Magdiretso sa kaundan

Magdiretso sa listahan sang kaundan

 TULUN-AN NGA ARTIKULO 34

Paano Mo ‘Matilawan’ ang Kaayo ni Jehova?

Paano Mo ‘Matilawan’ ang Kaayo ni Jehova?

“Tilawi ninyo kag tan-awa nga si Jehova maayo; malipayon ang tawo nga nagadangop sa iya.”—SAL. 34:8.

AMBAHANON 117 Ang Maayo nga Kabubut-on ni Jehova

ANG BINAGBINAGON SA SINI NGA ARTIKULO *

1-2. Suno sa Salmo 34:8, paano naton matun-an ang parte sa kaayo ni Jehova?

IMADYINA nga may naghatag sa imo sing pagkaon nga wala mo pa natilawan. Para mahatagan ka sing ideya parte sa sini nga pagkaon, puede mo ini tan-awon, simhutan, hibaluon ang resipe sini, ukon pamangkuton ang iban nga nakatilaw na sini. Pero, mabal-an mo lang kon bala manamit gid ini kon tilawan mo ini.

2 Matun-an naton ang parte sa kaayo ni Jehova kon magbasa kita sang Biblia kag sang aton mga publikasyon, kag kon mabatian naton ang mga ginasiling sang iban parte sa mga pagpakamaayo ni Jehova sa ila. Pero masiling lang naton nga maayo gid si Jehova kon ‘matilawan’ naton ukon maeksperiensiahan naton ang iya kaayo. (Basaha ang Salmo 34:8.) Ari ang isa ka halimbawa. Ibutang ta nga gusto naton magpayunir. Pero para mahimo naton ini, kinahanglan naton pasimplehon ang aton kabuhi. Posible nga pirme naton ginabasa ang promisa ni Jesus nga kon unahon naton ang Ginharian, ihatag ni Jehova ang mga kinahanglanon naton. Pero wala pa naton maeksperiensiahan ini nga promisa. (Mat. 6:33) Bangod nagasalig kita sa promisa ni Jesus, nagkinot kita, gin-adjust naton ang aton iskedyul sa obra, kag nagpokus kita sa pagbantala. Dayon naeksperiensiahan naton mismo nga ginahatag gid ni Jehova ang mga kinahanglanon naton. Gani ‘natilawan’ gid naton ang kaayo ni Jehova.

3. Suno sa Salmo 16:1, 2, sin-o ang ginapakitaan ni Jehova sing kaayo?

3 Si Jehova “maayo sa tanan,” bisan sa mga wala nakakilala sa iya. (Sal. 145:9; Mat. 5:45) Pero mas madamo nga pagpakamaayo ang ginabaton sang mga nagapalangga kay Jehova kag sang mga nagaalagad sa iya sa bug-os nila nga masarangan. (Basaha ang Salmo 16:1, 2.) Binagbinagon naton ang pila ka halimbawa nga maayo gid si Jehova sa aton.

4. Paano ginpakita ni Jehova ang iya kaayo sa mga nagaaplikar sang iya ginatudlo?

 4 Sa kada tion nga ginaaplikar naton ang ginatudlo sa aton ni Jehova, makita naton ang maayo nga resulta sini. Halimbawa, sang nakilala pa gid naton sia sing maayo kag ginpalangga naton sia, ginbuligan niya kita nga untatan ang aton mga ginahunahuna kag ginahimo nga wala niya nahamut-an. (Col. 1:21) Kag sang nagdedikar kita kay Jehova kag nagpabawtismo, mas naeksperiensiahan pa gid naton ang iya kaayo kay ginhatagan niya kita sing maayo nga konsiensia kag nangin abyan naton sia.—1 Ped. 3:21.

5. Paano naton naeksperiensiahan ang kaayo ni Jehova sa aton pagbantala?

5 Sa kada tion nga nagabantala kita, maeksperiensiahan naton ang kaayo ni Jehova. Mahuluy-on ka bala? Madamo sa katawhan ni Jehova ang mahuluy-on. Posible nga antes ka nangin alagad ni Jehova, wala gid nagsulod sa imo pensar nga magkadto sa balay sang indi mo kilala kag sugiran sia parte sa topiko nga wala nanamian sang kalabanan nga tawo. Pero subong, regular mo na ini nga ginahimo. Kag ginbuligan ka pa gani ni Jehova nga manamian sa pagbantala. Madamo nga beses ka pa gid nga ginbuligan ni Jehova. Ginbuligan ka niya nga mangin kalmado sang naistorya mo ang isa ka opposer. Ginbuligan ka niya nga madumduman ang teksto nga bagay gid sa sitwasyon sang tagbalay nga interesado mamati. Kag ginpalig-on ka niya nga magpadayon sa pagbantala bisan pa wala nagapamati ang mga tawo.—Jer. 20:7-9.

6. Ngaa masiling naton nga ebidensia sang kaayo ni Jehova ang paghanas niya sa aton?

6 Ginpakita man ni Jehova ang iya kaayo sa aton paagi sa paghanas sa aton kon paano magbantala. (Juan 6:45) Sa aton midweek meeting, ginatun-an naton ang maayo nga mga sampol nga pag-istoryahanay, kag ginapalig-on kita nga gamiton ini sa aton pagbantala. Sa umpisa, mahimo nga nag-alang-alang kita nga gamiton ang bag-o nga mga paagi, pero sang gingamit naton ini, nakita naton nga epektibo ining bag-o nga mga paagi. Ginapalig-on man kita sa mga miting kag mga kombension nga testingan ang lainlain nga mga paagi sa pagbantala nga posible wala pa naton natestingan. Mahimo nga kinahanglan naton bag-uhon ang naandan na naton nga himuon. Pero kon testingan naton ang bag-o nga mga paagi, pakamaayuhon gid kita ni Jehova. Bisan ano man ang aton kahimtangan, testingan naton ang bag-o nga mga paagi para maalagad naton sia sa bug-os naton nga masarangan. Binagbinagon naton ang pila ka pagpakamaayo nga ihatag sa aton ni Jehova kon himuon naton ini. Dayon binagbinagon naton kon ano ang puede naton himuon para madugangan naton ang aton ginahimo nga pag-alagad sa iya.

GINAPAKAMAAYO NI JEHOVA ANG MGA NAGASALIG SA IYA

7. Ano nga pagpakamaayo ang mabaton naton kon panikasugan naton nga dugangan ang aton ginahimo nga pag-alagad kay Jehova?

7 Mas magasuod pa gid kita kay Jehova. Binagbinaga ang eksperiensia sang isa ka gulang nga si Samuel, * nga nagaalagad sa Colombia upod ang iya asawa. Malipayon nga nagapayunir ini nga mag-asawa sa ila kongregasyon, pero gusto nila dugangan ang ila ginahimo nga pag-alagad paagi sa pagbulig sa kongregasyon nga nagakinahanglan sang dugang nga manugbantala. Para mahimo ini, kinahanglan nila magsakripisyo. Si Samuel nagsiling: “Gin-aplikar namon ang Mateo 6:33 kag gin-untatan namon ang pagbakal sang mga butang nga indi namon kinahanglan. Pero nabudlayan gid kami nga bayaan ang amon ginaistaran. Kasaho gid kami diri, kag wala na kami sing ginabayaran para sa sini.” Sa bag-o nga asaynment sini nga mag-asawa, nasarangan nila nga mangabuhi bisan pa mga 15 porsiento lang sang ginakita nila sang una ang ila kuarta. Si Samuel nagsiling: “Naeksperiensiahan namon nga ginagiyahan gid kami ni Jehova kag ginasabat niya ang amon  mga pangamuyo. Mabatyagan namon nga nalipay sia sa amon, kag ginpabatyag niya sa amon sa tumalagsahon nga mga paagi nga palangga gid niya kami.” Puede mo pa bala madugangan ang imo ginahimo nga pag-alagad kay Jehova? Kon himuon mo ini, mas magasuod ka pa gid sa iya kag makasalig ka nga atipanon ka gid niya.—Sal. 18:25.

8. Ano ang matun-an mo sa ginsiling nanday Ivan kag Viktoria?

8 Malipay kita sa aton pag-alagad. Binagbinaga ang ginsiling sang mag-asawa nga sanday Ivan kag Viktoria nga nagapayunir sa Kyrgyzstan. Ginpasimple nila ang ila kabuhi para makaboluntaryo sila sa bisan ano nga asaynment, lakip sa mga proyekto sa konstruksion. Si Ivan nagsiling: “Ginahimo gid namon ang amon bug-os nga masarangan sa kada proyekto. Bisan pa kapoy kami kada hapon, malipayon gid kami bangod kabalo kami nga gingamit namon ang amon kusog para kay Jehova. Nalipay man kami bangod madamo kami sing nangin abyan kag indi malipatan nga mga eksperiensia.”—Mar. 10:29, 30.

9. Ano ang ginhimo sang isa ka sister nga may mabudlay nga kahimtangan para madugangan niya ang iya ginahimo nga pag-alagad kay Jehova, kag ano ang resulta?

9 Bisan pa mabudlay ang aton kahimtangan, puede kita gihapon mangin malipayon sa aton pag-alagad kay Jehova. Binagbinaga ang eksperiensia ni Mirreh nga isa ka doktora sa West Africa. Tigulang na sia kag balo na. Sang nagretiro na sia, nagpayunir sia. May malala sia nga arthritis kag mga isa ka oras lang ang masarangan niya kon magpamalaybalay. Gani ginagamit niya ang iya madamo nga oras sa pagbantala paagi sa cart. Madamo sia sing return visit kag Bible study. Ang pila sa ila nakontak niya paagi sa telepono. Ano ang nagpalig-on kay Mirreh nga dugangan ang iya ginahimo nga pag-alagad kay Jehova? Nagsiling sia: “Palangga ko gid si Jehova kag si Cristo Jesus. Kag pirme ako nagapangamuyo kay Jehova nga buligan niya ako nga mahimo ang akon bug-os nga masarangan sa pag-alagad sa iya.”—Mat. 22:36, 37.

10. Suno sa 1 Pedro 5:10, ano ang ginahimo ni Jehova sa mga nagapanikasog nga madugangan ang ila pag-alagad sa iya?

10 Ginahanas pa gid kita ni Jehova. Amo ini ang naeksperiensiahan ni Kenny, nga nagapayunir sa Mauritius. Sang natun-an niya ang kamatuoran, nag-untat sia sa pag-eskwela sa unibersidad, nagpabawtismo, kag nagpayunir. Nagsiling sia, “Gusto ko ilugon si manalagna Isaias, nga nagsiling: ‘Yari ako! Ipadala ako!’” (Isa. 6:8) Nakaboluntaryo si Kenny sa madamo nga proyekto sa konstruksion, kag nakabulig man sia sa pag-translate sang mga publikasyon nga nabase sa Biblia sa iya namat-an nga lenguahe. “Ginhanas ako para mahimo ko ang akon mga asaynment,” siling ni Kenny. Pero indi lang parte sa kon paano himuon ang isa ka asaynment ang iya natun-an. Nagsiling pa sia, “Natun-an ko kon ano ang akon mga limitasyon kag kon ano nga mga kinaiya ang dapat ko ipakita para mangin mas maayo ako nga alagad ni Jehova.” (Basaha ang 1 Pedro 5:10.) Palihug usisaa ang imo kahimtangan kag hibalua kon ano nga mga pagbag-o ang puede mo himuon para mahanas ka pa gid ni Jehova.

Ang isa ka mag-asawa nagabantala sa lugar nga kinahanglan ang dugang nga manugbantala sang Ginharian; ang isa ka pamatan-on nga sister nagabulig sa konstruksion sang Kingdom Hall; ang tigulang na nga mag-asawa nagapanaksi paagi sa telepono. Malipayon gid sila tanan sa ila ginahimo (Tan-awa ang parapo 11)

11. Ano ang ginhimo sang mga sister sa South Korea para makabantala sila, kag ano ang resulta? (Tan-awa man ang piktyur sa kober.)

11 Nakabenepisyo man bisan ang madugay na nga mga Saksi sang ginhanas sila sa bag-o nga mga paagi. Sa tion sang COVID-19 nga pandemic, ang mga gulang sa isa ka kongregasyon sa South Korea nagsulat: “May pila ka utod nga nabudlayan magbantala bangod sang ila ginabatyag sa lawas. Subong, regular na sila nga nagabantala paagi sa videoconference. Natun-an sang tatlo ka sister nga otsentahon na kon paano gamiton ang computer, kag halos adlaw-adlaw sila nga nagabantala subong.” (Sal. 92:14, 15) Gusto mo bala dugangan ang imo ginahimo nga pag-alagad kay Jehova para maeksperiensiahan mo pa gid ang iya kaayo? Binagbinagon naton ang mga puede mo himuon.

 PAANO MO MADUGANGAN ANG IMO GINAHIMO NGA PAG-ALAGAD KAY JEHOVA?

12. Ano ang ginpromisa ni Jehova sa mga nagasalig sa iya?

12 Magsalig kay Jehova. Nagpromisa sia nga pakamaayuhon gid niya kita kon magsalig kita sa iya kag kon ihatag naton sa iya ang aton pinakamaayo. (Mal. 3:10) Naeksperiensiahan ini sang isa ka sister sa Colombia nga si Fabiola. Gusto niya magregular payunir pagkatapos niya mabawtismuhan. Pero, ang iya sueldo ang ginasaligan sang iya bana kag sang ila tatlo ka bata. Gani sang puede na sia magretiro, hanuot sia nga nangamuyo kay Jehova nga buligan sia. Nagsiling sia: “Sa masami, madugay ang proseso para makabaton sang pension. Pero nabaton ko dayon ang akon pension pagligad lang sang isa ka bulan. Daw indi ako makapati!” Pagligad sang duha ka bulan, nagpayunir sia. Sobra na sia 70 anyos subong, kag sobra 20 ka tuig na sia nga nagapayunir. Sa sini nga tion, walo ang nabuligan niya nga magpabawtismo. Nagsiling sia: “May mga tion nga indi maayo ang akon pamatyag, pero ginabuligan ako ni Jehova kada adlaw para makapadayon ako sa pagpayunir.”

Paano ginpakita nanday Abraham kag Sara, ni Jacob, kag sang mga saserdote nga nagtabok sa Suba Jordan nga nagasalig sila kay Jehova? (Tan-awa ang parapo 13)

13-14. Kay sin-o mga halimbawa ang makabulig sa aton nga magsalig kay Jehova kag magpanikasog nga madugangan ang aton ginahimo nga pag-alagad sa iya?

13 Tun-i ang halimbawa sang mga nagsalig kay Jehova. Madamo nga alagad ni Jehova ang nagpanikasog gid sa ila pag-alagad sa iya. Mabasa naton ini sa Biblia. Antes sila ginpakamaayo ni Jehova, ginpakita anay nila nga nagasalig sila sa iya. Halimbawa, nabaton lang ni Abraham ang pagpakamaayo ni Jehova pagkatapos niya ginbiyaan ang iya natawhan nga lugar “bisan pa wala niya mahibaluan kon diin sia makadto.” (Heb. 11:8) Nabaton lang ni Jacob ang pinasahi nga  pagpakamaayo ni Jehova pagkatapos niya magpakigdumog sa isa ka anghel. (Gen. 32:24-30) Sang manugsulod na sa Ginsaad nga Duta ang pungsod sang Israel, nakatabok lang ang katawhan sa masulog nga Suba Jordan sang nag-ubog na sa suba ang mga saserdote.—Jos. 3:14-16.

14 Makatuon ka man sa halimbawa sang mga kauturan sa aton tion subong nga nagsalig kay Jehova. Ang isa ka halimbawa amo si Payton kag ang iya asawa nga si Diana. Nanamian sila magbasa sang mga eksperiensia sang mga kauturan nga nagpanikasog nga madugangan ang ila ginahimo nga pag-alagad kay Jehova, pareho sang mabasa sa mga artikulo nga “Naghalad sang Ila Kaugalingon sing Kinabubut-on.” * Si Payton nagsiling: “Samtang ginabasa namon ang ila mga eksperiensia, pamatyag namon daw pareho lang nga nagatan-aw kami sa isa ka tawo nga nalipay gid nga nagakaon sang manamit nga pagkaon. Samtang nagadugay, daw gusto man namon tilawan ang pagkaon. Gani gusto man namon ‘tilawan kag tan-awon ang kaayo ni Jehova.’” Sang ulihi, nagsaylo sanday Payton kag Diana sa lugar nga nagakinahanglan sang dugang nga manugbantala. Nabasa mo na bala ini nga mga artikulo? Kag natan-aw mo na bala ang mga video nga Pagwali sa Malayo nga mga Lugar—Australia kag ang Witnessing in Isolated Territory—Ireland nga makita sa jw.org? Makabulig ini sa imo nga mabal-an ang mga puede mo himuon para madugangan mo ang imo ginahimo nga pag-alagad kay Jehova.

15. Ngaa dapat naton pilion ang mga kaupdanan nga magapalig-on sa aton?

15 Pilia ang mga kaupdanan nga magapalig-on sa imo. Mas mapalig-on kita nga tilawan ang pagkaon nga wala pa naton natilawan kon mag-upod kita sa mga tawo nga nanamitan sini nga pagkaon. Mas mapalig-on man kita nga dugangan ang aton ginahimo nga pag-alagad kay Jehova kon mag-upod kita sa mga kauturan nga nagahimo sini. Naeksperiensiahan ini sang mag-asawa nga sanday Kent kag Veronica. Nagsiling si Kent: “Ginpalig-on kami sang amon mga abyan kag pamilya nga testingan ang bag-o kag sarisari nga mga paagi sa pag-alagad. Paagi sa pag-upod sa mga kauturan nga nagauna sang Ginharian sa ila kabuhi, napalig-on gid kami nga testingan ini.” Subong, mga espesyal payunir sanday Kent kag Veronica sa Serbia.

16. Suno sa ilustrasyon ni Jesus sa Lucas 12:16-21, ngaa dapat handa kita magsakripisyo?

16 Magsakripisyo para kay Jehova. Indi man buot silingon nga isakripisyo naton ang tanan nga nanamian naton para malipay sa aton si Jehova. (Man. 5:19, 20) Pero, kon indi naton gusto dugangan ang aton ginahimo nga pag-alagad sa Dios bangod indi naton gusto pag-isakripisyo ang pila ka butang nga nanamian naton, posible nga mangin pareho kita sa tawo sa ilustrasyon ni Jesus. Nagpanikasog gid ini nga tawo para mangin komportable ang iya kabuhi, pero ginbalewala niya ang Dios. (Basaha ang Lucas 12:16-21.) Ang isa ka brother nga si Christian, nga taga-France, nagsiling, “Wala ko ginahatag ang akon bug-os nga tion kag kusog para kay Jehova kag sa akon pamilya.” Gani nagdesisyon sia kag ang iya asawa nga magpayunir. Pero para mahimo nila ini, kinahanglan nila mag-resign sa ila obra. Para masuportahan ang ila kaugalingon, nagapaninlo sila sang mga balay kag mga opisina. Nangin kontento sila bisan pa mas diutay subong ang ila kuarta. Nalipay bala sila sa resulta sang ila pagsakripisyo? Si Christian nagsiling: “Mas malipayon kami subong sa amon pagbantala. Nalipay man kami nga tudluan parte kay Jehova ang amon mga Bible study kag ang mga interesado nga amon ginabalikan.”

17. Ano ang posible nga rason kon ngaa nagaalang-alang kita nga testingan ang bag-o nga mga paagi sa pagbantala?

17 Mangin handa nga testingan ang bag-o nga mga paagi sa pagbantala. (Binu. 17:16, 17;  20:20, 21) Sa tion sang COVID-19 nga pandemic, gin-adjust ni Shirley nga isa ka payunir sa United States ang iya paagi sa pagbantala. Sang primero, nagaalang-alang sia nga testingan ang pagbantala paagi sa telepono. Pero sa tion sang bisita sang manugtatap sang sirkito, ginhanas sia kon paano ini himuon. Subong, regular na sia nga nagabantala paagi sa telepono. Nagsiling sia: “Sa umpisa, ginakulbaan ako. Pero subong, nanamian gid ako sa sini. Mas madamo nga tawo ang mabantalaan namon subong sangsa pamalaybalay nga paagi.”

18. Ano ang makabulig sa aton kon nabudlayan kita nga dugangan ang aton ginahimo nga pag-alagad kay Jehova?

18 Maghimo sing plano kag tinguhai gid nga sundon ini. Kon may mga problema kita, nagapangamuyo kita kag ginahunahuna naton sing maayo kon ano ang dapat naton nga himuon. (Hulu. 3:21) Si Sonia, nga nagapayunir sa isa ka grupo nga nagabantala sa mga nagahambal sang Romany sa Europe, nagsiling: “Ginasulat ko sa papel ang mga ginaplano ko nga himuon kag ginabutang ko ini sa lugar nga makita ko ini pirme. Sa akon lamesa, may drowing sang duha ka dalan nga indi pareho ang direksion. Kon kinahanglan ko magdesisyon, ginatan-aw ko ining duha ka dalan. Dayon ginaimadyin ko ang mangin resulta sang akon desisyon, depende sa dalan nga akon pilion.” Ginatinguhaan ni Sonia nga mangin positibo bisan pa may mga problema sia. Nagsiling sia: “Kon magbag-o ang akon sitwasyon, puede ko ini tan-awon nga daw pareho sang pader nga nagabalabag sa akon alagyan, ukon puede ko man ini tan-awon nga daw pareho sang taytay nga makabulig sa akon. Depende ini sa akon panimuot.”

19. Ano ang dapat naton himuon?

19 Ginapakamaayo gid kita ni Jehova. Mapakita naton nga nagapasalamat kita sa iya paagi sa paghimo sang aton bug-os nga masarangan nga madayaw sia. (Heb. 13:15) Nalakip sa sini ang pagpanikasog nga dugangan ang aton ginahimo nga pag-alagad kay Jehova. Kon nagapanikasog kita, pakamaayuhon pa gid niya kita. Kada adlaw, mangita kita sang mga kahigayunan nga ‘matilawan naton kag makita ang kaayo ni Jehova.’ Kon himuon naton ini, masiling man naton ang ginsiling ni Jesus: “Ang akon pagkaon amo ang paghimo sang kabubut-on sang nagpadala sa akon kag ang pagtapos sang iya buluhaton.”—Juan 4:34.

AMBAHANON 80 Tilawi kag Tan-awa nga Maayo si Jehova

^ par. 5 Si Jehova ang ginahalinan sang tanan nga maayo nga butang. Ginahatagan niya sing maayo nga mga butang ang tanan, bisan ang malain nga mga tawo. Pero mas gusto niya nga pakitaan sing kaayo ang iya matutom nga mga alagad. Sa sini nga artikulo, binagbinagon naton kon paano niya ginapakita ang iya kaayo sa ila. Binagbinagon man naton kon paano ginapakita ni Jehova ang iya tumalagsahon nga kaayo sa iya mga alagad nga nagapanikasog gid nga madugangan ang ila ginahimo nga pag-alagad sa iya.

^ par. 7 Gin-islan ang pila ka ngalan.

^ par. 14 Sang una, mabasa ini nga mga artikulo sa Ang Lalantawan. Subong, mabasa ini sa jw.org/hil. Kadtui ang PARTE SA AMON > EKSPERIENSIA > PAGLAB-OT SANG ESPIRITUWAL NGA MGA TULUMURON.