Wat Matthew Wen Write 20:1-34
20 Den Jesus sed: “Da Govament in da heavens iz like da masta of one house dat wen go early in da morning fo hire guys fo work on his land.
2 Afta dey agree fo work fo one de·narʹi·us* a day, he sen um fo go work his land.
3 Aroun 9 in da morning,* he wen go da marketplace an see oddas standing aroun cuz dey no wuz working.
4 An he tell dose guys: “Go work on my land, an I goin pay you wass fair.”
5 So dey wen go. Afta dat, aroun 12* an 3* in da aftanoon he wen go hire moa workas.
6 Den aroun 5 o’clock* he go out an find odda guys standing aroun an he tell dem: “How come you guys standing hea all day not doin notting?”
7 Dey sed to him: “Cuz nobody hire us.” So he tell um: “Go work on my land.”
8 “Pau hana time, da masta tell da guy in charge: “Call all da workas an go pay dem. Pay da guys dat wen get hired las an end wit da guys dat wen get hired firs.”
9 Wen da 5 o’clock guys come, evry one of dem wen get one de·narʹi·us.
10 So wen da firs guys dat wuz hired come, dey figga dey wuz goin get moa, but dey wen get paid jus one de·narʹi·us too.
11 Wen dey got dea money, dey grumbo about da masta
12 an dey tell: “Dese guys wen ony work one hour. We wen work all day in da hot sun an you pay dem same az us!”
13 But he tell one of dose guys: “Braddah, I neva do notting wrong. You da one wen tell me wuz okay fo pay you one de·narʹi·us.
14 Take yoa money an go. I like pay da guys dat wen come las da same az you.
15 Wat? I no moa da right fo do wat I like wit my own money? Or you stay jealous cuz I wen do one good ting?”
16 Afta dis, Jesus sed: “Da las guys goin be firs an da firs guys goin be las.”
17 Wen dey wuz on da road goin up to Jerusalem, Jesus wen take his 12 guys on da side an tell um:
18 “Try look! We goin up Jerusalem, an da Son of man* goin get turn ova to da scribes* an da main pries guys. Dey goin judge um fo be killed
19 an turn um ova to da peopo dass not Jews. Dey goin tease um, beat um up, an kill um on one pos, an afta three days God goin raise um up.”
20 Den Zebʹe·dee’s wife go up to Jesus wit her two boys, an go down on her knees fo show him respeck. She wanted fo ask him fo do someting.
21 He ask her: “Wat you like?” She tell um: “Promise me dat my two boys goin sit down nex to you in yoa Govament, one on yoa right side an da odda on yoa lef.”
22 Jesus ansa: “You donno wat you asking fo. You can drink from da cup I goin drink?” Dey tell um: “Yeah, can.”
23 He tell dem: “Fo shua you goin drink from my cup. But no stay up to me fo tell who goin sit on my right an lef side. My Faddah goin choose who goin sit dea.”
24 Wen da odda ten guys hea about dat, dey come supa mad wit da two braddahs.
25 But Jesus call all dem ova an sed: “You know dat da rulas of da world boss aroun da peopo dey rule ova, an da big shot guys control peopo wit dea powa.
26 No be like dem. If you like be fo real kine great, you gotta take kea oddas,
27 an if you like be firs, you gotta work hahd fo oddas.
28 Jus like da Son of man neva come fo oddas take kea him, but wen come fo take kea oddas an give up his life fo pay da price fo plenny peopo.”
29 Wen dey wuz leaving Jerʹi·cho, choke peopo wen follow him.
30 An try look! Had two guys dat wuz blind sitting on da side of da road. Dey wen hea dat Jesus wuz coming an wuz goin pass by dem an dey start fo yell: “Help us Lord! Da one from David’s line!”
31 But da peopo scold dem an tell dem fo be quiet, but dey ony wen yell moa loud: “Help us Lord! Da one from David’s line!”
32 So Jesus wen stop an call dem. He sed: “Wat you guys like me do fo you?”
33 Dey tell: “Lord, we like see.”
34 Cuz Jesus wen feel sorry fo dem he touch dea eyes, an right den an dea dey could see, an wen start fo follow him.
Footnotes
^ One Roman silva coin dat wen equal one day’s work.
^ In da original Greek dis wen mean “da third hour” afta da sun come up.
^ In da original Greek dis wen mean “da sixth hour” afta da sun come up.
^ In da original Greek dis wen mean “da ninth hour” afta da sun come up.
^ In da original Greek dis wen mean “da 11th hour” afta da sun come up.
^ Go check out “Son Of Man” in Da Bible Dictionary.
