Wat Matthew Wen Write 22:1-46
22 One moa time Jesus had use stories fo teach dem, he sed:
2 “Da Govament in da heavens iz like one king who wen make one big party fo his boy’s wedding.
3 An he sen his workas fo call da guys he wen invite to da party, but dey neva like come.
4 Den he sen some moa workas, an sed: “Tell da guys I wen invite: “I pau make da food, I wen kill all my bulls an my bes cows, an evryting stay ready. Come to da party.””
5 But da peopo no kea an wen go do dea own ting. One go back to his field, anodda go back work,
6 but da res wen grab da king’s workas, beat um up, an kill um.
7 “Da king wen snap an sen his army fo kill da guys dat had murda his workas, den dey wen burn dea city.
8 Den he tell his workas, “Da party stay ready, but da guys I wen invite no deserve fo come.
9 So go on da main roads dat go to da city an invite anybody you see fo come to da party.”
10 So da workas wen go on da roads an invite evrybody, wedda dey wuz good or bad. An da room fo da wedding wuz packed wit peopo sitting at da table.
11 “Wen da king come fo check evrybody out, he spock one guy dat no wuz wearing wedding clothes.
12 So he tell um: “Brah, how you wen get in hea witout da wedding clothes?” Da guy neva know wat fo say.
13 Den da king sed to his workas, “Tie him up, an throw um outside in da dark. Dass wea he goin cry real hahd an grind his teeth.”
14 “I tell you, God wen invite plenny, but He choose ony litto bit.”
15 Den da Pharisees* wen get togedda fo figga out how dey can trick Jesus fo say someting wrong.
16 So dey sen some of dea guys togedda wit Herod’s guys, an dey tell: “Teacha, we know you tell da trut an teach da trut about God, an you no kea wat peopo tink about you, no matta who dem.
17 So den, wat you tink about dis? Az right fo pay da tax to Caesar o wat?”
18 But cuz Jesus know dey trying fo trick him, he sed: “You guys so two-face, how come you trying fo tes me?
19 Show me da coin fo pay da tax.” Dey bring um da coin.*
20 He sed to dem: “Whose picha an name stay on hea?”
21 Dey sed: “Caesar’s.” Den he sed to dem: “So den, give Caesar wat stay his, but give God wat stay His.”
22 Wen dey hea dat, had blow dea minds. An dey neva bodda him anymoa an wen go away.
23 Layta on da Sadducees,* da guys dat no believe in da resurrection, come an ask him:
24 “Teacha, Moses sed: “If one man die an he neva have kids, his braddah gotta marry his wife fo have kids fo his braddah dat wen mahke.”
25 We wen know seven braddahs. Da firs one wen get married but had die befoa he had kids. So his braddah wen marry his wife.
26 An da same ting wen happen to all seven braddahs who wen die befoa dey had kids.
27 Den, da wahine wen die too.
28 So wen da seven guys come back alive, who da wahine goin be married to? Cuz dey all wen marry her.”
29 So Jesus sed to dem: “You guys get um all wrong, cuz you donno da Scripchas or da powa God get.
30 Cuz in da resurrection, guys an wahines not goin marry, but dey goin live jus like angels in heaven.
31 Wen come to da resurrection of da dead, you neva read wat God wen tell you:
32 “I da God fo Abraham, da God fo Isaac, an da God fo Jacob”? He da God fo da guys dass alive, not dead.”
33 Wen all da peopo hea dat, dey wen tink wuz unreal how he teach.
34 Afta da Pharisees hea dat Jesus had shut down da Sadducees, dey come to him az one group.
35 An one of dem who wen know da Law real good wen try tes him, an ask:
36 “Teacha, wass da mos importan rule from God in da Law?”
37 He sed to him: “You gotta love Jehovah* yoa God wit yoa whole heart, yoa whole life,* an wit how you tink.”*
38 Dis da firs an mos importan rule from God.
39 Da secon one iz dis: “You gotta love odda peopo like how you love yoaself.”
40 Evryting in da Law an da Prophets* stay cuz of dese two rules.”
41 Wen da Pharisees wuz all togedda, Jesus ask dem:
42 “Wat you tink about da Christ? Whose boy him?” Dey sed to him: “David’s boy.”
43 He ask dem: “Den how come God wen use his powa fo move David fo call him Lord, wen he tell,
44 “Jehovah wen tell my Lord: “Sit ova hea on my right side til I put yoa enemies unda yoa feet””?
45 If David call him Lord, how he can be his boy?”
46 Nobody wuz able fo ansa him. From den on, nobody wen even try tes him anymoa.
