Izai 21:1-17
21 En mesaz kont sa dezer ki parey en lanmer:*+
I pe vini parey en tanpet divan ki pas dan sid,
I sorti dan dezer, dan en pei ki fer per.+
2 Mon’n ganny en vizyon ki fer mwan per:
Sa enn ki tret pe azir dan en fason ki tret
E sa enn ki detrir pe detrir.
Elam, monte! Medi, anserkle li!+
Mon pou fer li aret fer lezot dimoun soufer.+
3 Sanmenm sa mon pe soufer en kantite.*+
Mon pe tranble,
Parey ler en madanm pe ganny pti baba.
Mon dan tro bokou douler pour mwan ekoute.
Mon latet i tro fatige pour mwan vwar.
4 Mon leker i fay. Mon per e mon pe tranble.
Mon anvi fernwanr i fer, me sa i fer mwan tranble.
5 Prepar latab e aranz bann sez!
Manze e bwar!+
Bann prens, leve e frot zot boukliye avek delwil!*
6 Parski la sa ki Zeova ti dir mwan:
“Ale, fer en dimoun veye e fer li dir sa ki i vwar.”
7 I ti vwar en saret lager avek en group seval,
En saret lager avek bann bourik,
En saret lager avek bann samo.
I ti get byen, wi, i ti get zot byen.
8 Apre, i ti kriye parey en lyon e i ti dir:
“O Zeova, mon pe debout lo latour dan lazournen
E mon reste dan sa landrwa kot mon veye tou le swar.+
9 Get sa ki pe vini:
Bann zonm dan en saret lager avek en group seval!”+
Apre i ti koz byen for e i ti dir:
“I’n tonbe! Babilonn in tonbe!+
I’n kraz tou bann stati* son bann bondye ater!”+
10 Mon pep, ou’n ganny bate parey lagrenn,
Sa bann lagrenn* dan mon landrwa kot dible i ganny bate,+
Mon’n dir zot sa ki Zeova Sef larme, Bondye Izrael in dir mwan.
11 En mesaz kont Douma:*
I annan en dimoun Seir+ ki pe kriy mwan e i pe dir:
“Gardyen, kan lizour pour fer?*
Gardyen, kan lizour pour fer?”
12 Sa gardyen ti dir:
“Lizour i pros pour fer e lannwit osi i pros pour vini.
Si zot anvi konnen, demande.
Retourn ankor!”
13 En mesaz kont dezer:
Zot pou pas lannwit dan lafore dan dezer,
Zot ki sorti Dedann+ e ki pe vwayaze.
14 Bann zabitan Tema,+
Anmenn delo pour zot al zwenn sa dimoun ki swaf
E anmenn dipen pour sa dimoun ki pe sove.
15 Parski zot in sove devan lepe, devan lepe ki’n ganny tire dan fouro,*Devan lark ki’n ganny ploye e dan lager ki kriyel.
16 Parski la sa ki Zeova ti dir mwan: “Dan enn an, dapre lafason ki en travayer i kont son bann lannen,* Kedar+ pou perdi tou son laglwar.
17 I pou reste en ptigin dimoun ki tir fles parmi bann gerye Kedar, parski Zeova Bondye Izrael ki’n dir sa.”
Bann not
^ Aparaman, sa pe refer avek rezyon Babilonn dan letan lontan.
^ Literalman, “mon laans i vreman fermal.”
^ Oubyen “swazir zot boukliye.”
^ Oubyen “stati ki’n ganny skilpte.”
^ Literalman, “Sa garson.”
^ Sa non i vedir “Silans.”
^ Oubyen “ki mannyer lannwit pe ale?”
^ Vwar Leksplikasyon bann mo.
^ Oubyen “parey en travayer i kont byen son bann lannen.” Setadir, dan egzakteman enn an.
