Magdiretso sa kaundan

Magdiretso sa listahan sang kaundan

 TULUN-AN NGA ARTIKULO 30

Pabalori ang Imo Posisyon sa Pamilya ni Jehova

Pabalori ang Imo Posisyon sa Pamilya ni Jehova

“Ginhimo mo sia nga mas manubo sangsa mga anghel, kag ginkoronahan mo sia sing himaya kag dungog.”—SAL. 8:5.

AMBAHANON 123 Mainunungon nga Magpasakop sa Kahimusan sang Dios

ANG BINAGBINAGON SA SINI NGA ARTIKULO *

1. Ano ang mahimo naton ipamangkot kon pamalandungan naton ang tanan nga gintuga ni Jehova?

KON pamalandungan naton ang uniberso nga gintuga ni Jehova, mabatyagan man naton ang ginbatyag ni salmista David. Nangamuyo sia kay Jehova: “Kon makita ko ang kalangitan, ang binuhatan sang imo mga tudlo, ang bulan kag ang kabituunan nga imo ginhimo, ano gid bala ang mamalatyon nga tawo nga ginadumdom mo sia, kag ang anak sang tawo nga ginaatipan mo sia?” (Sal. 8:3, 4) Pareho ni David, mahimo mahunahuna naton nga tuman sa aton kagamay kon ikumparar sa mga bituon nga gintuga ni Jehova, gani daw indi kita makapati nga ginadumdom niya kita. Pero matun-an naton nga magluwas nga gin-atipan ni Jehova ang una nga mga tawo nga sanday Adan kag Eva, ginlakip man niya sila sa iya pamilya.

2. Ano ang ginsugo ni Jehova sa iya una nga mga anak sa duta?

2 Sanday Adan kag Eva amo ang una nga mga anak ni Jehova sa duta, kag si Jehova amo ang ila mahigugmaon nga Amay sa langit. Bilang bahin sang iya pamilya, ginsugo niya sila: “Magpanganak kamo kag magdamo, pun-a ninyo ang duta kag dumalahan ini.” (Gen. 1:28) Gusto niya nga magpanganak sila kag atipanon ang duta nga ila ginaistaran. Kon gintuman nanday Adan kag Eva si Jehova kag kon ginhimo nila ang ginsugo niya sa ila, magapabilin sila nga bahin sang pamilya sang Dios pati ang ila mga anak asta sa wala sing katapusan.

3. Ngaa makasiling kita nga ginhatagan ni Jehova sing dungganon nga posisyon sanday Adan kag Eva sa iya pamilya?

3 Ginhatagan ni Jehova sanday Adan kag Eva sing dungganon nga posisyon sa iya pamilya. Sa Salmo 8:5, amo ini ang ginsiling ni David parte sa pagtuga ni Jehova sa tawo: “Ginhimo mo sia nga mas manubo sangsa mga anghel, kag ginkoronahan mo sia sing himaya kag dungog.” Mas labaw ang kusog, kaalam, kag mga ikasarang nga ginhatag sa mga anghel kon ikumparar sa ginhatag sa mga  tawo. (Sal. 103:20) Pero “mas manubo” lang gamay ang mga tawo kon ikumparar sa gamhanan nga mga anghel. Dalayawon gid ang ginhatag ni Jehova nga kabuhi sa aton una nga mga ginikanan!

4. Ano ang natabo kanday Adan kag Eva kay wala nila gintuman si Jehova, kag ano ang binagbinagon naton sa sini nga artikulo?

 4 Makapasubo nga wala gintuman nanday Adan kag Eva si Jehova, gani indi na sila bahin sang iya pamilya. Bangod sini, nahalitan gid ang ila mga anak. Binagbinagon naton ini sa sini nga artikulo. Pero wala nagbag-o ang katuyuan ni Jehova. Gusto niya nga mangin iya mga anak ang matinumanon nga mga tawo. Binagbinagon anay naton kon paano ginpakita ni Jehova nga importante kita sa iya. Dayon, binagbinagon naton kon ano ang mga puede naton himuon subong para ipakita nga gusto naton mangin bahin sang pamilya sang Dios. Kag binagbinagon naton ang mga pagpakamaayo nga mabaton sang mga bahin sang pamilya ni Jehova sa duta.

GINPADUNGGAN NI JEHOVA ANG MGA TAWO

Paano kita ginapadunggan ni Jehova? (Tan-awa ang parapo 5-11) *

5. Paano naton mapadunggan ang Dios kay gintuga niya kita suno sa iya larawan?

5 Gintuga kita ni Jehova suno sa iya larawan. (Gen. 1:26, 27) Gani puede naton mapakita ang iya dalayawon nga mga kinaiya pareho sang gugma kag kaluoy, kag puede man kita mangin mainunungon kag matarong. (Sal. 86:15; 145:17) Kon ginapakita naton ini nga mga kinaiya, ginapadunggan naton si Jehova kag ginapakita naton nga nagapasalamat kita sa iya. (1 Ped. 1:14-16) Kon ang aton mga ginahimo kag paggawi nagapahalipay sa aton Amay sa langit, malipayon man kita kag kontento. Kag bangod gintuga kita ni Jehova suno sa iya larawan, may ikasarang kita nga mapakita ang mga kinaiya nga gusto niya nga makita sa mga tawo nga bahin sang iya pamilya.

6. Paano ginpadunggan ni Jehova ang mga tawo sang gintuga niya ang duta?

6 Ginsigurado ni Jehova nga mangin manami ang planeta nga duta nga aton ginaistaran. Antes gintuga ni Jehova ang mga tawo, ginsigurado niya nga ara na sa duta ang tanan nga kinahanglan nila. (Job 38:4-6; Jer. 10:12) Bangod maalwan si Jehova kag ginahunahuna niya ang aton kaayuhan, nagtuga sia sang madamo nga maayo nga mga butang para malipay kita. (Sal. 104:14, 15, 24) May mga tion nga gin-apresyar niya ang iya mga gintuga, kag ‘nakita niya nga maayo ini.’ (Gen. 1:10, 12, 31) Ginpadunggan niya ang mga tawo paagi sa paghatag sa ila sang responsibilidad nga ‘gamhan’ ang tanan niya nga dalayawon nga mga tinuga sa duta. (Sal. 8:6) Gusto sang Dios nga mangin malipayon ang perpekto nga mga tawo sa pag-atipan sa iya mga tinuga. Gusto niya nga himuon nila ini asta sa wala sing katapusan. Pirme mo bala ginapasalamatan si Jehova bangod sa sining dalayawon nga responsibilidad nga ginhatag niya sa mga tawo?

7. Paano ginapakita sang Josue 24:15 nga may kahilwayan sa pagdesisyon ang mga tawo?

7 Ginhatagan kita ni Jehova sing kahilwayan sa pagdesisyon. Buot silingon, makadesisyon kita kon ano ang gusto naton nga himuon sa aton kabuhi. (Basaha ang Josue 24:15.) Palangga kita sang Dios, gani nalipay sia kon magdesisyon kita nga alagaron sia. (Sal. 84:11; Hulu. 27:11) Bangod sa sini nga kahilwayan, madamo kita sing mahimo nga maayo nga mga desisyon. Binagbinaga kon paano ini ginhimo ni Jesus.

8. Maghatag sing halimbawa kon paano gingamit ni Jesus ang iya kahilwayan sa pagdesisyon.

8 Mailog naton si Jesus kon magdesisyon kita nga unahon ang kaayuhan sang iban, indi ang aton kaayuhan. Isa ka bes, kapoy gid si Jesus kag ang iya mga apostoles, gani nagkadto sila sa isa ka malinong nga lugar kay gusto nila nga magpahuway sing makadali. Pero wala sila nakapahuway. Nakita sila sang madamo nga tawo kag gusto nila nga tudluan sila ni Jesus. Wala maakig si Jesus sa mga tawo. Sa baylo, naluoy sia sa ila. Ano ang ginhimo ni Jesus? “Gintudluan niya sila sing madamo nga butang.” (Mar. 6:30-34) Kon  ilugon naton si Jesus paagi sa paggamit sang aton tion kag kusog para buligan ang iban, ginapadunggan naton ang aton Amay sa langit. (Mat. 5:14-16) Ginapakita man naton kay Jehova nga gusto naton mangin bahin sang iya pamilya.

9. Ano ang espesyal nga regalo nga ginhatag ni Jehova sa mga tawo?

9 Ginhatagan ni Jehova ang mga tawo sing ikasarang nga magpanganak, kag sing responsibilidad nga tudluan ang ila mga anak nga palanggaon kag alagaron sia. Kon isa ikaw ka ginikanan, ginaapresyar mo bala ining espesyal nga regalo? Ginhatagan ni Jehova ang mga anghel sing madamo nga dalayawon nga ikasarang, pero wala niya sila ginhatagan sing ikasarang nga magpanganak. Gani kon isa ikaw ka ginikanan, pabalori ang imo pribilehiyo nga magpadaku sang imo kabataan. Ginhatagan ang mga ginikanan sing importante nga responsibilidad nga padakuon ang ila kabataan “sa disiplina kag laygay ni Jehova.” (Efe. 6:4; Deut. 6:5-7; Sal. 127:3) Madamo sing gin-aman ang organisasyon sang Dios para buligan ang mga ginikanan. Nalakip sa sini ang nabase sa Biblia nga mga publikasyon, video, musika, kag mga impormasyon nga mabasa sa aton website. Palangga gid sang aton Amay sa langit kag sang iya Anak ang aton mga bata. (Luc. 18:15-17) Kon nagapagiya ang mga ginikanan kay Jehova kag kon ginahimo nila ang ila bug-os nga masarangan para atipanon ang ila pinalangga nga kabataan, nalipay gid si Jehova. Ginabuligan man sini nga mga ginikanan ang ila kabataan nga mangin bahin sang pamilya ni Jehova.

10-11. Bangod nag-aman si Jehova sang gawad, ano nga paglaum ang nangin posible para sa aton?

10 Ginhatag ni Jehova ang iya pinalangga nga Anak para may paglaum kita nga mangin bahin liwat sang Iya pamilya. Ginsambit sa  parapo 4 nga sang nagpakasala sanday Adan kag Eva, indi na sila bahin sang pamilya ni Jehova pati ang ila mga anak. (Roma 5:12) Hungod nga wala gintuman nanday Adan kag Eva ang Dios, gani dapat sila pahalinon sa iya pamilya. Pero ano ang matabo sa ila mga anak? Palangga ni Jehova ang mga tawo, gani naghimo sia sing paagi para maadoptar niya sa iya pamilya ang matinumanon nga mga tawo. Ginhimo niya ini paagi sa paghalad sang iya bugtong nga Anak nga si Jesucristo. (Juan 3:16; Roma 5:19) Bangod sa halad-gawad ni Jesus, gin-adoptar bilang mga anak sang Dios ang 144,000 ka matutom nga mga tawo.—Roma 8:15-17; Bug. 14:1.

11 May minilyon pa ka matutom kag matinumanon nga katawhan nga nagahimo sang kabubut-on sang Dios. May paglaum sila nga mangin bahin sang pamilya sang Dios sa katapusan sang Isa ka Libo ka Tuig nga Paggahom sang Cristo pagkatapos sang katapusan nga pagtilaw. (Sal. 25:14; Roma 8:20, 21) Bangod sini nga paglaum, ginatawag na nila nga “Amay” si Jehova, nga ila Manunuga. (Mat. 6:9) Hatagan man sing kahigayunan ang mga banhawon nga matun-an ang mga ginapatuman ni Jehova. Ang mga magatuman sa iya mangin bahin man sang iya pamilya.

12. Ano nga pamangkot ang sabton naton?

12 Natun-an naton nga madamo na sing ginhimo si Jehova para padunggan ang mga tawo. Gin-adoptar na niya bilang iya mga anak ang mga hinaplas, kag ginhatagan niya sing paglaum ang “daku nga kadam-an” nga mangin iya mga anak sa bag-ong kalibutan. (Bug. 7:9) Ano ang puede naton himuon subong para ipakita kay Jehova nga gusto naton mangin bahin sang iya pamilya?

IPAKITA KAY JEHOVA NGA GUSTO MO MANGIN BAHIN SANG IYA PAMILYA

13. Ano ang himuon naton para mangin bahin kita sang pamilya sang Dios? (Marcos 12:30)

13 Palanggaa si Jehova paagi sa pag-alagad sa iya sa bug-os mo nga tagipusuon. (Basaha ang Marcos 12:30.) Madamo nga regalo ang ginhatag sang Dios sa aton. Ang isa sa pinakadalayawon niya nga regalo amo ang aton ikasarang nga simbahon sia. Mapakita naton kay Jehova nga palangga naton sia kon ‘ginatuman naton ang iya mga sugo.’ (1 Juan 5:3) Ang isa ka sugo  nga gusto ni Jehova nga tumanon naton amo ang ginsugo ni Jesus nga tudluan naton ang mga tawo para mangin disipulo sila, kag bawtismuhan sila. (Mat. 28:19) Ginsugo man kita ni Jesus nga maghigugmaanay. (Juan 13:35) Kon matinumanon ang isa, mangin bahin sia sang pamilya ni Jehova sa bilog nga kalibutan nga nagasimba sa Iya.—Sal. 15:1, 2.

14. Paano naton mapakita nga palangga naton ang iban? (Mateo 9:36-38; Roma 12:10)

14 Palanggaa ang iban. Ang gugma amo ang pinakaimportante nga kinaiya ni Jehova. (1 Juan 4:8) Palangga na kita ni Jehova antes pa naton sia nakilala. (1 Juan 4:9, 10) Mailog naton sia kon palanggaon naton ang iban. (Efe. 5:1) Ang isa sa pinakamaayo nga paagi nga mapakita naton nga palangga naton ang mga tawo amo ang pagbulig sa ila nga makatuon parte kay Jehova samtang may tion pa. (Basaha ang Mateo 9:36-38.) Paagi sa sini, ginahatagan naton sila sing kahigayunan nga mabal-an kon ano ang dapat nila himuon para mangin bahin sila sang pamilya sang Dios. Kon mabawtismuhan na ang isa ka tawo, dapat naton sia padayon nga palanggaon kag respetuhon. (1 Juan 4:20, 21) Paano naton ini mahimo? Ang isa ka paagi amo ang pagpakita sa iya nga nagasalig kita sa iya kag wala naton sia ginadudahan. Halimbawa, indi naton paghunahunaon nga may malain sia nga motibo ukon para lang sa iya kaayuhan ang iya mga ginahimo. Sa baylo, dapat naton padunggan ang aton utod ukon kabigon naton nga mas labaw sia sangsa aton.—Basaha ang Roma 12:10; Fil. 2:3.

15. Sin-o ang dapat naton pakitaan sing kaluoy kag kaayo?

15 Magpakita sing kaluoy kag kaayo sa tanan nga tawo. Kon gusto naton mangin bahin sang pamilya ni Jehova, dapat naton iaplikar ang Pulong sang Dios sa aton kabuhi. Halimbawa, gintudluan kita ni Jesus nga dapat naton pakitaan sing kaluoy kag kaayo ang tanan nga tawo, bisan pa ang aton mga kaaway. (Luc. 6:32-36) Posible nga nabudlayan kita nga himuon ini kon kaisa. Gani dapat naton panikasugan nga ilugon ang panghunahuna ni Jesus kag ang iya mga ginhimo. Kon ginahimo naton ang aton bug-os nga masarangan nga tumanon si Jehova kag ilugon si Jesus, ginapakita naton sa aton Amay sa langit nga gusto naton mangin bahin sang iya pamilya.

16. Paano naton mapakita nga ginahalungan naton ang reputasyon sang pamilya ni Jehova?

16 Halungi ang reputasyon sang pamilya ni Jehova. Sa pamilya, masami nga ginailog sang manghod ang ginahimo sang iya magulang. Kon ginaaplikar sang magulang ang mga prinsipio sa Biblia sa iya kabuhi, mangin maayo sia nga halimbawa sa iya manghod. Kon malain naman ang himuon sang magulang, mahimo man ini sundon sang iya manghod. Pareho man ini sa pamilya ni Jehova. Kon ang isa ka matutom nga Saksi sang una mangin apostata, imoral, ukon maghimo sang malain, posible nga ilugon sang iban ang ginahimo niya nga malain. Ang mga nagahimo sini nagaguba sang reputasyon sang pamilya ni Jehova. (1 Tes. 4:3-8) Indi gid naton dapat pag-ilugon ang mga nagahimo sang malain, kag dapat gid naton panikasugan nga indi maguba ang aton kaangtanan sa aton mahigugmaon nga Amay sa langit.

17. Ano ang indi naton dapat paghunahunaon, kag ngaa?

17 Magsalig kay Jehova, indi sa materyal nga mga butang. Nagpromisa si Jehova nga kon unahon naton ang iya Ginharian kag sundon naton ang iya matarong nga mga ginapatuman, amanan niya kita sang aton pagkaon, panapton, kag ilistaran. (Sal. 55:22; Mat. 6:33) Kon nagasalig kita sa sini nga promisa, indi gid naton paghunahunaon nga maamligan kita sang materyal nga mga butang sini nga kalibutan ukon makahatag ini sang kalipay. Kabalo kita nga ang paghimo sang kabubut-on ni Jehova amo lang ang paagi para mangin malinong ang aton hunahuna. (Fil. 4:6, 7) Bisan pa masarangan naton magbakal sang madamo nga butang, dapat naton binagbinagon kon bala may tion pa kita ukon kusog para gamiton  ini kag mentinahon. Indi ayhan nga sa ulihi ang aton na lang mga pagkabutang ang aton pirme ginapamensar? Dapat naton tandaan nga may ginapahimo ang Dios sa aton bilang mga miembro sang iya pamilya. Gani dapat kita magpokus sa ginapahimo sa aton ni Jehova. Indi naton pag-ilugon ang isa ka pamatan-on nga wala nagsunod kay Jesus kay mas importante sa iya ang iya mga pagkabutang. May kahigayunan kuntani sia nga maalagad si Jehova kag maadoptar bilang isa sa Iya mga anak, pero ginbalewala niya ini.—Mar. 10:17-22.

ANG MGA PAGPAKAMAAYO NGA IHATAG NI JEHOVA SA IYA MGA ANAK

18. Ano nga dalayawon nga pribilehiyo kag mga pagpakamaayo ang maeksperiensiahan sang matinumanon nga mga tawo?

18 Maeksperiensiahan sang matinumanon nga mga tawo ang pinakadalayawon nga pribilehiyo nga amo ang palanggaon kag simbahon si Jehova sing wala sing katapusan. Malipay gid ang mga may paglaum nga magkabuhi sa duta sa pag-atipan sa aton matahom nga planeta. Perpekto ini nga gintuga ni Jehova para istaran sang mga tawo. Paagi sa Ginharian sang Dios, mangin matahom liwat ang duta kag ang tanan nga ari diri. Dulaon ni Jesus ang tanan nga problema nga resulta sang desisyon nanday Adan kag Eva nga bayaan ang pamilya sang Dios. Banhawon ni Jehova ang minilyon nga napatay kag hatagan niya sila sing kahigayunan nga mabuhi sing wala sing katapusan sa duta nga isa na ka paraiso, kag mangin perpekto ang ila panglawas. (Luc. 23:42, 43) Kon mangin perpekto na ang tanan nga tawo nga nagaalagad kay Jehova, mapakita na nila ang “himaya kag dungog” nga ginsambit ni David sa iya salmo.—Sal. 8:5.

19. Ano ang dapat naton pirme dumdumon?

19 Kon bahin ka sang “daku nga kadam-an,” may dalayawon ka nga paglaum. Palangga ka sang Dios, kag gusto niya nga mangin bahin ka sang iya pamilya. Gani himua ang imo bug-os nga masarangan nga malipay sia sa imo. Dumduma pirme ang mga promisa sang Dios sa tanan mo nga ginahimo kada adlaw. Pabalori ang imo pribilehiyo nga simbahon ang aton pinalangga nga Amay sa langit kag ang imo paglaum nga madayaw sia sing wala sing katapusan.

AMBAHANON 107 Si Jehova ang Huwaran sang Gugma

^ par. 5 Para mangin malipayon ang isa ka pamilya, dapat kabalo ang kada miembro sang dapat niya himuon kag dapat sia magkooperar sa iban pa nga miembro sang ila pamilya. Ginapangunahan sang amay ang iya pamilya sa mahigugmaon nga paagi, ginasuportahan sia sang iloy, kag ginatuman sang mga bata ang ila mga ginikanan. Pareho man sa sini ang pamilya ni Jehova. May katuyuan ang aton Dios para sa aton. Kag kon magkooperar kita sa sina nga katuyuan, mangin bahin kita sang pamilya ni Jehova.

^ par. 55 MGA PIKTYUR: Gintuga ni Jehova ang mga tawo nga may ikasarang nga ilugon ang iya mga kinaiya. Ginailog sang isa ka mag-asawa ang mga kinaiya sang Dios paagi sa pagpakita sang gugma kag kaluoy sa isa kag isa kag sa ila mga anak. Palangga nila si Jehova. Ginapakita nila nga ginapabaloran nila ang regalo nga magpanganak paagi sa pagbulig sa ila mga anak nga palanggaon kag alagaron si Jehova. Ginagamit sang mga ginikanan ang isa ka video para ipaathag sa ila mga anak kon ngaa ginhatag ni Jehova si Jesus bilang gawad. Ginatudluan man nila sila nga sa Paraiso, atipanon naton ang duta kag ang mga sapat sing wala sing katapusan.