Wat Mark Wen Write 9:1-50
-
Da way Jesus look wen change (1-13)
-
Boy wit one demon get healed (14-29)
-
Fo one guy wit faith, anyting can happen (23)
-
-
Wuz sed again dat Jesus goin die (30-32)
-
Aposals beef about who da bes (33-37)
-
“Whoeva no stay agains us stay on oua side” (38-41)
-
Wateva stumbo an jam you up (42-48)
-
“Be like salt” (49, 50)
9 Den Jesus tell dem: “Garanz some of da guys hea not goin mahke til dey see God’s Govament awready coming fo rule.”
2 Six days layta, Jesus take ony Peter, James, an John wit him up one big mountain. Den da way Jesus look wen change in front dem.
3 His clothes started fo glow an come moa white den anybody could eva make um.
4 An dey wen see E·liʹjah an Moses talking story wit Jesus.
5 Den Peter sed to Jesus: “Teacha, we happy we get fo be hea wit you guys! If you like, we goin put up three tents, one fo you, one fo Moses, an one fo E·liʹjah.”
6 Peter neva know wat fo say cuz dey wuz real sked.
7 Den one cloud wen cova dem, an one voice come outa da cloud an tell: “Dis my Boy, da one I love. Lissen to him.”
8 Right afta dat, dey look aroun an nobody wuz dea anymoa, ony Jesus.
9 Wen dey wuz coming down from da mountain, Jesus strait up told dem fo no tell anybody wat dey wen see til afta da Son of man* come back alive.
10 So dey neva tell nobody, but ony talk to each odda about wat dis coming back alive wen mean.
11 An dey start fo ask him: “How come da scribes* tell dat E·liʹjah gotta come befoa da Christ?”
12 He sed to dem: “E·liʹjah goin come firs an make evryting da way suppose to be. But wat dis gotta do wit da Scripchas dat say da Son of man gotta suffa plenny an be treated like he notting?
13 I tell you dis, E·liʹjah had come, an dey wen do wateva dey like wit him, jus like da Scripchas wen say.”
14 Wen dey get to Jesus odda guys, dey see plenny peopo aroun dem, an had scribes arguing wit dem.
15 But wen da peopo see Jesus, had shock dem an dey run up fo meet him.
16 So he ask dem: “Wat you guys stay argue about?”
17 Somebody in da crowd ansa: “Teacha, I wen bring my boy to you cuz he get one demon* dat make um so he no can talk.
18 Weneva it take ova him, it throw him on da groun, he foam at da mout, grind his teeth an he come all weak. I wen ask yoa guys fo hemo da demon, but dey no could do um.”
19 Jesus sed to da crowd: “You guys tinking iz way off an you no moa faith, how long I gotta put up wit you guys? Bring da boy ova hea by me.”
20 So dey bring da boy to him. But wen da demon see Jesus, it make da boy shake real hahd. Da boy fall to da groun, roll all ova, an foam at da mout.
21 Den Jesus ask da faddah: “How long dis been goin on fo?” He tell: “From small kid time.
22 Plenny times it would throw him in da fiyah an inside da watta fo kill um. But if can, pity us an try help us.”
23 Jesus sed to him: “Wat you mean, “If can”? Fo da guy dat get faith, anyting can happen.”
24 Right away da boy’s faddah wen yell: “I get faith! But help me make um moa strong!”
25 Wen Jesus see all da peopo rush dem, he scold da demon an tell um: “Eh, you demon, you make dis boy deaf an no can talk. Get outa him an no eva bodda him again!”
26 Afta it scream real loud an make da boy shake plenny, da demon come out. An da boy look like he had mahke, so mos of da peopo wuz saying: “He stay dead!”
27 But Jesus grab his hand an lif um up, an he wen stan up.
28 Afta Jesus go inside one house, wen dey by demself, his guys ask him: “How come we no could kick out da demon?”
29 He tell dem: “Dis kine strong demon ony can come out wit praya fo God’s help.”
30 Dey leave dea an go thru Galʹi·lee, but he neva like nobody know.
31 He wuz teaching his guys an telling dem: “Da Son of man goin get set up an turn ova to da guys dat hate um, an dey goin kill um. But even tho he goin get killed, he goin come back alive three days layta.”
32 But dey neva undastan wat he sed, an dey wuz sked fo ask him about um.
33 Den dey get to Ca·perʹna·um. Wen Jesus wuz inside da house he ask dem: “Wat you guys wuz beefing about on da road?”
34 But dey neva say notting, cuz dey wuz beefing about who wuz da bes outa all dem.
35 So Jesus sit down an call da Twelve fo come by him an he sed: “If anybody like be da firs, he gotta be da las an he gotta take kea oddas.”
36 Den Jesus call one boy to him an put um in front all dem. He put his arms aroun him an sed to dem:
37 “Whoeva welcome guys dass jus like dese young kids cuz of me, stay welcome me too. An whoeva welcome me, no jus do um to me, but even to da one dat sen me.”
38 John sed to him: “Teacha, we saw somebody using yoa name fo kick out demons from peopo, an we wen try stop um cuz he no follow us.”
39 But Jesus sed: “No try stop um, cuz no moa nobody who goin do unreal tings using my name dat can turn aroun an talk bad about me.
40 Whoeva no stay agains us stay on oua side.
41 An whoeva give you one cup watta fo drink cuz you Christ’s guys, I tell you fo shua, no ways he goin lose out on his blessing.
42 But whoeva stumbo one of dese humbo guys* dat get faith in me, moa betta he hang one huge rock* aroun his neck an get thrown in da deep watta.
43 “If eva yoa hand jam you up, cut um off. Cuz az moa betta you no moa one hand but get life,* radda den you get both hands an get thrown in Ge·henʹna,* in da fiyah dat neva goin burn out.
44 * ——
45 An if yoa foot jam you up, cut um off. Cuz az moa betta you no moa one foot but get life, radda den you get both feet an get thrown in Ge·henʹna.
46 ——
47 An if yoa eye jam you up, rip um out an throw um away. Cuz az moa betta you no moa one eye an you go inside God’s Govament, radda den you get both eyes an go Ge·henʹna,
48 wea da maggot no die an da fiyah no burn out.
49 “Cuz evrybody gotta be salted wit fiyah.
50 Salt iz good, but if da salt no stay salty anymoa, how you goin make um salty again? Be like salt, an keep da peace wit each odda.”
Footnotes
^ Go check out “Son Of Man” in Da Bible Dictionary.
^ Or, “guys who no seem importan dass jus like small kids”.
^ Or, “millstone”. Dis kine huge rock wuz used fo smashing wheat. Go check out “Millstone” in Da Bible Dictionary.
^ Dat mean, fo live foeva.
^ Dis verse iz in some Bible translations but no stay in some of da mos oldes Greek writings.
