Wat Mark Wen Write 14:1-72
-
Pries guys plan how fo kill Jesus (1, 2)
-
Perfume oil poured on Jesus (3-9)
-
Judas set Jesus up (10, 11)
-
Da las Passova (12-21)
-
Da Lord’s Evening Meal (22-26)
-
Peter goin say he donno Jesus (27-31)
-
Jesus pray in Gethsemane (32-42)
-
Jesus arrested (43-52)
-
Jesus go in front da High Court (53-65)
-
Peter say he donno Jesus (66-72)
14 Two days layta had da Passova* an da Festival Of Bread Dat No Moa Yeast.* Da scribes* an main pries guys wuz trying fo figga out how dey can trap Jesus fo arrest an kill um,
2 but dey tell: “No do um Passova time, cuz da peopo might get all nutz.”
3 Wen Jesus wuz in Bethʹa·ny eating at Simon da leper’s house, one wahine come wit one expensive bottle of perfume oil dat wuz made from nard,* da real stuff. She broke da alabaster jar* open an start fo pour da oil on Jesus head.
4 Wen some of dem see dis, dey get all mad an tell each odda: “Ho! Ony wase dis perfume oil!
5 Coulda sell da oil fo moa den 300 de·narʹi·i* an den give da money to da pooa!” An dey wuz all irraz wit* her.
6 But Jesus sed: “No bodda her. Why you make trouble to her fo? She wen do someting nice fo me.
7 Da pooa guys always goin be aroun, an you can do good tings fo dem weneva you like, but I not always goin be hea.
8 She wen do wat she can. She put dis perfume oil on top me fo make my body ready fo wen I die.
9 So I telling you fo shua, wea eva in da world peopo tell da good news, dey goin talk about wat dis wahine did an nobody goin foget her.”
10 An Judas Is·carʹi·ot, one of da 12 guys, wen go to da main pries guys fo set Jesus up fo dem.
11 Wen dey hea dis, dey wuz happy an dey promise fo give Judas silva money. So he start looking fo one chance fo set up Jesus.
12 On da firs day of da Festival Of Bread Dat No Moa Yeast, wen dey kill da animal fo da Passova sacrifice, his guys sed to him: “Wea you like us go an make ready da place fo you eat da Passova?”
13 So he sen two of his guys an sed to dem: “Go inside da town, an one guy dass carrying one clay watta jar goin meet you. Go wit him,
14 an wateva house he go inside, tell da masta of da house, “Da Teacha sed fo ask you: “Wea yoa guest room stay wea I can eat da Passova wit my guys?””
15 An he goin show you one big room upstairs dass all set up awready. Get da Passova food ready fo us ova dea.”
16 So Jesus guys go into da town an evryting wen happen jus like Jesus sed, an dey make tings ready fo da Passova.
17 Afta da sun go down, he come wit his 12 guys.
18 Wen dey wuz sitting at da table an eating, Jesus sed: “I telling you fo shua, one of you guys dass eating wit me goin stab me in da back.”
19 Dat wen start fo bodda dem plenny, an one by one dey tell: “Lord, not me ah?”
20 Jesus sed to dem: “Az one of da Twelve, da guy dass dipping his bread inside dis bowl wit me.
21 Da Son of man* goin mahke, jus like da Scripchas tell, but goin be horraz fo da guy dat stab da Son of man in da back. Moa betta he no wuz even born.”
22 An while dey wuz eating, he take da bread, pray, broke um up, an give um to dem an tell: “Hea, take um, dis rep my body.”
23 Den he take one cup, sed one praya an give um to dem, an all dem wen drink um.
24 An he sed to dem: “Dis rep my “blood of da New Deal,”* dat goin be poured out fo plenny peopo.
25 I tell you, I not goin drink wine anymoa til da day I drink new wine wit you wen we ruling togedda in God’s Govament.”
26 Afta dey pau sing songs,* dey go to da Mount of Olives.
27 An Jesus sed to dem: “All you guys goin jam up, cuz da Scripchas had tell: “I goin kill da shepherd, an all da sheep goin run away.”
28 But afta I come back alive, I goin go Galʹi·lee an wait fo you dea.”
29 But Peter tell um: “Even if all da odda guys jam up, I not goin.”
30 Jesus sed to him: “I telling you dat tonight, befoa one roosta crow two times, you goin tell dat you donno me three times.”
31 But Peter keep saying: “Even if I gotta die wit you, I not goin eva tell dat I donno you.” An all da odda guys start fo say da same ting too.
32 So dey go to Geth·semʹa·ne, an he tell his guys: “Sit ova hea an I goin go pray.”
33 He take Peter, James, an John wit him, an he start fo worry plenny* an feel real soa inside.
34 He sed to dem: “I* stay all buss up inside, jus like I goin mahke. Stay ova hea an try stay awake.”
35 Den he walk litto bit moa an fall to da groun an start fo pray dat, if can, he no need go thru dis.
36 An he sed: “Abba,* Faddah, you can do anyting. Take dis cup* away from me. But make happen wat you like, not wat I like.”
37 He wen come back an see dem sleeping, an he tell Peter: “Simon, you stay sleeping? You no wuz strong enuff fo stay up fo jus one hour?
38 Stay awake an no stop praying, so dat you no give in to sin. Az tru, one guy like do wass right, but sometimes da body* no stay strong enuff fo do um.”
39 He go away again fo pray, an he ask fo da same tings.
40 Again he come back an see dem sleeping, cuz dey no could keep dea eyes open. An dey neva know wat fo say to him.
41 Den he come back fo da third time an sed to dem: “Dis not da time fo you guys sleep! Nuff awready! Da time stay hea! Try look! Da Son of man stay getting turn ova to evil kine peopo.
42 Get up, we go. Da guy dat goin stab me in da back stay nea.”
43 Right den an dea, wen he wuz still talking, Judas, one of da 12 guys, come wit plenny peopo dat had swords an clubs. Da main pries guys, da scribes, an da eldas wen sen dose guys ova dea.
44 Da one dat wuz goin turn in Jesus wen give dem one sign. He tell: “Da guy I kiss, he da one. Drag um away an lock um up, an no take yoa eyes off him so he no get away.”
45 Den he walk strait up to Jesus an tell: “Teacha!” an he kiss um.
46 So dey grab Jesus an take um away.
47 But one of da guys dat wuz standing dea wen grab his sword an cut off da ear of one worka fo da main pries.
48 But Jesus tell dem: “You come hea fo arrest me wit swords an clubs az if I one crook?
49 Evryday I wen teach in da tempo, but how come you neva arrest me dat time? Dis happen so dat da Scripchas come tru.”
50 An dey all bag from him an run away.
51 But had one young guy dat wen start fo follow him close by, an he wuz ony wearing one expensive linen robe fo cova his naked body. Dey wen try fo grab um,
52 but he wen ditch his robe an get away half naked.*
53 Dey wen bring Jesus to da main pries. Ova dea, all da main pries guys, da eldas, an da scribes wen come togedda.
54 But Peter follow dem from far, all da way to da main pries courtyard. He wuz sitting togedda wit da workas fo da house an wuz by da fiyah trying fo stay warm.
55 Da main pries guys an all da guys in da High Court* wuz looking fo somebody dat would talk agains Jesus so dey could give him da death sentence, but dey no could find notting.
56 Cuz even tho had plenny guys talking bulais agains him, evryting dey wuz saying neva match up wit each odda.
57 An some guys stan up fo tell lies about him. Dey tell:
58 “We wen hea him say, “I goin broke down dis tempo dat man wen make, an in three days I goin build anodda one dat man neva make.””
59 But even wit dis, wat dey wuz saying still neva match up.
60 Den da main pries wen stan up in front dem an ask Jesus: “You no moa notting fo say? You no hea wat dese guys stay telling about you?”
61 But he neva say notting back to dem. One moa time, da main pries start fo question him: “You da Christ? Da Son of God?”*
62 Den Jesus sed: “Dass me. An you goin see da Son of man sitting on da right side of da Powaful One. An he coming wit da clouds of heaven.”
63 Den da main pries rip his clothes an tell: “We no need hea anybody else!
64 He stay talking agains God. Wat you guys tink about all dis?” Dey all sed dat he deserve fo die.
65 Den some of dem start fo spit on him. Dey cova his face an punch um an tell: “Show you one prophet an tell us who hit you!” An da guards slap um in da face an take um away.
66 Wen Peter wuz down in da courtyard, one girl dat work at da main pries house wen come.
67 She see Peter by da fiyah, an she stare at him an tell: “Eh, you wuz wit dat Naz·a·reneʹ guy, Jesus ah?”
68 But he tell: “I donno him an I donno wat you talking about,” den he went outside by da gate.
69 Da girl see um an she tell da guys standing aroun dea again: “He one of dem.”
70 One moa time, Peter deny um. An afta litto while, da guys standing aroun start fo tell Peter too: “Fo shua you one of dem, cuz garanz you from Galʹi·lee.”
71 But Peter tell dat he goin be cursed if he no tell da trut, an he swear: “I donno dis guy you talking about!”
72 An right den an dea, one roosta wen crow one secon time, an Peter rememba wat Jesus sed to him: “Befoa one roosta crow two times, you goin tell you donno me three times.” An he wen break down an cry real hahd.
Footnotes
^ Go check out “Festival Of Bread Dat No Moa Yeast” in Da Bible Dictionary.
^ Dis one oil dat smell real good an come from one plant in da Himalaya mountains. Go check out “Nard” in Da Bible Dictionary.
^ Go check out “Alabaster Jar” in Da Bible Dictionary.
^ Or, “wen scold”.
^ Go check out “Son Of Man” in Da Bible Dictionary.
^ Dis da New Deal between Jehovah an da guys He pick fo go heaven.
^ Dass songs fo praise God.
^ Or, “feel anxiety”.
^ One Hebrew or Aramaic word dat mean “O Faddah!”
^ In da Bible, plenny times da word “cup” wen rep doin wat God like.
^ Or, “flesh”. Dis talking about how man sin an no stay perfeck.
^ Or, “wit ony his undawear”.
^ Go check out “High Court” in Da Bible Dictionary.
^ In da original Greek “God” wen mean, “da Blessed One”.
