Wat Matthew Wen Write 24:1-51
24 Wen Jesus wuz leaving da tempo, his guys wen go up to him fo show him how awesome da buildings of da tempo wuz.
2 Den he sed to dem: “You see all dis? I tell you fo shua, all dese stones goin get knock ova an thrown down.”
3 Wen Jesus wuz sitting on da Mount of Olives, his guys wen come by him wen nobody else wuz aroun an ask: “Try tell us, wen all dese tings goin happen, an wass da sign fo know wen you stay hea* an wen da system goin pau?*
4 Jesus wen ansa dem: “Watch out dat nobody lead you da wrong way,
5 cuz plenny guys goin use my name an tell, “I da Christ,” an goin lead choke peopo da wrong way.
6 You goin hea about wars close by an far away. But make shua you no come sked, cuz all dis gotta happen. But az not da end yet.
7 “Cuz one country goin fight anodda country, one govament goin fight anodda govament, not goin have nuff food, an goin get earthquakes all ova.
8 All dis iz ony da start of peopo suffaring, like one wahine about fo give birth.
9 “Den peopo goin make you suffa an kill you, an peopo in da world goin hate you cuz you my followas.
10 An plenny guys goin lose faith in God, stab each odda in da back, an goin hate each odda.
11 Goin get plenny fake prophets dat goin lead peopo da wrong way.
12 An cuz moa an moa peopo not goin pay attention to God’s laws, mos of da peopo in da world not goin have love.
13 But da one dat hang in dea til da end goin be saved.
14 An peopo goin tell da good news about God’s Govament all ova da world so dat evrybody get chance fo know about um, an den da end goin come.
15 “So, wen you see da pilau ting dat buss up evryting standing in one holy place, like da prophet Daniel wen talk about (whoeva read dis make shua you undastan um good),
16 den da guys in Ju·deʹa should start fo run to da mountains.
17 Da guy on da roof betta not come down fo grab his stuff from inside da house,
18 an da guy in da field betta not go back home fo pick up his clothes.
19 Bummahz fo da wahines dat stay hapai an dose nursing one bebe dat time!
20 Pray dat you no gotta dig out in da winta or on da Sabbath* day.
21 Cuz goin get mayjah hahd times dat neva wen happen befoa, from da start of da world til now, an neva goin happen again.
22 If dat time neva get cut short, nobody would be saved. But cuz of da peopo God wen choose, dat time goin get cut short.
23 “Den if anybody say to you, “Ho! Try look! Da Christ stay hea,” or, “He stay dea!” no believe um.
24 Cuz goin get fake Christs an fake prophets an dey goin do stuff dat look unreal fo try lead peopo da wrong way, an if can, even da ones God wen choose.
25 No foget, I wen warn you awready.
26 If peopo tell, “Try look! He stay in da boonies,” no go ova dea. An if dey say, “Try look! He stay inside da house,” no believe um.
27 Wen da Son of man* stay hea, goin be jus like lightning dat shine across da whole sky from da east to da west.
28 Wea get someting dead, dass wea da eagles goin gadda aroun.
29 “Right afta dose days wen times iz real hahd, da sun goin come dark, an da moon not goin shine, an da stars goin fall from da sky, an da powas of da heavens goin shake.
30 Den da sign of da Son of man goin be seen in heaven, an all da peopo in da earth goin beat dea ches cuz dey sad, an dey goin see da Son of man coming in da clouds of heaven wit powa an awesomeness.
31 An he goin sen out his angels wit one loud soun of one trumpet, an dey goin go evry direction fo gadda togedda da ones God wen choose, from one end of da heavens to da odda end.
32 “Try learn someting from da fig tree: Az soon az da tree get one new branch an grow leafs, you know dat summa stay nea.
33 Same lidat, wen you see all dese tings, den know fo shua dat he stay nea, he standing at da doors.
34 I telling you dat dis generation not goin die til all dese tings happen.
35 Heaven an earth goin disappea, but my words goin stay foeva.
36 “Nobody know anyting about dat day an time, not da angels or da Son, ony da Faddah know.
37 Jus like how wuz in Noah’s time, dass how goin be wen da Son of man stay hea.
38 Dat time befoa da Flood, dey wuz eating an drinking, an guys an wahines wuz getting married, til da day Noah wen go inside da ark.
39 Dey neva pay attention to wat wuz happening til da Flood came an wen wipe dem all out. Dass how goin be wen da Son of man stay hea.
40 Den two guys goin be in da field. God goin take one of dem but da odda one he goin leave behind.
41 Two ladies goin be making flour fo bread. God goin take one of dem but da odda one he goin leave behind.
42 So stay ready, cuz you donno wat day yoa Lord goin come.
43 “Tink about dis, if one guy know wat time at night da thief wuz goin break in his house, he woulda stayed up an no let da thief break in.
44 Az why you guys gotta be ready, cuz da Son of man goin come at one time wen you no tink he goin come.
45 “Who da faithful an akamai* worka dat da masta wen put in charge of his odda workas, fo give dem dea food wen da time stay right?
46 Dat worka goin be happy if his masta come an see him doin his job!
47 I tell you fo shua, he goin put him in charge ova all his stuff.
48 “But if da worka start fo turn bad an tink, “My masta taking way too long,”
49 an he start fo beat up da odda workas an eat an drink wit da guys dat always get drunk,
50 da masta of dat worka goin come on one day he neva expeck, at one time he neva know,
51 an dat masta goin make him suffa plenny an throw him wit da guys dass two-face. Dass wea he goin cry real hahd an grind his teeth.
Footnotes
^ Go check out “Da Time Wen Jesus Stay Hea” in Da Bible Dictionary.
^ Go check out “Wen Da System Goin Pau” in Da Bible Dictionary.
^ Go check out “Son Of Man” in Da Bible Dictionary.
^ Or, “wise”.
