Magdiretso sa kaundan

Magdiretso sa listahan sang kaundan

 TULUN-AN NGA ARTIKULO 33

Paano Ka Mangin Malipayon sa Imo mga Pribilehiyo?

Paano Ka Mangin Malipayon sa Imo mga Pribilehiyo?

“Mas maayo pa nga ituon ang igtalupangod sa makita sang mata sangsa magdalangdalang sa paglagas sa handum.”—MAN. 6:9.

AMBAHANON 111 Mga Rason sa Pagkalipay

ANG BINAGBINAGON SA SINI NGA ARTIKULO *

1. Ano ang ginahimo sang madamo nga katawhan ni Jehova para madugangan ang ila ginahimo nga pag-alagad sa iya?

 MADAMO kita sang dapat himuon bangod malapit na gid matapos ini nga sistema. (Mat. 24:14; Luc. 10:2; 1 Ped. 5:2) Gusto naton tanan alagaron si Jehova sa bug-os naton nga masarangan. Gani madamo ang nagapanikasog nga dugangan ang ila ginahimo nga pag-alagad. Gusto sang iban nga mangin payunir. Gusto naman sang iban nga mag-alagad sa Bethel ukon magboluntaryo sa konstruksion sang mga pasilidad sang organisasyon. Kag madamo nga brother ang nagatinguha nga mangin ministeryal nga alagad ukon gulang. (1 Tim. 3:1, 8) Nalipay gid si Jehova nga makita ang iya katawhan nga kinabubut-on nga nagaalagad sa iya.—Sal. 110:3; Isa. 6:8.

2. Ano ang mabatyagan naton kon wala naton mabaton ang pila ka pribilehiyo nga gusto naton ukon indi na ini puede ihatag sa aton?

2 Pero ano abi kon madugay na naton nga ginatinguhaan ang pila ka pribilehiyo nga gusto naton, pero wala gihapon naton ini mabaton? Mahimo magluya ang aton buot. Mahimo man magluya ang aton buot kon indi na puede ihatag sa aton ang pila ka pribilehiyo bangod sang aton edad ukon sang iban pa nga rason. (Hulu. 13:12) Amo ini ang ginbatyag ni Melissa. * Gusto gid niya mag-alagad sa Bethel ukon mag-eskwela sa School for Kingdom Evangelizers, pero nagsiling sia: “Indi na ako puede sa sini nga mga pribilehiyo bangod sang akon edad. Gani, nagaluya ang akon buot kon kaisa.”

3. Ano ang kinahanglan himuon sang pila ka utod para mahatagan sila sing dugang nga mga pribilehiyo?

3 Para mahatagan sing dugang nga mga pribilehiyo ang pila ka pamatan-on nga maayo sing panglawas, mahimo nga kinahanglan anay nila mangin hamtong kag dapat anay nila mapakita ang pila ka kinaiya. Halimbawa, mahimo nga maalam sila, madasig magdesisyon, kag handa gid sa bisan ano nga asaynment. Pero mahimo nga  kinahanglan anay nila panikasugan nga mangin mas mapinasensiahon, serioso sa paghimo sang ila asaynment, kag matinahuron. Kon panikasugan mo nga mapakita ang maayo nga mga kinaiya, posible nga hatagan ka sing pribilehiyo bisan pa wala mo ini ginapaabot. Binagbinaga ang eksperiensia ni Nick. Sang 20 anyos sia, nasubuan gid sia kay wala sia gintangdo bilang ministeryal nga alagad. Nagsiling sia, “Nahunahuna ko nga may problema gid siguro sa akon.” Pero wala mag-untat si Nick sa pagpakita sang maayo nga mga kinaiya. Ginhimo niya ang iya bug-os nga masarangan sa pagbantala nga hilikuton kag nagpanikasog gid sia nga makabulig sa kongregasyon. Subong, nagaalagad sia bilang miembro sang Branch Committee.

4. Ano ang binagbinagon naton sa sini nga artikulo?

4 Nagaluya bala ang imo buot bangod wala mo pa gihapon mabaton ang pribilehiyo nga gusto mo? Ipangamuyo ini kay Jehova, kag isugid sa iya kon ano gid ang imo ginabatyag. (Sal. 37:5-7) Puede ka man makapangayo sang panugda sa hamtong nga mga utod kon paano mo mapauswag ang imo pag-alagad sa Dios, kag tinguhai nga iaplikar ini. Kon himuon mo ini, mahimo gid nga ihatag sa imo ang pribilehiyo nga gusto mo. Pero pareho kay Melissa, nga ginsambit kaina, posible nga indi na puede ihatag sa imo ang pribilehiyo nga gusto mo. Ano ang puede mo himuon para mangin malipayon ka gihapon? Para masabat ini, binagbinagon sa sini nga artikulo (1) kon ano ang makahatag sa imo sang kalipay, (2) kon ano ang puede mo himuon para mangin mas malipayon ka pa gid, kag (3) kon ano nga mga pribilehiyo ang puede mo tinguhaan nga makapahalipay gid sa imo.

ANG MAKAHATAG SA IMO SANG KALIPAY

5. Para mangin malipayon kita, sa ano kita dapat magpokus? (Manugwali 6:9)

5 Ginapaathag sang Manugwali 6:9 kon ano ang makabulig sa aton para mangin malipayon kita. (Basaha.) Kon ang isa ka tawo nagapokus sa “makita sang mata,” kontento na sia sa iya kahimtangan kag sa kon ano lang ang ara sa iya. Pero kon ang isa ka tawo nagadalangdalang gid sa paglagas sa iya mga handum nga indi niya man masarangan nga himuon, indi gid sia mangin kontento. Ano ang matun-an naton sa sini? Para mangin malipayon kita, dapat kita magpokus sa kon ano ang may ara kita kag sa kon ano lang ang masarangan naton nga himuon.

6. Ano nga ilustrasyon ang binagbinagon naton, kag ano ang matun-an naton sa sini?

6 Posible gid bala nga mangin kontento ka sa kon ano lang ang ara sa imo? Madamo nga tawo ang nagahunahuna nga indi ini posible bangod gusto naton magtuon sing bag-o nga mga butang. Pero, posible ini. Puede gid kita mangin malipayon sa kon ano lang ang ara sa aton. Paano? Para masabat ini, binagbinagon naton ang ilustrasyon ni Jesus parte sa mga talanton nga mabasa sa Mateo 25:14-30. Matun-an naton sa sini kon paano kita mangin malipayon sa mga pagpakamaayo nga ara sa aton subong, kag posible pa gani nga mangin mas malipayon pa gid kita.

ANG PUEDE MO HIMUON PARA MANGIN MAS MALIPAYON KA PA GID

7. Isaysay sing malip-ot ang ilustrasyon ni Jesus parte sa mga talanton.

7 Sa ilustrasyon ni Jesus, may isa ka tawo nga magalakbay. Antes sia maglakat, gintawag niya ang iya mga ulipon kag ginhatagan niya sing mga talanton ang kada isa sa ila para inegosyo. * Kabalo sia nga lainlain ang ikasarang sang iya mga ulipon, gani ang isa ka ulipon ginhatagan niya sing lima ka talanton, ang isa naman ginhatagan niya sing duha ka talanton, kag ang isa pa gid ginhatagan niya sing isa ka talanton. Nagpanikasog gid ang duha ka ulipon para mapadamo pa gid ang kuarta sang ila agalon. Pero wala ginnegosyo sang ikatlo nga ulipon ang kuarta nga ginhatag sa iya, gani ginpahalin sia sang iya agalon sa iya obra.

8. Ngaa may rason gid nga malipay ang una nga ulipon?

 8 Mahimo nga nalipay gid ang una nga ulipon kay ginhatagan sia sing lima ka talanton sang ila agalon. Madamo gid ini nga kuarta, gani daku gid ang salig sang iya agalon sa iya. Kamusta naman ang ikaduha nga ulipon? Puede kuntani nga magluya ang iya buot bangod diutay lang nga talanton ang ginhatag sa iya kon ikumparar sa ginhatag sa una nga ulipon. Pero ano ang ginhimo niya?

Ano ang matun-an naton sa ikaduha nga ulipon nga ginsambit sa ilustrasyon ni Jesus? (1) Ginhatagan sia sang iya agalon sing duha ka talanton. (2) Ginhimo niya ang iya bug-os nga masarangan para mapadamo pa gid ang kuarta sang iya agalon. (3) Bangod sang iya ginhimo, nagdoble ang kadamuon sang talanton sang iya agalon (Tan-awa ang parapo 9-11)

9. Ano ang wala ginsiling ni Jesus parte sa ikaduha nga ulipon? (Mateo 25:22, 23)

9 Basaha ang Mateo 25:22, 23. Wala nagsiling si Jesus nga nagsunggod, naakig, ukon nagreklamo ang ikaduha nga ulipon bangod duha lang ka talanton ang ginhatag sa iya. Wala nagsiling ang ulipon: ‘Ngaa amo lang ’ni ang ginhatag sa akon? Masarangan ko man ang mahimo sang ulipon nga ginhatagan sing lima ka talanton. Kon wala salig sa akon ang akon agalon, ilubong ko na lang ining duha ka talanton. Mas maayo pa nga magbakabaka ako obra para sa akon kaugalingon.’

10. Ano ang ginhimo sang ikaduha nga ulipon sa duha ka talanton?

10 Pareho sa una nga ulipon, nahangpan man sang ikaduha nga ulipon nga importante gid ang ginapahimo sang iya agalon gani ginhimo niya ang iya bug-os nga masarangan. Bangod sini, nagdoble ang kadamuon sang talanton nga ginhatag sa iya. Ginpadyaan ang ulipon bangod sa iya kapisan. Nalipay ang iya agalon kag ginhatagan sia sing dugang nga responsibilidad.

11. Ano ang himuon naton para mangin mas malipayon pa gid kita?

11 Mangin mas malipayon pa gid kita sa aton pag-alagad kay Jehova kon himuon naton ang aton bug-os nga masarangan sa bisan ano nga asaynment nga ginhatag sa aton. Mangin “masako gid” sa pagbantala, kag magpakigbahin sing  bug-os sa mga hilikuton sa kongregasyon. (Binu. 18:5; Heb. 10:24, 25) Handai sing maayo ang mga pagatun-an sa mga miting para makakomento ka kag mapalig-on ang mga kauturan. Ihatag ang imo pinakamaayo kon may bahin ka sa midweek meeting. Kon ginpangabay ka nga magbulig sa hilikuton sa kongregasyon, mag-abot sa husto nga tion, himua ini dayon, kag ipakita nga masaligan ka. Indi paghunahunaa nga indi importante ang ginapahimo sa imo, kag indi pagpamensara nga uyang lang ini sang imo tion. Panikasugi nga mapauswag ang imo mga ikasarang. (Hulu. 22:29) Kon himuon mo ang imo bug-os nga masarangan sa imo mga asaynment sa pag-alagad kay Jehova, madasig ka nga magauswag kag mangin mas malipayon ka pa gid. (Gal. 6:4) Kag indi ka dalidali nga magsunggod kon ihatag sa iban ang pribilehiyo nga gusto mo. Sa baylo, malipay ka pa gani.—Roma 12:15; Gal. 5:26.

12. Ano ang ginhimo sang duha ka Saksi para mangin mas malipayon pa gid sila?

12 Ginsambit kaina sa parapo 2 nga gusto gid ni Melissa nga mag-alagad sa Bethel ukon mag-eskwela sa School for Kingdom Evangelizers. Bisan pa indi na puede ihatag sa iya ini nga mga pribilehiyo, nagsiling sia: “Ginahimo ko ang akon bug-os nga masarangan sa akon pagpayunir kag ginatestingan ko ang tanan nga paagi sa pagbantala. Bangod sini, nangin malipayon gid ako.” Ano naman ang ginhimo ni Nick sang wala sia gintangdo bilang ministeryal nga alagad? “Nagpokus ako sa pribilehiyo nga magbantala kag sa pribilehiyo nga magkomento sing makapalig-on sa mga miting. Nag-aplay man ako sa pag-alagad sa Bethel kag ginpatawag ako pagkasunod nga tuig.”

13. Ano ang posible nga resulta kon ginahimo mo ang imo bug-os nga masarangan sa imo asaynment subong? (Manugwali 2:24)

13 Kon ginahimo mo ang imo bug-os nga masarangan sa imo asaynment subong, may posibilidad bala nga hatagan ka sing dugang nga mga responsibilidad sa ulihi? Posible. Amo ini ang natabo kay Nick. Pero kon indi ka paghatagan sing dugang nga responsibilidad, pareho kay Melissa, puede ka gihapon mangin malipayon. Ang matuod, puede gani nga mangin mas malipayon ka pa gid sa imo pag-alagad. (Basaha ang Manugwali 2:24.) May rason ka pa gid nga mangin malipayon bangod kabalo ka nga nalipay sa imo mga panikasog ang aton Agalon, nga si Jesucristo.

ANG MGA PRIBILEHIYO NGA PUEDE NATON TINGUHAAN NGA MAKAPAHALIPAY SA ATON

14. Ano ang dapat naton tinguhaan nga mga pribilehiyo?

14 Kon ginahimo na naton ang aton bug-os nga masarangan sa aton mga asaynment subong, buot bala silingon nga indi na kita dapat magpanikasog nga dugangan ang aton ginahimo sa pag-alagad kay Jehova? Indi amo sina ang buot silingon. Dapat naton tinguhaan ang mga pribilehiyo nga makabulig sa aton nga mag-uswag sa aton pagbantala kag pagtudlo sa iban. Dapat man naton tinguhaan ang mga pribilehiyo nga makahatag sa aton sing madamo nga kahigayunan nga magbulig sa aton mga kauturan. Mabaton naton ini nga mga pribilehiyo kon indi kita magpokus sa aton kaugalingon. Sa baylo, dapat kita mangin maalamon paagi sa pagpokus sa pagbulig sa iban kag dapat naton ini himuon sing mapainubuson.—Hulu. 11:2; Binu. 20:35.

15. Ano ang pila ka pribilehiyo nga makabulig sa imo nga mangin mas malipayon pa gid?

15 Ano nga mga pribilehiyo ang puede mo tinguhaan? Pangabaya si Jehova nga buligan ka nga mabal-an kon ano nga mga pribilehiyo ang masarangan mo nga himuon. (Hulu. 16:3; Sant. 1:5) Puede mo bala tinguhaan ang mga pribilehiyo nga ginsambit sa  parapo 1, pareho sang pag-auxiliary ukon pagregular payunir, pag-alagad sa Bethel, ukon pagboluntaryo sa konstruksion sang mga pasilidad sang organisasyon? Basi puede ka magtuon sang lain nga lenguahe para mabantalaan mo ang mga tawo nga nagahambal sini nga lenguahe ukon para makaalagad ka sa iban nga lugar. Para sa dugang nga impormasyon  parte sa sini nga mga pribilehiyo, basaha ang kapitulo 10 sang libro nga Organisado sa Paghimo sang Kabubut-on ni Jehova kag pamangkuta ang mga gulang sa inyo kongregasyon. * Kon ginatinguhaan mo ini nga mga pribilehiyo, makita sang iban nga nagauswag ka gani mangin mas malipayon ka pa gid.

16. Ano ang puede mo himuon kon indi mo pa masarangan subong ang mga pribilehiyo nga ginbinagbinag naton?

16 Pero ano abi kon indi mo pa masarangan subong ang mga pribilehiyo nga ginbinagbinag naton? Tinguhai ang iban nga pribilehiyo nga masarangan mo. Binagbinaga ang pila sa sini.

May gusto ka bala panikasugan nga himuon? (Tan-awa ang parapo 17) *

17. Suno sa 1 Timoteo 4:13, 15, ano ang puede himuon sang isa ka brother para mag-uswag ang iya ikasarang sa pagpanudlo?

17 Basaha ang 1 Timoteo 4:13, 15. Kon bawtismado ka nga brother, tinguhai nga pauswagon ang imo ikasarang sa pagpamulongpulong kag pagpanudlo. Ngaa? Kay kon “mag-ukod” ka sa imo pagbasa, pagpamulongpulong, kag pagpanudlo, mas mabuligan mo ang mga nagapamati sa imo. Tinguhai nga tun-an kag iaplikar ang mga panugda nga ginabinagbinag sa brosyur nga Mag-ukod Ka sa Pagbasa kag Pagpanudlo. Isaisa nga tun-i ang mga tulun-an, praktisa ini sing maayo sa inyo balay, kag panikasugi nga iaplikar ini kon may bahin ka. Pamangkuta ang kabulig nga manuglaygay ukon ang iban pa nga gulang nga “nagapangabudlay sing lakas sa paghambal kag pagpanudlo” kon ano ang ila mapanugda. * (1 Tim. 5:17) Magpokus kon paano mo maaplikar ang mga panugda sa brosyur, kag kon paano mo mabuligan ang mga nagapamati nga magbakod ang ila pagtuo  kag iaplikar man ang ila natun-an. Kon himuon mo ini, mangin mas malipayon ka pa gid pati ang mga nagapamati sa imo.

May gusto ka bala panikasugan nga himuon? (Tan-awa ang parapo 18) *

18. Ano ang makabulig sa aton para mangin mas epektibo pa gid kita sa aton pagbantala kag pagtudlo?

18 Tanan kita may asaynment nga bantalaan kag tudluan ang mga tawo para mangin disipulo sila. (Mat. 28:19, 20; Roma 10:14) Gusto mo bala nga mangin mas epektibo ka pa gid sa sining importante nga hilikuton? Tun-i ang Pagpanudlo nga brosyur kag isulat ang mga gusto mo pauswagon. Dayon iaplikar ang mga panugda sang brosyur parte sa sini. Makabulig man sa imo ang mga panugda sa Workbook Para sa Miting kag ang mga video parte sa sampol nga pag-istoryahanay nga ginapagua kon midweek meeting. Testingi ang lainlain nga mga panugda para mabal-an mo kon ano ang pinakaepektibo sa inyo teritoryo. Kon sundon mo ini nga mga panugda, mangin mas epektibo ka pa gid sa pagbantala kag pagtudlo sa iban, gani mangin mas malipayon ka pa gid.—2 Tim. 4:5.

May gusto ka bala panikasugan nga himuon? (Tan-awa ang parapo 19) *

19. Ano ang puede mo himuon para mapakita mo ang maayo nga mga kinaiya?

19 Indi pagkalimti nga ang isa sa pinakaimportante nga dapat mo himuon amo ang pagpanikasog nga ipakita ang maayo nga mga kinaiya. (Gal. 5:22, 23; Col. 3:12; 2 Ped. 1:5-8) Paano mo ini mahimo? Ibutang ta nga gusto mo pabakuron ang imo pagtuo. Mahimo mo basahon ang mga artikulo sa aton mga publikasyon nga may mga panugda kon paano mo mapabakod ang imo pagtuo. Makabulig gid sa imo ang mga video sa JW Broadcasting® nga nagapakita sang dalayawon nga pagtuo sang aton mga kauturan nga nakaeksperiensia sang lainlain nga mga kabudlayan. Pamalandungi kon paano mo mailog ang ila pagtuo.

20. Ano ang himuon naton para mangin mas malipayon pa gid kita kag indi dalidali nga magluya ang aton buot?

20 Sigurado gid nga gusto naton tanan nga kuntani mas madamo pa ang mahimo naton para kay Jehova sangsa masarangan naton subong. Sa bag-ong kalibutan sang Dios, maalagad na naton sia sing bug-os. Samtang ginahulat naton ini nga tion, ano ang aton himuon? Kon himuon naton ang aton mga asaynment kag mga pribilehiyo sa bug-os naton nga masarangan, mangin mas malipayon pa gid kita kag indi dalidali nga magluya ang aton buot. Kag ang pinakaimportante, mapadunggan naton kag madayaw ang aton “malipayon nga Dios” nga si Jehova. (1 Tim. 1:11) Gani kabay pa nga mangin malipayon kita sa aton mga pribilehiyo subong.

AMBAHANON 82 “Paiwaga ang Inyo Kapawa”

^ par. 5 Palangga gid naton si Jehova, kag gusto naton himuon ang aton bug-os nga masarangan sa pag-alagad sa iya. Gani madamo sa aton ang nagapanikasog nga dugangan ang aton ginahimo nga pag-alagad, ukon nagatinguha nga mahatagan sing dugang nga mga pribilehiyo sa kongregasyon. Pero ano abi kon wala naton mabaton ang pila ka pribilehiyo nga gusto naton bisan pa ginhimo na naton ang aton bug-os nga masarangan? Ano ang puede naton himuon para padayon kita nga mangin masako sa aton pag-alagad kag pirme mangin malipayon? May sabat sa sini ang ilustrasyon ni Jesus parte sa mga talanton.

^ par. 2 Gin-islan ang pila ka ngalan.

^ par. 7 DUGANG NGA PAATHAG: Ang isa ka talanton katumbas sang mga 20 ka tuig nga sueldo sang ordinaryo nga trabahador.

^ par. 15 Ginapalig-on ang bawtismado nga mga brother nga tinguhaan nga mangin ministeryal nga alagad kag gulang. Ginabinagbinag sa kapitulo 5 kag 6 sang libro nga Organisado sa Paghimo sang Kabubut-on ni Jehova ang mga kalipikasyon para sa sini nga mga pribilehiyo.

^ par. 17 DUGANG NGA PAATHAG: Ang kabulig nga manuglaygay isa ka gulang nga gintangdo sa paghatag sing pribado nga laygay sa mga gulang kag mga ministeryal nga alagad may kaangtanan sa ila mga bahin sa kongregasyon. Magalaygay lang sia kon kinahanglanon.

^ par. 64 PIKTYUR: Gusto sang isa ka brother nga mangin mas epektibo sa pagtudlo sa iban, gani nag-research sia sa aton mga publikasyon.

^ par. 66 PIKTYUR: Gusto sang isa ka sister nga magpanaksi sing indi pormal, gani ginhatagan niya sing contact card ang isa ka waitress.

^ par. 68 PIKTYUR: Gusto sang isa ka sister nga ipakita ang maayo nga kinaiya, gani ginsorpresa niya ang isa pa gid ka sister paagi sa paghatag sa iya sing regalo.