Wat Matthew Wen Write 18:1-35
18 Dat time Jesus guys wen go to him an ask: “Who goin be da mos importan in da Govament in da heavens?”
2 So Jesus call one boy to him an put um in front all dem
3 an tell: “Fo shua, if you guys no change an come like litto kids, you no can go into da Govament in da heavens.
4 So whoeva come humbo like dis boy, goin be da mos importan in da Govament in da heavens.
5 An whoeva welcome guys dass like dis boy cuz of me, stay welcome me too.
6 But whoeva stumbo one of dese humbo guys* dat get faith in me, moa betta he hang one huge rock* aroun his neck an get thrown in da deep watta.
7 “Bummahz fo da world cuz it goin get judge fo making peopo stumbo! Az tru, no matta wat, goin get peopo dat stumbo oddas, but bummahz fo da guy dat do dat!
8 So den, if yoa hand or yoa foot jam you up, cut um off an throw um away. Cuz az moa betta you no moa one hand or one foot but you get life,* radda den you get both yoa hands an feet but you get thrown in da fiyah dat burn foeva.
9 An if yoa eye jam you up, rip um out an throw um away. Cuz az moa betta you no moa one eye an you get life, radda den you get both eyes but burn up in Ge·henʹna.*
10 Make shua you no look down on dese humbo guys, cuz da angels who take kea dem stay right dea by my Faddah in heaven.
11 * ——
12 “Wat you tink? If one guy get 100 sheep an one of dem get los, you no tink he goin leave da 99 dea on da mountains an go look fo da one dat stay los?
13 An if he find um, fo shua he goin be moa happy ova dat one, den da 99 dat no wuz los.
14 Same ting fo dese humbo guys, my* Faddah in heaven no like even one of dem get los.
15 “If yoa braddah* wen sin agains you, go by yoaself an tell him wat he wen do.* If he lissen, you get yoa braddah back.
16 But if he no lissen, go back wit one or two odda guys so dat if need, get two or three witnesses fo tell wat wen happen stay tru.
17 If he no lissen to dem, talk to da braddahs in da hui, an if he no lissen even to dem, den treat him like somebody dass not one Jew* an like one tax collecta.
18 “I tell you fo shua, wateva you choose fo lock on earth, awready stay lock in heaven.* An wateva you choose fo open on earth, awready stay open in heaven.*
19 An anodda ting, if two guys pray fo anyting importan, den my Faddah in heaven goin make um happen.
20 Cuz wea two or three guys come togedda in my name,* I goin be wit dem.”
21 Den Peter ask him: “Lord, how much times I suppose to fogive my braddah wen he sin agains me? Seven times?”
22 Jesus tell um: “No, not ony seven times, but 77 times.
23 “Dass why God’s Govament in da heavens stay like one masta dat wanted his slaves fo give back wat dey owe him.
24 Wen he had start fo colleck his money, had one guy come in dat owe him 60 million de·narʹi·i.*
25 But cuz da slave no could pay him back, his masta sed fo go sell him, his wife, kids, an evryting he get so dat he can get his money back.
26 So da slave wen go down on da groun fo show respeck an sed: “Give me moa time, I goin pay back evryting.”
27 Cuz his masta feel sorry fo him, he wen let um go an cancel wat he owe.
28 But dat slave wen go afta anodda slave who owe him 100 de·narʹi·i.* He grab um by da neck an start fo choke um an tell: “Pay me back all my money!”
29 So dat slave wen fall down on da groun an beg him, “Give me moa time, I goin pay you back.”
30 But he neva like wait, an had um thrown in jail til he could pay back evryting.
31 Wen bodda da odda slaves wen dey see dis, so dey go tell dea masta evryting dat wen happen.
32 So da masta call him in an sed: “You no good buggah, you wen beg me fo let you go fo all da stuff you owe me, an I wen do um.
33 You no tink you should feel sorry fo da odda slave da same way I wen feel sorry fo you?”
34 Cuz his masta wuz so mad, he wen give um to da guards an he had fo stay in jail til he pay back evryting.
35 My Faddah in heaven goin do da same ting to you if you no fogive yoa braddah fo real kine.”
Footnotes
^ Or, “guys who no seem importan dass jus like small kids”.
^ Or, “millstone”. Dis kine huge rock wuz used fo smashing wheat. Go check out “Millstone” in Da Bible Dictionary.
^ Dat mean, fo live foeva.
^ Dis verse iz in some Bible translations but no stay in some of da mos oldes Greek writings.
^ Or might be, “yoa”. Some old writings say “yoa”.
^ One guy dat worship God wit you.
^ In da original Greek dis wen mean, “tell him wat he wen do wrong an correck him”.
^ Da Jews neva deal wit odda peopo dat no wuz Jews unless gotta.
^ Dis could be talking about decisions made wen somebody do someting wrong.
^ Dis could be talking about decisions made dat clear somebody of doin someting wrong.
^ Ova hea, “in my name” can mean Jesus wen give da okay fo rep him.
^ In da original Greek dis wen mean “10,000 talents”. One talent wen equal about 20 years work.
^ One denarius wen equal one day’s work.
