Wat Mark Wen Write 16:1-8
-
Jesus come back alive (1-8)
16 So wen da Sabbath* wuz pau, Mary Magʹda·lene, Mary da maddah of James, an Sa·loʹme wen go buy spices fo put on top Jesus body.
2 Wuz real early in da morning on da firs day of da week.* Wen dey get to da tomb* da sun wen jus come up.
3 Dey sed to each odda: “Who goin roll away da rock in front da tomb fo us?”
4 But wen dey look up, dey see dat da rock awready stay rolled away, even tho wuz real big.
5 Wen dey go inside, dey wuz shock cuz had one young guy in one white robe sitting on da right side of da tomb.
6 He sed to dem: “No be shock. You stay looking fo Jesus da Naz·a·reneʹ who wen get killed on da pos.* He wen come back alive, an he no stay hea. Try look, dis da place wea dey wen put um.
7 But go tell his guys an Peter, ‘He awready goin Galʹi·lee. You goin see him dea jus like he wen tell you.’”
8 So wen dey come outa da tomb, dey run away shaking, an dey no could believe wat dey wen see. An dey neva tell nobody notting cuz dey wuz sked.*
