Magdiretso sa kaundan

Magdiretso sa listahan sang kaundan

Ang Ginatagna ni Jehova Nagakatuman

Ang Ginatagna ni Jehova Nagakatuman

 Ang Ginatagna ni Jehova Nagakatuman

“AKO amo ang Dios, kag wala na gid sing iban, kag wala na gid sing kaangay sa akon; nga nagapahayag sang katapusan kutub sa ginsuguran, kag kutub sa dumaan nga mga tion sang mga butang nga wala pa mahimo.” (Isaias 46:9, 10) Amo ini ang ginsiling ni Jehova, ang isa nga wala nagasayop sa pagtagna sang palaabuton.

Napamatud-an na nga wala sing ikasarang ang tawo nga hibaluon sing sibu ang palaabuton. Bangod ang Biblia isa ka libro sang tagna, dapat hibaluon sang tanan nga nagapangita sing kamatuoran kon Dios gid man ang awtor sini. Binagbinagon naton ang pila ka tagna sang Biblia nga natuman na.

Dumaan nga mga Sibilisasyon

Ang Dios nagtagna nga ang Edom, Moab, kag Amon malaglag man sing dayon. (Jeremias 48:42; 49:17, 18; 51:24-26; Abdias 8, 18; Sofonias 2:8, 9) Ang pagkadula sini nga mga tawo subong isa ka pungsod nagapamatuod nga sibu ang matagnaon nga Pulong sang Dios.

Sa pagkamatuod, mahimo mangatarungan ang isa nga bisan sin-o pa ang pamangkuton mo, masiling gid sila nga bisan ano pa ka gamhanan sang isa ka pungsod, maabot gid ang tion nga madula ini. Apang, ginabalewala sini nga pangatarungan ang importante nga kamatuoran nga ang Biblia naghatag sing mga detalye. Halimbawa, gintul-id sini kon paano lutuson ang Babilonia. Gintagna sang Biblia nga lutuson sang mga Midianhon ang Babilonia, nga si Ciro ang magapanguna sa mga soldado nga magasalakay, kag ang mga suba nga nagaamlig sa siudad pamalhon.—Isaias 13:17-19; 44:27–45:1.

Indi sa tanan nga tion nagakadula sing dayon ang tanan nga pungsod kag katawhan nga gintagna sang Biblia nga malutos. Halimbawa, sang gintagna sang Biblia nga laglagon sang mga Babilonianhon ang Jerusalem, nagsiling ang Dios nga ipasag-uli ang Jerusalem, walay sapayan sang pagsulundan sang Babilonia nga ang ila mga bihag wala nila ginahilway. (Jeremias 24:4-7; 29:10; 30:18, 19) Natuman ini nga tagna, kag yara gihapon tubtob karon ang kaliwatan sang mga Judiyo subong isa ka pungsod.

Subong man, gintagna ni Jehova nga mapukan ang Egipto subong kagamhanan sa kalibutan  kag “ugaling puy-an ini subong sang sa mga adlaw nga dumaan.” Sa ulihi, ining dumaan nga kagamhanan ‘manginkubus nga ginharian.’ (Jeremias 46:25, 26; Ezequiel 29:14, 15) Natuman man ini nga tagna. Dugang pa, gintagna ni Jehova nga mapukan ang Gresya subong kagamhanan sa kalibutan, apang wala niya ginsiling nga madula ini nga pungsod. Ano ang matun-an naton sa nadula nga mga sibilisasyon nga gintagna ni Jehova nga mapapas kag sa padayon nga pagluntad sang iban nga mga sibilisasyon nga wala niya gintagna nga mapapas? Ginatudlo sini nga ang Pulong sang Dios nagaunod sing masaligan nga tagna.

Daw Indi Mapatihan nga mga Detalye

Subong sang ginsambit kaina, naghatag si Jehova sing madamo nga detalye kon paano mapukan ang Babilonia. Sing kaanggid, sang gintagna ang kalaglagan sang Tiro, ang tulun-an sang Ezequiel nagsiling nga ang mga bato, tablon, kag yab-ok sini “itagbong . . . sa tunga sang mga tubig.” (Ezequiel 26:4, 5, 12) Natuman ini nga tagna sang 332 B.C.E., sang ginpahimo ni Alejandro nga Daku sa iya mga hangaway ang isa ka alagyan nga human sa mga kagulub-an sang nalaglag nga sentro sang siudad pakadto sa isla nga bahin sini nga ginlutos man sang ulihi.

Ang tagna nga narekord sa Daniel 8:5-8, 21, 22 kag 11:3, 4 tuhoy sa prominente nga “hari sang Gresya” tuman gid ka detalyado. Ini nga manuggahom mapatay samtang yara sa putukputukan ang iya paggahom, kag bahinbahinon sa apat ang iya ginharian apang indi gikan sa iya mga kaliwat ang magagahom. Kapin sa 200 ka tuig sa tapos marekord ini nga tagna, napamatud-an nga si Alejandro nga Daku ining gamhanan nga hari. Ang sekular nga maragtas nagasugid sa aton nga temprano pa sia nga napatay kag sang ulihi ang iya ginharian nabahinbahin indi sa iya kaliwat kundi sa apat niya ka heneral.

Nagsiling ang mga kritiko nga ini nga tagna ginrekord pagkatapos ini matabo. Apang, binagbinaga liwat ang rekord sa tulun-an sang Daniel  nga ginsambit kaina. Kon ini matuod nga tagna, talalupangdon ang mga detalye sini. Apang, kon ini isa gali ka maragtas nga ginpagua nga isa ka tagna, ngaa may kulang nga mga detalye? Kon isa ka impostor sang patay na si Alejandro ang naghimuhimo sini nga tagna agod magbilib gid ang mga bumalasa sini, ngaa wala niya ginlakip ang detalye nga pagkatapos gid mapatay si Alejandro, duha sang iya mga anak nga lalaki ang magatinguha sa paghari apang patyon sila? Ngaa wala niya ginsambit nga mga dekada pa ang magaligad antes maggahom ang apat ka heneral sa nanuhaytuhay nga bahin sang emperyo ni Alejandro? Isa pa, ngaa wala niya ginsambit kon sin-o gid ang prominente nga hari kag ang iya apat ka heneral?

Ang pangangkon nga ang tagna sang Biblia ginsulat pagkatapos ini matabo isa ka madugay na kag wala mapamatud-i nga butang nga ginasiling sang mga tawo, nga sa baylo nga usisaon anay ang ebidensia, naghinakop na nga imposible itagna ang palaabuton. Bangod wala nila ginabaton ang Biblia subong Pulong sang Dios, ginapilit nila nga ipaathag ang bisan ano nga butang suno lamang sa tawhanon nga pagtamod. Apang, maalam gid ang Dios nga gintuytuyan niya ang iya mga manalagna nga maghatag sing hustuhan lang nga detalye sa ila pagpanagna agod mapamatud-an nga sia ang ginahalinan sini. *

Kon pamalandungan mo ang espesipiko nga mga tagna sa Biblia lakip ang mga katumanan sini, magabakod ang imo pagtuo. Tilawi nga tun-i ang isa ka tagna sang Biblia. Ang tsart sa pahina 200 sang libro nga “Ano Gid ang Ginatudlo Sang Biblia?” makabulig sa imo. * Sunda ini nga panugda agod magbakod ang imo pagtuo. Indi pagdalidali-a ang pagbasa sini. Sa baylo, binagbinaga sing maayo ang katunayan nga ang bisan ano nga ginatagna ni Jehova nagakatuman gid.

[Mga footnote]

^ par. 13 Para sa dugang pa nga impormasyon agod mapamatud-an nga sayop ang pangangkon nga ang tagna sang Biblia ginsulat pagkatapos ini matabo, tan-awa ang pahina 106-11 sang libro nga Is There a Creator Who Cares About You? nga ginabalhag sang mga Saksi ni Jehova.

^ par. 14 Ginabalhag sang mga Saksi ni Jehova.

[Kahon/Piktyur sa pahina 24]

MGA PRINSIPIO SA KABUHI

Pamalandungi man ini nga butang. Ang Dios nga nagtagna sang paggahom kag pagkapukan sang mga kagamhanan sa kalibutan amo man ang naghatag sang mga prinsipio sang Biblia sa kabuhi. Ang pila sini amo:

Anihon mo kon ano ang imo ginsab-ug.Galacia 6:7.

May kapin nga kalipay sa paghatag sangsa pagbaton.Binuhatan 20:35.

Malipayon ang mga mahunahunaon sang ila espirituwal nga kinahanglanon.Mateo 5:3.

Kon iaplikar mo ini nga mga prinsipio sa imo kabuhi, mangin malipayon ka kag madinalag-on.

[Mga piktyur sa pahina 22, 23]

Gintagna sang Pulong sang Dios nga madula sing dayon ini nga mga sibilisasyon . . .

EDOM

BABILONIA

. . . apang indi ang ini nga mga sibilisasyon

GRESYA

EGIPTO

[Mga Credit Line]

Pictorial Archive (Near Eastern History) Est.

WHO photo by Edouard Boubat

[Piktyur sa pahina 23]

Alejandro nga Daku