Wat Matthew Wen Write 4:1-25
4 Afta dat, God wen use his powa fo make Jesus go to da boonies. Dass wea da Devil try fo presha him fo do wrong.
2 Jesus wen fast fo 40 days an 40 nights. Afta dat, he wuz supa hungry.
3 An den da Devil go by him an say: “If you really God’s boy, den tell dese rocks fo come bread.”
4 But Jesus tell him: “Da Scripchas say: “Man no can live ony on bread, but dey gotta lissen to evryting Jehovah* tell.””
5 Den da Devil bring him to Jerusalem an put him on top da highes part of da tempo
6 an sed to him: “If you really God’s boy, go jump off, cuz da Scripchas tell: “God goin sen his angels by you fo take kea you,” an “dey goin carry you so dat yoa feet no goin hit da rock.””
7 Jesus sed to him: “But da Scripchas tell: “No good you try force Jehovah yoa God fo prove himself to you.””
8 Den da Devil take him on top one real high mountain an show him all da countries in da world an how awesome dey stay.
9 He tell um: “I can give you all dis if you get down on yoa knees jus dis one time fo show dat you serve me.”
10 Den Jesus sed to him: “Beat it awready Satan! Da Scripchas tell: “Serve Jehovah yoa God, an work ony fo him.””
11 Den da Devil go away from Jesus, an da angels wen come take kea him.
12 Layta, wen Jesus had hea dat John wen get lock up, he go back Galʹi·lee.
13 Afta he leave Nazʹa·reth, he wen go live in Ca·perʹna·um by da sea, in da lands dat belong to Zebʹu·lun an Naphʹta·li.
14 Dis happen jus like da prophet Isaiah wen tell:
15 “Galʹi·lee, wea guys from odda places live! Lands dat belong to da Zebʹu·lun an Naphʹta·li guys, on da road to da sea, west side of da Jordan Riva.
16 Da peopo sitting in da dark wen see one bright light, an light wen shine on da guys dat stay sitting wea death cova dem jus like one shadow.”
17 From dat time, Jesus wen start fo tell peopo: “You gotta come sorry fo yoa sins, cuz God’s Govament stay coming pretty soon.”
18 He wuz walking by da Sea of Galʹi·lee wen he had spock two braddahs, Simon da guy dey call Peter an his braddah Andrew. Dey wuz throwing net cuz dey fishamen.
19 He tell dem: “Come wit me, an I goin show you how fo fish fo peopo.”
20 Right den an dea, dey wen leave dea nets an go wit him.
21 He go moa down an see two odda braddahs, James an John, who wuz Zebʹe·dee’s boys. Dey wuz inside da boat wit dea faddah, fixing dea nets, wen Jesus had tell um fo come.
22 Right den an dea, dey leave da boat an dea faddah an come one followa* of Jesus.
23 Den he wen go all ova Galʹi·lee, teaching inside da synagogs* an telling peopo da good news about God’s Govament. He also make peopo come good from all dea healt problems.
24 All ova Syria, evryone wen hea wat he did. An dey wen bring him peopo dat wuz suffaring wit all kine pain an disease, guys dat da demons wen take ova, guys wit seizures, an peopo dat no can move. An he make all dem come good.
25 Cuz of dat, choke peopo had come from Galʹi·lee, De·capʹo·lis,* Jerusalem, Ju·deʹa, an from da odda side of da Jordan Riva an wen go wit him.
