Footnotes
^ Or, “adultery”. Go check out “Fooling Aroun On Yoa Odda Half” in Da Bible Dictionary.
^ Or might be, “each odda”.
^ Go check out “Son Of Man” in Da Bible Dictionary.
^ Or, “Rab·boʹni”.
