Wat Mark Wen Write 11:1-33
11 Wen dey get nea Jerusalem, to Bethʹpha·ge an Bethʹa·ny on da Mount of Olives, Jesus sen two of his guys
2 an tell dem: “You know dat town you see ova dea? Go, an az soon az you get dea, you goin find one young donkey tied up dat nobody wen sit on top yet. Untie um an bring um ova hea.
3 An if anybody ask you, “Wat you doin?” tell dem, “Da Lord need um an goin give um back az soon az he pau.””
4 So dey go an find da young donkey tied up in front da door of one house by da road, an dey untie um.
5 But some guys dat wuz standing dea sed to dem: “Wat you doin untying da young donkey?”
6 Dey tell dem wat Jesus sed, an dey let dem go.
7 An dey bring da young donkey to Jesus, put dea coats on um, an he sit on top um.
8 An choke peopo wen put dea coats on da road, but oddas wen cut leafs from aroun dea.
9 An all da guys dat walk in front an behind him yell: “God, please save him! Da one who come in Jehovah’s* name stay blessed!
10 Da one who goin rule dat come from David’s line stay blessed! We pray to you, who stay in heaven, please save him!”
11 Jesus get to Jerusalem an wen go into da tempo an he look aroun at evryting. But cuz wuz late awready, he go Bethʹa·ny wit da Twelve.
12 Da nex day wen dey leave Bethʹa·ny, he wuz hungry.
13 From far away, he see one fig tree wit leafs, an he go check um out fo see if had anyting on um. But neva have notting, ony leafs, cuz no wuz fig season.
14 So he tell da tree: “Nobody goin eat yoa fruit anymoa.” An his guys wuz lissening.
15 Den dey get to Jerusalem. Ova dea, Jesus go inside da tempo an start fo throw out all da guys buying an selling stuff in dea, an he wen flip ova all da tables of da guys dat wuz changing money an da benches of da guys selling doves.
16 An he no let nobody dat wuz carrying stuff take one shortcut thru da tempo.
17 An he teach da peopo, telling dem: “You neva read in da Scripchas, “My house goin be called one house of praya fo all kine peopo”? But you guys wen make um one house of crooks.”
18 An da main pries guys an da scribes* hea wat he did, an dey look fo one way fo kill um. But dey wuz sked fo do someting to him cuz all da peopo wuz lissening to him.
19 Aroun da time da sun go down, dey go outa da city.
20 But early in da morning wen dey wuz passing by, dey spock da fig tree an wuz dried up, roots an all.
21 Peter wen rememba wat had happen an sed: “Teacha,* try look! Da tree you wen curse stay dry up.”
22 So Jesus tell dem: “You gotta trus God.
23 I telling you, whoeva tell dis mountain, “Get up an jump in da watta,”* if he get faith an no doubt notting, den wat he like happen goin happen.
24 Dass why I tell you, all da tings you pray an ask fo, trus dat you wen get um awready, an you goin get um.
25 An wen you pray, let go wateva you get agains oddas, den yoa Faddah in da heavens goin let you go fo da wrong tings you do.”
26 * ——
27 Again dey go Jerusalem. An wen he wuz walking in da tempo, da main pries guys an da scribes an eldas come
28 an sed to him: “Wat right you get fo do all dis? An who gave you da right fo do um?”
29 Jesus sed to dem: “I like ask you someting firs. Ansa me, den I goin tell you why I get da right fo do dese tings.
30 Wen John had baptize peopo, who wen give him da right fo do dat? God or man? Ansa me.”
31 So dey talk to each odda, “If we tell “God,” he goin tell us, “Den how come you neva believe him?”
32 But if we say, “Man,” wat goin happen to us?” Dey wuz sked of all da peopo cuz dey wen believe John wuz one prophet.
33 So dey ansa Jesus: “We donno.” Jesus tell dem: “Den I no goin tell you why I get da right fo do dese tings.”
