Wat Matthew Wen Write 13:1-58
-
STORIES ABOUT GOD’S GOVAMENT (1-52)
-
Da farma (1-9)
-
Why Jesus wen use stories (10-17)
-
Wat da story of da farma mean (18-23)
-
Da wheat an da weeds (24-30)
-
Da mustard seed an da yeast (31-33)
-
Prophecy come tru cuz Jesus tell stories (34, 35)
-
Wat da story of da wheat an da weeds mean (36-43)
-
Hidden tresha an da pearl dass worth plenny (44-46)
-
Da lay net (47-50)
-
Old an new kine treshas (51, 52)
-
-
Jesus home town no like him (53-58)
13 On dat day Jesus leave da house an go sit by da sea.
2 Had choke peopo dat wen come by him, so he go on top one boat an sit down. An all da peopo stan on da beach.
3 Den he wen tell stories fo teach dem plenny tings. He tell: “Try tink, one farma wen go out fo plant seed.
4 Wen he throw da seed, some had fall on da road, an da birds wen eat um up.
5 Odda seeds wen fall on top da rocks, an dey wen grow fas cuz neva have dat much dirt.
6 But wen da sun come up, dey had burn an die cuz neva take root.
7 Some of um wen fall in da weeds, an da weeds wen grow an choke um out.
8 But oddas wen fall on da good dirt. An wen dey grow up, one wen make 100 moa seeds, anodda make 60 moa, an anodda 30 moa.
9 You guys dat get ears, lissen up.”
10 So his followas wen ask him: “How come you use stories fo talk to dem?”
11 Jesus tell: “God help you guys fo undastan His secrets about His Govament in da heavens, but He no let dem undastan.
12 Cuz whoeva undastan stuff, he goin undastan some moa. But whoeva undastan ony litto bit, even dat he goin lose.
13 Dass why I tell stories wen I talk to dem. Cuz fo notting dey look, an fo notting dey hea, an dey no undastan.
14 An wat da prophet Isaiah wen tell about dem stay tru: “You goin hea but no ways you goin undastan. An you goin look but you not goin see da point.
15 Dese guys heart wen come hahd az rock. Dey make deaf ear an close dea eyes cuz dey no like lissen an undastan wit dea heart. So dey not goin change an I no can save dem.”
16 “But cuz yoa eyes can see an yoa ears can hea, you stay happy.
17 Cuz I telling you, plenny prophets an odda workas fo God wanted fo see da tings you see an hea da tings you hea, but dey neva had chance.
18 “Now lissen to da story of da farma dat wen plant seed.
19 Whoeva hea about God’s Govament but no get da point, da Devil come an take away wat wuz in his heart. Dis da seed dat wen fall on da road.
20 Da seed dat wen fall on top da rocks, dis da guy dat lissen da message an like wat he hea an real fas he believe um.
21 But ony fo litto while he believe, cuz he neva grow roots in his heart. Wen he get hahd times or wen oddas make um suffa cuz of da message, ony fas he give up.
22 Da seed dat fall in da weeds, dis da guy dat hea da message but da stress from dis world* an da powa of money fool him. Dis choke da message an he come jus like one plant dat no make new seeds.
23 But fo da seed dat fall in da good dirt, dis da kine guy dat hea da message an undastan um. Cuz of dat he make moa seeds, some make 100 times moa, anodda 60 moa, an anodda 30 moa.”
24 Den Jesus tell dem anodda story: “Da Govament in da heavens iz jus like one farma who wen plant good seed on his land.
25 Wen evrybody wuz sleeping, one enemy wen plant weeds wea da wheat stay grow, an den he leave.
26 Wen da wheat grow an make grain, da weeds wen show up too.
27 So da worka guys tell dea boss, “Eh boss, I thought you wen plant good seed on yoa land. So how come get weeds?”
28 He tell dem: “One guy dat hate me wen do dis.” So his worka guys tell him: “So wat, you like us go dig out da weeds?”
29 He tell um: “Nah no do dat, cuz bumbye you might pull out da wheat wen you pull da weeds.
30 Let both of um grow togedda til time fo harves. An den I goin tell da guys dat harves da wheat: Firs go pull da weeds an tie um up so we can burn um, den go harves da wheat an store um.””
31 He tell dem anodda story: “Da Govament in da heavens stay jus like one seed from da mustard plant dat one guy wen plant on his land.
32 Iz moa small den all da odda seeds, but wen it grow, it come one big tree so dat da birds can res on top da branches.”
33 He tell um anodda story: “Da Govament in da heavens stay jus like yeast dat one wahine mix in wit plenny flour til da whole ting come big.”
34 Jesus wen use stories fo tell da peopo all dese tings. Fo shua, he no talk to dem witout telling stories.
35 Dis wuz so dat wat da prophet had tell would come tru: “I goin tell stories fo teach, I goin tell tings peopo neva undastan from wen da world wen start.”*
36 Den afta he tell da peopo fo go, he go inside da house. His followas come by him an tell: “Wat dat mean, da story about da weeds dass growing on top da land?”
37 He tell dem: “Da farma dat plant da good seed iz me.*
38 Da land iz da world, an da good seed iz da guys dat stay part of God’s Govament. But da weeds iz da guys dat lissen da Devil.*
39 An da enemy dat wen plant da weeds, dass da Devil. Da harves iz wen one system goin pau.* An da guys dat harves da wheat iz da angels.
40 An jus like how dey pull da weeds an burn um wit fiyah, dass how goin be wen da system goin pau.
41 I* goin sen my angels fo hemo da guys unda my Govament dat break God’s law an make oddas sin.
42 An dey goin throw dem in da big fiyah. Dass wea dey goin cry real hahd an grind dea teeth.
43 Dat time, da righteous guys goin shine real bright like da sun unda God’s Govament. You guys dat get ears, lissen up.
44 “Da Govament in da heavens iz jus like tresha dat somebody wen hide in one piece land. Den anodda guy find um an hide um again, an cuz he wuz supa stoked, he sell evryting he had fo buy dat piece land.
45 “Da Govament in da heavens iz jus like one trader dat look fo real nice pearls.
46 Wen he find one pearl dass worth plenny, real quick he sell evryting he get so he can buy um.
47 “Da Govament in da heavens iz jus like one lay net dat catch any kine fish.
48 Wen da net wuz loaded, dey wen pull um on da beach. Den dey sit down an put da good fish in baskets, but dey throw away da rubbish kine fish.*
49 Dass how goin be wen da system goin pau. Da angels goin split up da bad guys from da guys dat do wass right
50 an throw dem in da big fiyah. Dass wea dey goin cry real hahd an grind dea teeth.
51 “You undastan all dis?” Dey tell him: “Yeah.”
52 Den he tell dem: “Cuz you undastan, evry teacha dat learn about God’s Govament iz like one guy who own one house, who bring out treshas he get, new kine an old kine.”
53 Wen Jesus pau tell dese stories, he go away from dea.
54 Wen he get to da town wea he wen grow up, he start fo teach dem in da synagog.* Had shock dem how he teach, an dey tell: “Wea dis guy get his smarts from? An how he get da powa fo do dese unreal tings?
55 Dis da carpenta’s boy ah? His maddah not Mary? An his braddahs not James, Joseph, Simon, an Judas?
56 An his sistahs, dey from hea too yeah? So how he can talk lidat an do all dis kine stuff den?”
57 Wen bodda dem plenny how he ack an no way dey wuz goin believe in him. But Jesus tell dem: “One prophet get respeck evrywea, but he no get respeck from his family or wea he come from.”
58 He neva do dat much unreal tings ova dea cuz dey neva have faith.
Footnotes
^ Dis probly talking about from da time Adam an Eve wen have kids.
^ Or, “da Son of man”. Go check out “Son Of Man” in Da Bible Dictionary.
^ In da original Greek dis wen mean “da wicked guy”.
^ Go check out “Wen Da System Goin Pau” in Da Bible Dictionary.
^ Or, “Da Son of man”.
^ Dass da kine fish dass not good fo eat.
