1. Ano ang gintudlo sa imo parte sa aton Manunuga?

KON mga Saksi ni Jehova ang imo mga ginikanan, posible nga kilala mo na si Jehova halin sang bata ka pa. Gintudluan ka nila nga sia ang Manunuga, nga kanami gid sang iya mga kinaiya, kag himuon niya nga paraiso ang duta.—Gen. 1:1; Binu. 17:24-27.

2. Ano ang pagtan-aw sang iban nga tawo sa mga nagapati nga may Manunuga?

² Pero, madamo nga tawo ang wala nagapati nga may Dios ukon sia ang nagtuga sang tanan nga butang. Sa baylo, nagapati sila nga nagtuhaw lang ang kabuhi. Sa umpisa, lain kuno ang hitsura sang buhi nga mga butang nga makita naton subong. Simple lang kuno ini kay may pila lang ini ka bahin. Dayon amat-amat kuno nga nagdamo ang mga bahin sang lawas sini kag nangin kompleto pareho sang makita naton subong. Ang pila ka tawo nga nagapati sa sini mga mataas sing tinun-an. Mahimo magsiling sila nga ginpamatud-an sang science nga indi husto ang ginasiling sang Biblia, kag ang mga tawo lang nga wala nakaeskwela, mga kulang sing kaalam, ukon mga ilintuon ang nagapati nga may Manunuga.

3. Ngaa importante gid nga pabakuron naton ang aton pagtuo?

³ Posible bala nga magduhaduha kita nga si Jehova amo ang aton Manunuga bangod sa ginasiling sang pila ka kilala nga mga tawo? Depende ini sa aton rason kon ngaa nagapati kita nga si Jehova amo ang Manunuga. Bangod bala amo ini ang gintudlo sa aton ukon bangod gin-usisa naton mismo ang mga ebidensia? (1 Cor. 3:12-15) Bisan pa madugay na kita nga Saksi ni Jehova, dapat naton tanan padayon nga pabakuron ang aton pagtuo. Kon himuon naton ini, indi kita mapatalang sang “pilosopiya kag wala sing pulos nga daya” nga ginatudlo sang mga tawo nga nagasiling nga indi mapatihan ang Biblia. (Col. 2:8; Heb. 11:6) Para mabuligan kita nga mahimo ini, binagbinagon sa sini nga artikulo (1) kon ngaa madamo ang wala nagapati nga may Manunuga, (2) kon paano mo mapabakod ang imo pagtuo kay Jehova nga imo Manunuga, kag (3) kon ano ang  dapat mo himuon para mangin mabakod pirme ang imo pagtuo.

4. Suno sa Hebreo 11:1 kag footnote, sa ano nabase ang matuod nga pagtuo?

⁴ Para sa iban, kon nagapati ka sa isa ka butang bisan wala ka sang ebidensia, amo ina ang ginatawag nga pagtuo. Pero suno sa Biblia, indi ina matuod nga pagtuo. (Basaha ang Hebreo 11:1 kag footnote.) Ginapaathag sang Biblia nga ang pagtuo nabase sa makapakumbinsi nga ebidensia. Gani bisan pa indi naton makita si Jehova, si Jesus, kag ang Ginharian sa langit, may mga ebidensia kita nga matuod gid sila kag ang Ginharian. (Heb. 11:3) Ang isa ka Saksi nga biochemist nagsiling: “May basihan ang ginapatihan sang mga Saksi ni Jehova. Wala nila ginabalewala ang mga napamatud-an sang science.”

5. Ngaa madamo nga tawo ang wala nagapati nga ang Dios ang nagtuga sang tanan nga butang?

⁵ Mahimo mamangkot kita, ‘Kon madamo sang ebidensia nga may ara gid Manunuga, ngaa madamo nga tawo ang wala nagapati nga ang Dios ang nagtuga sang tanan nga butang?’ Kay man, wala gin-usisa sang iban ang mga ebidensia. Si Robert, nga isa na ka Saksi ni Jehova subong, nagsiling: “Wala ginatudlo sa eskwelahan ang parte sa pagpanuga, gani abi ko indi ini matuod. Sang 22 anyos ako, naistorya ko ang mga Saksi ni Jehova. Natun-an ko nga madamo gali sang ebidensia sa Biblia nga nagapamatuod nga ang Dios ang nagtuga sang tanan nga butang. Maathag gid ini kag mapatihan.” *—Tan-awa ang kahon nga “ Pangabay sa mga Ginikanan.”

6. Ngaa wala nagapati ang iban nga tawo nga may Manunuga?

⁶ Wala nagapati ang iban nga tawo nga may  Manunuga bangod nagapati lang kuno sila sa mga butang nga ila makita. Pero ang matuod, nagapati sila sa mga butang nga indi makita. Halimbawa, nagapati sila nga may gravity bisan pa indi nila ini makita, kay may ebidensia nga matuod ini. Ang pagtuo nga ginsambit sa Biblia nabase man sa mga ebidensia nga ‘nagapamatuod sa butang nga indi makita.’ (Heb. 11:1) Kinahanglan ang tion kag panikasog para tun-an ang mga ebidensia, pero madamo nga tawo ang wala gana nga magtuon. Kon indi pagtun-an sang isa ka tawo ang mga ebidensia, posible gid nga magpati sia nga wala sing Dios.

7. Ang tanan bala nga tawo nga mataas sing tinun-an wala nagapati nga gintuga sang Dios ang uniberso? Ipaathag.

⁷ Pagkatapos matun-an ang mga ebidensia, nakumbinsi ang pila ka scientist nga gintuga gid sang Dios ang uniberso. * Pareho kay Robert, nga  ginsambit kaina, posible nga abi sang iban wala sing Manunuga bangod wala man gintudlo sa unibersidad nga gintuga sang Dios ang tanan nga butang. Pero, madamo nga scientist ang nagtuon parte kay Jehova kag ginpalangga nila sia. Pareho sa ginhimo sini nga mga scientist, dapat man naton tanan pabakuron ang aton pagtuo sa Dios, may tinapusan man kita ukon wala. Dapat ini himuon sang kada isa sa aton.

8-9. (a) Ano nga pamangkot ang binagbinagon naton? (b) Paano ka makabenepisyo kon tun-an mo ang mga tinuga sang Dios?

⁸ Paano mo mapabakod ang imo pagtuo sa Manunuga? Binagbinagon naton ang apat ka paagi.

⁹Tun-i ang mga tinuga sang Dios. Magabakod ang imo pagtuo sa Manunuga kon obserbahan mo sing maayo ang mga sapat, mga tanom, kag mga bituon. (Sal. 19:1; Isa. 40:26) Kon tun-an mo sing maayo ini nga mga butang, mas mangin kumbinsido ka pa gid nga si Jehova ang Manunuga. May mga artikulo sa aton mga publikasyon nga nagapaathag parte sa mga tinuga sang Dios. Indi paglaktawi ini nga mga artikulo bisan pa pamatyag mo mabudlay ini intiendihon. Sa baylo, basaha ini kag tinguhai nga may matun-an ka sa sini. Kag indi pagkalimti nga tan-awon sa aton website, nga jw.org, ang matahom nga mga video parte sa mga tinuga sang Dios nga ginpagua sa aton rehiyonal nga mga kombension sining nagligad nga mga tinuig.

10. Maghatag sing halimbawa nga nagapamatuod nga may ara gid Manunuga. (Roma 1:20)

¹⁰ Kon nagatuon ka parte sa mga tinuga sang Dios, pamalandungi kon ano ang ginatudlo sini parte sa aton Manunuga. (Basaha ang Roma 1:20.) Halimbawa, importante gid ang init kag kasanag halin sa adlaw para mabuhi ang mga tinuga diri sa duta. Pero, makahalit man ang silak sang adlaw nga ginatawag ultraviolet rays. Gani kinahanglan maamligan kita nga mga tawo sa sini nga silak sang adlaw. Kag nagapasalamat kita kay naamligan kita sa sini. Paano? Sa palibot sang aton planeta nga duta, may ginatawag nga ozone layer nga amo ang nagapugong sa sini nga silak. Kon grabe gid kainit sang ultraviolet rays, nagadamol man ang ozone layer. Indi bala nagapamatuod ini nga may naghimo gid sini nga pangamlig kag isa sia ka mahigugmaon kag maalam nga Manunuga?

11. Diin ka makakita sang mga impormasyon parte sa mga tinuga sang Dios nga makapabakod sang imo pagtuo? (Tan-awa ang kahon nga “ Mga Impormasyon nga Makapabakod sang Imo Pagtuo.”)

¹¹ Madamo ka sing makita nga impormasyon parte sa mga tinuga sang Dios paagi sa pag-research sa Watch Tower Publications Index kag sa jw.org. Makapabakod ini sang imo pagtuo. Puede ka mag-umpisa sa mga artikulo kag mga video nga may tig-ulo nga “Gindesinyo Bala Ini?” Malip-ot lang ini kag may ginasugid ini nga dalayawon nga impormasyon parte sa mga sapat kag iban pa nga tinuga. Nagasugid man ini parte sa pagpanikasog sang mga scientist nga ilugon ang ginahimo sini nga mga tinuga.

12. Kon nagatuon kita sang Biblia, ano ang pila ka butang nga dapat naton talupangdon?

¹²Tun-i ang Biblia. Sang primero, ang biochemist nga ginsambit kaina wala nagapati nga may Manunuga. Pero sang ulihi, nakumbinsi sia nga may nagtuga sang tanan nga butang. Nagsiling sia: “Nakumbinsi ako bangod sa akon natun-an sa science. Pero indi lang amo ini ang rason. Nakumbinsi man ako bangod gintun-an ko sing maayo ang Biblia.” Posible nga may sibu ka na nga ihibalo parte sa mga ginatudlo sang Biblia. Pero, para magbakod ang imo pagtuo sa imo Manunuga, dapat padayon mo nga tun-an ang Pulong sang Dios. (Jos. 1:8; Sal. 119:97) Talupangda ang detalyado kag insakto nga paglaragway sang Biblia parte sa mga natabo sang una. Talupangda man ang mga tagna nga natuman, kag kon paano nagasantuanay ang sinulatan sang madamo nga manunulat sang Biblia. Kon himuon mo ini, magabakod ang imo pagtuo nga gintuga kita sang mahigugmaon kag maalam nga  Manunuga kag ginpasulat niya ang Biblia para sa aton. *—2 Tim. 3:14; 2 Ped. 1:21.

13. Ano ang isa ka halimbawa nga makabulig gid sa aton ang mga laygay sang Pulong sang Dios?

¹³ Kon nagatuon ka sang Pulong sang Dios, talupangda ang mga laygay sini nga makabulig gid sa aton. Halimbawa, madugay na nga nagpaandam ang Biblia nga makahalalit ang gugma sa kuarta kag nagaresulta ini sa “madamo nga kasakit.” (1 Tim. 6:9, 10; Hulu. 28:20; Mat. 6:24) Matuod bala ini gihapon subong? Ang libro nga The Narcissism Epidemic nagsiling: “Ang kalabanan sa mga tawo nga nagapati nga ang kuarta amo ang pinakaimportante sa kabuhi indi malipayon kag nagaka-depress. Bisan gani ang mga tawo nga nagahandum pa lang nga magmanggaranon nangin indi man malipayon, kag nagdamo ang ila mga ginabatyag sa lawas.” Gani maayo gid ang laygay sang Biblia nga indi naton paghigugmaon ang kuarta. Ano pa nga mga prinsipio sa Biblia ang nakabulig sa imo? Kon pirme naton ginapamalandungan ang mga laygay sang Biblia, mas mangin maathag sa aton nga ang aton mahigugmaon nga Manunuga amo ang nakabalo kon ano ang pinakamaayo para sa aton. Gani dapat kita pirme magpagiya sa iya. (Sant. 1:5) Kon himuon naton ini, mangin mas malipayon kita.—Isa. 48:17, 18.

14. Ano ang matun-an mo parte kay Jehova kon tun-an mo ang Biblia?

¹⁴Magtuon nga may husto nga motibo nga amo ang makilala sing maayo si Jehova. (Juan 17:3) Samtang nagatuon ka sang Biblia, mabal-an mo ang mga kinaiya ni Jehova. Natun-an mo man ini nga mga kinaiya sang gintun-an mo ang iya mga tinuga. Gani mas mangin kumbinsido ka nga matuod gid si Jehova. (Ex. 34:6, 7; Sal. 145:8, 9) Kon makilala mo sing maayo si Jehova, mas magabakod ang imo pagtuo sa iya, mas palanggaon mo pa gid sia, kag mas magasuod ka pa gid sa iya.

15. Ano ang benepisyo kon isugid mo sa iban ang ginapatihan mo parte sa Dios?

¹⁵Isugid sa iban ang ginapatihan mo parte sa Dios. Kon himuon mo ini, magabakod ang imo pagtuo. Pero ano abi kon ang imo ginbantalaan nagsiling nga nagaduhaduha sia kon bala matuod gid nga may Dios kag indi ka kabalo kon ano ang imo isabat? Mag-research sa aton mga publikasyon kon ano ang imo isabat nga nabase sa Biblia, kag binagbinaga ini sa iya. (1 Ped. 3:15) Puede ka man magpabulig sa isa ka utod sa pag-research sang sabat. Bisan indi pagpatihan sang imo ginbantalaan ang sabat sang Biblia, makabenepisyo ka gihapon sa ginhimo mo nga pag-research kay magabakod ang imo pagtuo. Bangod sini, indi ka mapapati sang mga tawo nga mataas sing tinun-an nga nagasiling nga wala kuno sing Manunuga.

16. Ano ang posible nga matabo kon indi naton padayon nga pabakuron ang aton pagtuo?

¹⁶ Bisan pa madugay na kita nga nagaalagad kay Jehova, dapat padayon naton nga pabakuron ang aton pagtuo. Ngaa? Kay kon indi naton ini paghimuon, posible nga magluya ang aton pagtuo. Dumduma nga ang pagtuo nabase sa mga ebidensia nga nagapamatuod sa butang nga indi makita. Madali naton malipatan ang mga butang nga indi naton makita. Nagsiling si Pablo nga kon wala kita sing pagtuo, isa ini ka “sala nga madali magsalawid sa aton.” (Heb. 12:1) Gani, ano ang dapat naton himuon para mangin mabakod pirme ang aton pagtuo?—2 Tes. 1:3.

17. Ano ang makabulig sa aton para mapabakod naton ang aton pagtuo?

¹⁷ Una, pangabaya si Jehova nga hatagan ka niya sang iya balaan nga espiritu, kag himua ini pirme. Ngaa? Bangod ang pagtuo isa ka kinaiya nga ginapatubas sang espiritu. (Gal. 5:22, 23) Indi naton mapabakod ang aton pagtuo sa aton Manunuga kon indi kita pagbuligan sang iya balaan nga espiritu. Kon padayon naton nga pangabayon si Jehova nga hatagan niya kita sang iya balaan nga espiritu, hatagan gid niya kita sini.  (Luc. 11:13) Puede pa gani kita makapangamuyo sing pareho sini: “Dugangi ang amon pagtuo.”—Luc. 17:5.

18. Suno sa Salmo 1:2, 3, ano ang hamili nga regalo nga puede naton matigayon subong?

¹⁸ Ikaduha, himua nga regular ang imo pagtuon sang Pulong sang Dios. (Basaha ang Salmo 1:2, 3.) Sang ginsulat ini nga salmo, pila lang ka Israelinhon ang may kompleto nga kopya sang Kasuguan sang Dios. Nalakip sa ila ang mga hari kag ang mga saserdote. Kag kada pito ka tuig, nagatipon “ang mga lalaki, ang mga babayi, ang mga kabataan,” kag ang dumuluong nga mga pumuluyo sa Israel para pamatian ang pagbasa sang Kasuguan sang Dios. (Deut. 31:10-12) Sang panahon ni Jesus, pila lang ang may kopya sang Kasulatan, kag ang kalabanan sini ara sa mga sinagoga. Pero subong, mabasa na sang kalabanan nga tawo ang Pulong sang Dios ukon ang bahin sini. Hamili gid ini nga regalo. Paano naton mapakita nga ginapabaloran naton ang Biblia?

19. Ano ang dapat naton himuon para mangin mabakod pirme ang aton pagtuo?

¹⁹ Mapakita naton nga ginapabaloran naton ang Pulong sang Dios paagi sa pagbasa sini sing regular. Dapat maghimo kita sang iskedyul kon san-o naton basahon kag tun-an ang Biblia. Indi puede nga mabasa lang kita kag magtuon sa tion nga pamatyag naton medyo tawhay kita. Kon panikasugan naton nga mangin regular ang aton pagtuon, mangin mabakod pirme ang aton pagtuo.

20. Ano ang dapat naton panikasugan nga himuon?

²⁰ Indi pareho “sa mga maalam kag sa mga may tinun-an” sa sini nga kalibutan, may mabakod kita nga pagtuo nga nabase sa Pulong sang Dios. (Mat. 11:25, 26) Ginapaathag sa aton sang Biblia kon ngaa nagalain pa gid nga nagalain ang kahimtangan diri sa duta, kag kon ano ang himuon ni Jehova para bag-uhon ini. Gani dapat gid naton panikasugan nga pabakuron ang aton pagtuo kag buligan ang madamo nga tawo nga magtuo man sa aton Manunuga. (1 Tim. 2:3, 4) Gusto na gid naton mag-abot ang tion nga ang tanan nga tawo sa duta magadayaw kay Jehova kag ihambal nila ang ginasiling sang Bugna 4:11: “Takus ka, Jehova, nga amon Dios, nga magbaton sang himaya . . . bangod gintuga mo ang tanan nga butang.”