Wat Matthew Wen Write 19:1-30
19 Wen Jesus wuz pau talking, he wen leave Galʹi·lee an come to da borders of Ju·deʹa on da odda side of da Jordan Riva.
2 An plenny peopo wen follow him, an he heal dem ova dea.
3 An da Pharisee guys* wen come by him cuz dey like tes him. Dey ask: “One man get da right fo divorce his wife fo wateva reason?”
4 So he tell dem: “You neva read dat from da start, da one who wen make all us wen make one guy an one wahine
5 an sed: “Dass why one guy goin leave his faddah an his maddah an stay wit his wife, an da two goin be jus like dey one”?
6 So dey not goin be two anymoa, but one. So den, wat God wen put togedda, no let anybody break um up.”
7 Dey tell um: “So den, how come Moses wen tell you can get one paypa fo divorce yoa wife an den tell her fo go?”
8 He tell dem: “Cuz you guys hahd head, Moses wen let you guys divorce yoa wife, but no wuz like dat from da start.
9 I tell you dis, if you divorce yoa wife fo any reason, odda den her sleeping wit somebody else,* an you go marry anodda wahine, you goin be guilty of fooling aroun on her.”*
10 His guys sed to him: “If dass da case fo one guy an his wife, moa betta no even marry.”
11 He sed to dem: “Not evrybody make room fo dat, but ony da guys dat get da gif.
12 Some guys wuz born one eunuch.* Odda guys, peopo wen make dem one eunuch. An oddas choose fo live like one eunuch cuz dey like do moa fo God’s Govament in da heavens. If one guy stay single, dass good.”
13 Den peopo wen bring dea litto kids fo him bless dem an pray fo dem, but his guys wen scold da parents.
14 But Jesus sed: “Leave da kids alone, an let um come by me. No stop dem, cuz da Govament in da heavens goin be fo guys dass like dese kids.”
15 So he put his hands on top dem, an afta dat, he wen go.
16 Den try look! One young guy wen come by him an say: “Teacha, wat kine good stuff I gotta do fo live foeva?”
17 Jesus sed to him: “How come you asking me wat stuff iz good? God iz da ony one dass good. If you like get life, keep doin wat God’s rules tell.”
18 Da guy tell um: “Wat rules iz dat?” Jesus sed: “No murda, no fool aroun on yoa odda half, no cockaroach notting, no lie if you gotta be one witness fo somebody,
19 respeck yoa maddah an faddah, an you gotta love odda peopo jus like how you love yoaself.”
20 Den da guy sed to him: “I stay doin all dis, wat else I gotta do?”
21 Jesus sed to him: “If you like do evryting right, go sell yoa stuff an give da money to da pooa, an den you goin have tresha in heaven dass moa betta. Afta you do dat, come be my followa.”
22 Wen da guy hea dis, he come all bum out an wen leave cuz he had plenny stuffs.
23 Den Jesus tell his guys: “Fo shua, goin be real hahd fo one rich guy get into da Govament in da heavens.
24 I tell you again, goin be moa easy fo one camel go thru da eye of one needle den fo one rich guy get into God’s Govament.”
25 Wen his guys hea dat, had shock dem an dey tell: “How can anybody get saved den?”
26 Jesus look um strait in da eye an tell dem: “Peopo no can do um, but God, he da one dat can do anyting.”
27 Den Peter sed: “We wen leave evryting fo follow you. So den, wat we goin get fo dat?”
28 Jesus sed to dem: “I tell you fo shua, God goin make evryting new wen da Son of man* sit down on his awesome throne. Dat time, all you guys dat wen follow me goin sit down on 12 thrones fo judge da 12 Israel tribes.
29 An evrybody dat wen leave dea home, or braddahs or sistahs, or maddah or faddah, or kids, or land cuz dey follow me goin get hundred times moa an goin get fo live foeva.
30 “But plenny guys who stay firs now goin be las, an da guys dass las goin be firs.”
Footnotes
^ Or, “having pilau sex”. Dis come from da Greek word por·neiʹa. Go check out “Pilau Sex” in Da Bible Dictionary.
^ Or, “adultery”. Go check out “Fooling Aroun On Yoa Odda Half” in Da Bible Dictionary.
^ Go check out “Son Of Man” in Da Bible Dictionary.
